ސޫރިޔާގެ ދެކުނުގައި މިހާރު ހިންގަމުންދާ ކުރިމަތިލުންތަކާ މެދު ކަންބޮޑުވާ ކަމަށް އެމެރިކާއިން ބުނެފިއެވެ. ނޫސްވެރިންނާ ވާހަކަ ދައްކަވަމުން، އެމެރިކާގެ ޚާރިޖީ ވުޒާރާގެ ތަރުޖަމާނު ހެދަރ ނައުއަރޓް ވިދާޅުވީ، ސޫރިޔާގެ ދެކުނުގެ ހާލަތު އެމެރިކާއިން ގާތުން ބަލަމުންދާ ކަމަށެވެ.
އަދި އެ ސަރަހައްދުގައި ވަޔާއި އެއްގައުމު މަގުންވެސް ހަމަލާ ދެމުންދާ ކަަމަށާއި އެ ސަރަހައްދުގައި ހާލުގައި ޖެހިފައި ތިބި ފަރާތްތަކަށް ދޭ އިންސާނީ އެހީއަށްވެސް ހުރަސް އެޅިފައިވާކަމުގެ ރިޕޯޓްތައް ލިބިފައިވާކަމަށް އޭނާ ވިދާޅުވިއެވެ.
ނައުއަރޓް ވިދާޅުވީ، ސޫރިޔާގެ ދެކުނުގައި މިހާރު ހިންގަމުންދާ ކުރިމަތިލުންތަކާ ބެހޭގޮތުން މަޝްވަރާކުރެއްވުމަށް އެމެރިކާގެ ޚާރިޖީ ވަޒީރު މައިކް ޕޮމްޕެއޯ ރަޝިޔާގެ ޚާރިޖީ ވަޒީރު ސަރްގެއި ލަވްރޯފަށް އަންގާރަ ދުވަހު ގުޅުއްވި ކަމަށާއި މި ފޯނު ކޯލުގައި ދެ ބޭފުޅުން ވަނީ ހަމަލާތައް ހުއްޓާލުމުގެ އެއްބަސްވުމަކާ ބެހޭގޮތުން މަޝްވަރާތައް ކުރައްވާފައި ކަމަށެވެ.
ހުސްވި ޖޫން މަަހުގެ ފަހުކޮޅު ސޫރިޔާގެ އަސްކަރިއްޔާއިން އެ ޤައުމުގެ ދެކުނުގައި ހިންގަން ފެށި އޮޕަރޭޝަންގެ ސަބަބުން އެ ސަރަހައްދުގެ ދުވިސައްތަ ހަތް ދިހަހާސް މީހުން ހާލުގައި ޖެހިފައިވާކަމަށް އދން ބުނެއެވެ. މިއީ 2011 ވަނަ އަހަރަށް ފަހު ސޫރިޔާގެ ދެކުނުގައި އެންމެ ގިނަ ބަޔަކު ހާލުގައި ޖެހިފައިވާ ފަހަރު ކަމަށްވެސް އދން ބުނެއެވެ.