މއ ޒޫނާ މަންޒިލް ގޭގައި މިރޭ ރޯވި އަލިފާންގަނޑު ސިފައިން ނިއްވާލައިފިއެވެ.
މޯލްޑިވްސް ނެޝަނަލް ޑިފެންސް ފޯރސް އެމްއެންޑީއެފުން ބުނީ މި ޙާދިސާ އެމްއެންޑީއެފަށް ރިޕޯރޓް ކުރީ މިރޭ 22:15 ހާއިރު ކަމަށާއި، އެމްއެންޑީއެފް ފަޔަރ އެންޑް ރެސްކިއު ސަރވިސް އަށް ރިޕޯޓު ލިބުމާއެކު ފަޔަރމަނުން އެޞަރަޙަށްދަށް ގޮސް އަލިފާން ނިއްވަން މަސައްކަތް ކުރި ކަމަށެވެ. އަދި އެ ގޭގެ ގައި ރޯވި އަލިފާން އެފްއާރުއެސްގެ ފަޔަރފައިޓަރުން ކުރި މަސައްކަތުން އެއްކޮށް ކޮންޓްރޯލްކުރެވުނީ މިރޭ 22:50 ހާއިރުކަމަށްވެސް އެމްއެންޑީއެފުން ބުނެއެވެ.
މި ޙާދިސާގައި އަލިފާން ރޯވި އެގޭގެ ދެވަނަ ފަންގި ފިލާގައި ހުރި ކޮޓަރިއެއްގައި ކަމަށާއި، އެ ކޮޓަރި ބޭނުން ނުކުރެވޭވަރަށް އަނދާފައިވާއިރު އިމާރާތުގެ ގްރައުންޑް ފްލޯއަށްވެސް އަލިފާނުގެ އަސަރުކޮށް އެކިވަރުގެ ގެއްލުންތައް ލިބުނު ކަމަށް އެމްއެންޑީއެފުން ބުނެއެވެ.
މިހާދިސާގައި އެއްވެސް މީހަކަށް ހާނިއްކައެއް ލިބިފައިނުވާކަމަށާއި، މި ޙާދިސާ މެދުވެރިވާން ދިމާވި ސަބަބު ހޯދުމަށް މޯލްޑިވްސް ޕޮލިސް ސަރވިސް އިން ތަހުޤީޤު ކުރަމުންދާ ކަމަށްވެސް އެމްއެންޑީއެފުން ބުނެއެވެ.