ރާއްޖޭގެ ބޯޑާރ ކޮންޓްރޯލް ސިސްޓަމް ޤާއިމްކުރުމަށް މެލޭޝިއާގެ ނެކްސްބިޒް ކުންފުންޏާއި ދިވެހި ސަރުކާރާއި ދެމެދު ވެފައިވާ އެއްބަސްވުން އުވާލުމުން ދައްކަންޖެހުނު އަށާރަ މިލިއަން ޑޮލަރު ނުވަތަ 280 މިލިއަން ދިވެހި ރުފިޔާ ދައްކާފައިވާކަމަށް ސަރުކާރުން ހާމަކޮށްފިއެވެ.
މިކަން ހާމަކޮށް ބަންޑާރަ ނާއިބުގެ އޮފީހުން ނެރުނު ބަޔާނެއްގައި ވިދާޅުވީ، ނެކްސްބިޒްއަށް ދައްކަންޖެހޭ ފައިސާ އިއްޔެ ދައްކާފައިވާ ކަމަށެވެ.
މޯލްޑިވްސް އިމިގްރޭޝަން ބޯޑަރ ކޮންްޓްރޯލް ސިސްޓަމްގެ މަސައްކަތް ނެކްސްބިޒް ލިމިޓެޑާއި ޙަވާލުކުރުމަށް ވި އެއްބަސްވުން ބާޠިލުކޮށްފައި ވަނީ އެގްރީމަންޓާއި ޚިލާފަށްކަމަށް ކަނޑައަޅައިވާތީ ދިވެހި ސަރުކާރުގެ ފަރާތުން ފައިސާ ދައްކަންޖެހޭނެ ކަމަށް ކަނޑައަޅާފައިވާ ނިންމުން ތަންފީޒްކުރަންޖެހޭނެކަމަށް ޤަބޫލުކުރާ ކަމަށެވެ.
ބަންޑާރަ ނާއިބުގެ އޮފީހުން ވިދާޅުވީ ދިވެހި ސަރުކާރުން ނެކްސްބިޒް ލިމިޓެޑަށް ދޭންޖެހޭނެކަމަށް އެ އެވޯޑުގައި ކަނޑައެޅި ފައިސާ ދެއްކުމަށް އެދި އެ ކުންފުނިން ދިވެހި ސަރުކާރަށް ތަކުރާރުކޮށް ސިޓީ ފޮނުވާފައިވީނަމަވެސް، ފައިސާ ދެއްކުމުގެ ކަންކަން ކުރިޔަށް ނުގެންދިއުމަށް، ކުރީގެ ސަރުކާރުން ނިންމާފައިވާކަމަށް.
ނެކްސްބިޒްގެ ފަރާތުން ސިންގަޕޫރުގެ ހައިކޯޓަށް މައްސަލަ ހުށަހެޅުމުން، އެ އެވޯޑަކީ ސިންގަޕޫރުގައި ތަންފީޛުކުރެވޭނެ އެވޯޑެއްކަމުގައި ކަނޑައަޅަފައިވާ ކަަމަށްވެސް ބަންޑާރ ނާއިބުގެ އޮފީހުން ވިދާޅުވިއެވެ.
ބޯޑަރ ކޮންްޓްރޯލް ސިސްޓަމްގެ މަސައްކަތް ނެކްސްބިޒްއާ ޙަވާލުކުރީ ކުރީގެ ރައީސް މުޙައްމަދު ނަޝީދުގެ ސަރުކާރުގައި 2010ވަނަ އަހަރުގެ އޮކްޓޫބަރ މަހުގެ 17ވަނަ ދުވަހުއެވެ. 20 އަހަރު ދުވަހުގެ އެއްބަސްވުމެއްގައި އިމިގްރޭޝަނުން ސޮއިކޮށްފައިވަނީ ގާތްގަނޑަކަށް 600 މިލިއަން ރުފިޔާއަށެވެ.
އަދި ބޯޑާރ ކޮންޓްރޯލް ސިސްޓަމް ޤާއިމުކުރުމަށްފަހު ރާއްޖެ އަންނަ އަދި ފުރާ ކޮންމެ ބިދޭސީއެއްގެ އަތުން ކޮޅަކަށް ދެ ޑޮލަރު ނެގުމަށް ނެކްސްބިޒާއިއެކު ވަނީ އެއްބަސްވެފައެވެ. އަދި ވިސާ ހައްދައި އަދި އާ ކުރާ ކޮންމެ މީހެއްގެ އަތުން 15 ޑޮލަރު ނެގުމަށްވެސް އެއްބަސްވެފައިވެއެވެ.
ނަމަވެސް އެ އެއްބަސްވުމަކީ ނެކްސްބިޒަށް ގިނަ ޢަދަދެއްގެ ފައިސާ ދައްކަންޖެހޭގޮތަށް އެކުލަވާލި އެއްބަސްވުމެއްކަމަށާއި، ނެކްސްބިޒްއިން ޤާއިމްކުރާ ނިޒާމަކީ ރާއްޖެއާ އެކަށޭނެ ނިޒާމެއް ނޫންކަމަށް ބުނެ ކުރީގެ ރައީސް ޑރ.މުޙައްމަދު ވަހީދު ޙަސަންގެ ސަރުކާރުން އެ އެއްބަސްވުން 2013ވަނަ އަހަރުގެ އޮގަސްޓު މަހުގެ ފަސްވަނަ ދުވަހު ވަނީ އުވާލައިފައެވެ.
އެ އެއްބަސްވުން އުވާލުމާއި ގުޅިގެން ނެކްސްބިޒްގެ ފަރާތުން 272 މިލިއަން އެމެރިކާ ޑޮލަރު ހޯދަން ދިވެހި ސަރުކާރާ ދެކޮޅަށް ސިންގަޕޫރުގެ އިންޓަނޭޝަނަލް އާބިޓްރޭޝަން ސެންޓަރަށް ހުށައެޅިނަމަވެސް ނެކްސްބިޒްއަށް ދޭން ކަނޑައަޅާފައިވަނީ 18.1 މިލިއަން ޑޮލަރެވެ.