ތުރުކީވިލާތުގެ މަރުކަޒީ ބޭންކަކީ މިނިވަން އިދާރާއެއްގެ ގޮތުގައި މަސައްކަތްކުރާ ތަނަކަށް ހެދުމަށް ޖަރުމަނުވިލާތުގެ ޗާންސެލަރ އަންގެލާ މަރކެލް ތުރުކީވިލާތަށް ގޮވާލައްވައިފިއެވެ.
މަރކެލް މިކަމަށް ގޮވާލައްވާފައި މިވަނީ، އެމެރިކާ ޑޮލަރާ އަޅައިބަލާއިރު ތުރުކީވިލާތުގެ ފައިސާކަމަށްވާ ލީރާގެ އަގު އެތައް ގުނައެއް ދަށަށްގޮސް، އެ ޤައުމުގެ އިޤްތިޞާދު ދާ މިސްރާބާމެދު ގިނަ ސުވާލުތަކެއް އުފެދިފައިވާ ދަނޑިވަޅެއްގައެވެ.
ބަރލިންގައި ބޭއްވި ނޫސްވެރިންގެ ބައްދަލުކުރެއްވުމެއްގައި ވާހަކަ ދައްކަވަމުން ޖަރުމަނު ޗާންސެލަރ ވިދާޅުވީ، ތުރުކީވިލާތަށް އިޤްތިޞާދީ ކަންބޮޑުވުންތަކެއް އައުމަކީ އެއްވެސް ފަރާތަކުން ބޭނުންވާނެ ކަމެއް ނޫންކަމަށެވެ. އެހެންނަމަވެސް، ތުރުކީވިލާތުގެ މަރުކަޒީ ބޭންކަކީ މިނިވަން އިދާރާއެއްގެ ގޮތުގައި ހަމަޖައްސަންޖެހޭ ކަމަށްވެސް މަރކެލް ވިދާޅުވިއެވެ. ޖަރުމަނުވިލާތުގެ ޗާންސެލަރ އިތުރަށް ވިދާޅުވީ، ޖަރުމަނުވިލާތުން ބޭނުންވަނީ އިޤްތިޞާދީ ގޮތުން ފާގަތި ތުރުކީވިލާތެއް ކަމަށާއި މިކަމުގައި ޖަރުމަނުވިލާތުގެ މަސްލަހަތުވެސް އެބައޮތްކަމަށެވެ.
ޖަރުމަނުވިލާތުގެ ޚާރިޖީ ވަޒީރު ހެއިކޯ މާސް ވިދާޅުވީ، ތުރުކީވިލާތުން އެ ޤައުމާ އެމެރިކާއާ ޖަރުމަނާ ދެމެދު އޮންނަ ސިޔާސީ ގުޅުންތައް ރަނގަޅުކުރަން ޖެހޭ ކަމަށާއި މިކަމަކީވެސް އެ ޤައުމަށް އިޤްތިޞާދީ ގޮތުން ލުއިތަކެއް ލިބޭނެ ކަމެއްކަމަށެވެ.