ރާއްޖެއަށް މިއަހަރުވެސް ޙައްޖުކޯޓާ އިތުރުކޮށްދެއްވާނެކަމުގެ ޔަޤީންކަން ސަޢުދީ ޢަރަބިއްޔާގެ ސަރުކާރުން ދެއްވާފައިވާކަމަށް ފޮރިން މިނިސްޓަރ ޢަބްދުﷲ ޝާހިދު ވިދާޅުވެއްޖެއެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަފުޅު ދައްކަވަމުން ފޮރިން މިނިސްޓަރ ވިދާޅުވީ، މިދިޔަ ފެބްރުއަރީ މަހުގެ 12އިން 14އަށް ސަޢުދީ ޢަރަބިއްޔާއަށް ކުރެއްވި ދަތުރުފުޅުގައި އެޤައުމުގެ މިނިސްޓަރ އޮފް ޙައްޖު އެންޑް ޢުމްރާއާ ބައްދަލުކުރައްވައި މަޝްވަރާކުރެއްވިކަމަށެވެ.
ރާއްޖޭގެ ހައްޖުވެރިންނަކީ އެންމެ އަޚްލާޤު ރަނގަޅު ހައްޖުވެރިންކަން ސައުދީ ހައްޖު މިނިސްޓަރ ފާހަގަކުރައްވާފައިވާކަމަށް މިނިސްޓަރ ޝާހިދު ވިދާޅުވިއެވެ. އަދި މިއަހަރުވެސް ޙައްޖު މޫސުމްގައި ރާއްޖެއަށް ދޭ ކޯޓާ އިތުރުކޮށްދެއްވާނެކަމުގެ ޔަޤީންކަން ސަޢުދީ ސަރުކާރުން ދެއްވާފައިވާކަމަށްވެސް ފޮރިން މިނިސްޓަރ އަބްދުﷲ ޝާހިދު ވިދާޅުވިއެވެ. އެހެންނަމަވެސް އިތުރުކޮށްދެއްވި ޙައްޖު ކޯޓާގެ ޢަދަދު މިނިސްޓަރ ވިދާޅުވެއްނުވެއެވެ.
ރާއްޖެއަށް ކޮންމެ އަހަރަކުވެސް ސަޢުދިޢަރަބިއްޔާއިން ދެނީ އެއްހާސް މީހުންގެ ކޯޓާއެވެ. އަދި ޙައްޖު މޫސުމާ ކައިރިކޮށް އިތުރު އެއްހާސް ކޯޓާ އެޤައުމުން އަންނަނީ ދެމުންނެވެ.
"ސަޢުދީ ޙައްޖާބެހޭ ވަޒީރު ވިދާޅުވީ ރާއްޖޭގެ ޙައްޖުވެރިންނަކީ އެންމެ އަޚްލާޤު ރަނގަޅު ބައެއްގެ ގޮތުގައި ފާހަގަވެފައިވަކަމަށެވެ. އެހެންކަމުން އެކަމަށް އަޅުގަނޑު ޝުކުރުއަދާކޮށް ޙާއްޖު ކޯޓާ އިތުރުކޮށްދޮނުމަށް އެދުމުންދާނެކަމުގެ ޔަޤީންކަން ޙައްޖު މިނިސްޓަރ އަޅުގަނޑަށް ދެއްވި." މިނިސްޓަރ ޝާހިދު ވިދާޅުވިއެވެ.
މިނިސްޓަރ ޝަހިދު ވިދާޅުވީ، މިސަރުކާރުން ސަޢުދީ ޢަރަބިއްޔާގެ ޖިއްދާގައި ކޮންސުލޭޓެއް ހުޅުވުމަށް ނިންމާފައިވާކަމަށާއި، އެކަމުގެ ސަބަބުން ޙާއްޖާއި ޢުމުރާއަށްދާ ރާއްޖޭގެ މީހުންނަށް އެ ކޮންސުލޭޓް މެދުވެރިކޮށް ދިވެހި ޚާރިޖިއްޔާގެ އެހީތެރިކަން ފޯރުކޮށްދޭނެކަމަށެވެ. އަދި ޖިއްދާގައި ރާއްޖޭގެ ކޮންސުލޭޓެއް ޤާއިމްކުރެވުމުން އޯގަނައިޒޭޝަން އޮފް އިސްލާމިކް ކޮންފަރެންސް، އޯއައިސީއާއި ގުޅިގެން ދިވެހިންނަށް ފައިދާހުރި ގިނަ މަސައްކަތްތަކެއް ކުރެވޭނެކަމަށް މިނިސްޓަރ ވިދާޅުވިއެވެ.
އަދި އިސްލާމީ ޤައުމުތަކާއި އޮންނަ ގުޅުން އެކަމުގެ ސަބަބުން އިތުރަށް ބަދަހިވެގެންދާނެކަންވެސް މިނިސްޓަރ ފާހަގަކުރެއްވިއެވެ. ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މިއަހަރު ދެއްވި ރިޔާސީ ބަޔާނުގައިވަނީ ސަޢުދި ޢަރަބިއްޔާގައި ދިވެހި ކޮންސުލޭޓް އޮފީހެއް ޤާއިމްކުރައްވާނެކަމަށް ވިދާޅުވެފައެވެ.