ފްރާންސަށް ވޯލްޑް ކަޕް ކާމިޔާބުކޮށްދިން މިޑްފީލްޑަރު ޕައުލް ޕޮގްބާ އަކީ ޒުވާން ކުޅުންތެރިންނަށް ނަމޫނާ މިސާލެއް ކަމަށް ކޯޗު ޑިޑިއޭ ޑެޝޯން ބުނެފިއެވެ.
އުމުރުން 25 އަހަރުގެ ކުޅުންތެރިޔާ އަށް ޑެޝޯން ތައުރީފް އޮއްސާލީ ޕޮގްބާ އަށް މުބާރާތުގެ ކުރިން އަދި މިހާރުވެސް ފާޑުކިއުން އަމާޒުވެފައިވަނިކޮށެވެ. ސަބަބަކީ ސަޕޯޓަރުން އެންމެ ބޭނުންވާ ކުޅުން އޭނާގެ ފަރާތުން ގިނަ ފަހަރު ނުފެންނަ ކަމަށް ބުނެ އެވެ.
"އެކަމަކު އަހަރެން އޭނާއާ މެދު ފަހުރުވެރިވަން. އޭނާ އަކީ ނަމޫނާ ކުޅުންތެރިއެއް. މި ޓީމުގައި އޭނާ އަކީ އެންމެ 25 އަހަރުގެ ކުޅުންތެރިއަކަށްވާއިރު އޭނާ ވަނީ އެހެން ކުޅުންތެރިންނަށް ނަމޫނާ ކަންތައްތަކެއް ދައްކައިދީފައި. ޒުވާން ކުޅުންތެރިންނަށް އޭނާ ނަމޫނާ އަކަށް ފުދޭނެ،" ޑެޝޯން ބުންޏެވެ.
އޭނާ ބުނީ ޓީމު ލީޑް ކުރުމުގައި ޕޮގްބާގެ ދައުރު ވަރަށް ބޮޑު ކަމަށެވެ. އަދި މީގެ ކުރިން ކުޅެފައިވާ ބޮޑު ދެ މުބާރާތް ކަމަށްވާ 2014 ވަނަ އަހަރުގެ ވޯލްޑް ކަޕާއި 2016 ވަނަ އަހަރުގެ ޔޫރޯގެ ތަޖުރިބާއިން ޕޮގްބާ ވަރަށް ގިނަ ކަންތައްތައް ރަނގަޅު ކޮށްފައިވާ ކަމަށެވެ.
ޕޮގްބާ ކުލަބުގެ ކޯޗު ހޯސޭ މޮރީނިއޯ ވެސް ވަނީ އުއްމީދީ ވާހަކަތަކެއް ދައްކާފަ އެވެ. މޮރީނިއޯ ބުނީ ދުނިޔޭގެ ޗެމްޕިއަނެއްގެ ގޮތުގައި އަލުން ކުލަބާ ގުޅޭއިރު ކުރިއަށްވުރެ މޮޅު އަދި ހޭލުންތެރި ކުޅުންތެރިއެއްގެ ގޮތުގައި ޕޮގްބާ ފެނިގެންދާނެ ކަމަށް އޭނާ އުއްމީދު ކުރާ ކަމަށެވެ.