މިދިޔައަހަރު ޕްރޮސެކިއުޓަރ ޖެނެރަލް އޮފީހުން ތިން ހާހަށްވުރެ ގިނަ މީހުންގެ މައްޗަށް ދަޢުވާއުފުލާފައިވާކަމަށް އެ އޮފީހުގެ ތަފާސް ހިސާބުތަކުން ދައްކައިފިއެވެ.
ޕްރޮސެކިއުޓަރ ޖެނެރަލްގެ އޮފީހުގެ 2018ވަނަ އަހަރުގެ އަހަރީ ރިޕޯޓް ދައްކާގޮތުގައި މިދިޔަނަ އަހަރުގެ ތެރޭގައި ޕްރޮސެކިއުޓަރ ޖެނެރަލްގެ މާލޭގެ އޮފީހުގެ ފަރާތުން ކޯޓުތަކަށް ޖުމްލަ 2534 މީހެއްގެ މައްޗަށް ދަޢުވާކުރުމަށް ހުށަހަޅާފައިވޭ. މީގެ ތެރެއިން އެންމެ ގިނަ މީހުންގެ މައްޗަށް ދައުވާ އުފުލުމަށް ފޮނުވާފައިވަނީ ސުޕީރިއަރ ކޯޓުތަކަށްކަމަށް ޕީޖީ އޮފީހުގެ ރިޕޯޓުން ދައްކައެވެ. ސުޕީރިއަރ ކޯޓްތަަކަށް 2004 މީހުންގެ މައްޗަށް ދައުވާކުރުމަށް ފޮނުވާފައިވައިރު، 530 މީހުންގެ މައްޗަށް
ދަޢުވާ ހުށަހަޅާފައިވަނީ މެޖިސްޓްރޭޓް ކޯޓުތަކަށެވެ.
ޕީޖީ އޮފީހުން ދައުވާކުރި މައްސަލަތުގެ ތެރެއިން ދަޢުވާކުރުމަށް އެންމެ ގިނައިން ފޮނުވާފައިވަނީ ޑައިމޯފިން ބޭނުންކުރުމުގެ ދަޢުވާއެވެ. އެއީ 426 މައްސަލައެއްގައެވެ. ދެވަނައަށް އެންމެ ގިނައިން ހުށަހަޅާފައިވަނީ ކެނެބިސް ބޭނުންކުރުމުގެ ކުށުގެ މައްސަލަތަކެވެ. އެއީ 319 މީހުންގެ މައްޗަށެވެ. މީގެ އިތުރުން 98 މީހުންގެ މައްޗަށް ހުށަހެޅިފައިވާ މައްސަލައަކީ ވައްކަންކުރުމުގެ ކުށުގެ މައްސަލައެވެ.
މިދިޔަ އަހަރު އެންމެ ގިނަ މައްސަލަ ދަޢުވާކުރުމަށް ޕީޖީ އޮފީހަށް ހުށައަޅާފައިވަނީ މޯލްޑިވްސް ޕޮލިސް ސާރވިސްގެ ފަރާތުންނެވެ. އެގޮތުން ބާރަ ސަތޭކައަށްވުރެ ގިނަ މައްސަލަ ފުލުހުން ތަޙްޤީޤްކޮށް ފުލުހުންނަށް ހުށަހަޅާފައިވެއެވެ.
މީގެއިތުރުން މިދިޔަ އަހަރުގެ ޖުމްލަ 9033 ފަރާތެއްގެ ކުށުގެ ރެކޯޑު ސާފުކޮށްދީފައިވާކަމށްވެސް ޕްރޮސެކިއުޓަރ ޖެނެރަލްގެ އޮފީހުގެ އަހަރީ ރިޕޯޓްގައި ފާހަގަކޮށްފައިވެއެވެ. މީގެތެރޭގައި ހިމެނެނީ ފޯމު މެދުވެރިކޮށް ރެކޯޑު ސާފުކޮށްދީފައިވާ 5506 ފަރާތެއްގެ ކުށުގެ ރެކޯޑާއި، ސަރުކާރުގެ އިދާރާތަކާއި ކުންފުނި އަދި އަމިއްލަ ފަރާތްތައް ހިމެނޭގޮތުން ސާފުކޮށްދީފައިވާ 3527 ފަރާތެއްގެ ކުށުގެ ރެކޯޑްތައްކަމަށް ބުނެފައިވެއެވެ.