ފަލަސްޠީނުގެ ޣައްޒާގައި ބަނޑުހައިހޫނު ކަންމަތީ އުޅެމުންދާ މީހުންނަށް ކާބޯތަކެތި ފޯރުކޮށްދިނުމަށް އދ.ގެ ކާބޯތަކެއްޗާ ބެހޭ އިދާރާއިން ޚާއްސަ ޕްރޮގްރާމެއް ފަށައިފިއެވެ.
މި ޕްރޮގްރާމް ފަށާފައިވަނީ 72 ގަޑިއިރަށް ޣައްޒާއަށް ހަމަލާ ނުދޭނެ ކަމަށް ބުނެ އިސްރާއީލުން ވީ އެއްބަސްވުން ތަންފީޒުކުރަމުންދާ ދަނޑިވަޅެއްގައެވެ. ކާބޯތަކެއްޗާ ބެހޭ އދގެ އިދާރާ ޑަބްލިއު.އެފް.ޕީން ނެރުނު ބަޔާނެއްގައި ބުނެފައިވަނީ މި ޕްރޮގްރާމްގެ ދަށުން ޣައްޒާގައި ކާބޯތަކެއްޗަށް ޖެހިފައި ތިބި ހުރިހާ ރައްޔިތުންނަށް ކާބޯތަކެތި ފޯރުކޮށްދެވޭނެ ކަމަށް އުއްމީދުކުރާ ކަމަށެވެ. މި ގޮތުން ކުރިއަށް އޮތް ދުވަސްތަކުގައި 730 ހާސް މީހުންނަށް ގޮދަނާ ހަނޑޫ ފޯރުކޮށްދޭނެ ކަމަށް ވެސް އދގެ އިދާރާއިން ވަނީ ބުނެފައެވެ.
ޖުލައި މަހުގެ 8 ވަނަ ދުވަހު އިސްރާއީލުން ޣައްޒާއަށް ދޭން ފެށި ވަރުގަދަ ހަމަލާތަކުގެ ސަބަބުން ޣައްޒާގެ ބައެއް ސަރަހައްދުތައް ވަނީ މުޅިހެން ސުންނާފަތިވެފައެވެ. މިކަމުގެ ސަބަބުން ޣައްޒާގެ އެތައް ހާސް ބަޔަކު ވަނީ ގެދޮރު ގެއްލި ހާލުގައި ޖެހިފައެވެ.