ކްރިސްޓިއާނޯ ރޮނަލްޑޯގެ ހަމައެކަނި ލަނޑުން މޮރޮކޯގެ މައްޗަށް ޕޯޗްގަލް ކުރި ހޯދުމާއެކު މުބާރާތުން ކެޓި ފުރަތަމަ ޓީމަކަށް މޮރޮކޯ ވެއްޖެއެވެ.
ފުރަތަމަ މެޗުގައި 1-0 ން އިރާން އަތުން ބަލިވެފައިވަނިކޮށް، މިރޭ ޕޯޗްގަލް އަތުންވެސް ބަލިވީ 1-0 ނެވެ. މެޗުގެ ހަތަރު ވަނަ މިނިޓްގައި ރޮނަލްޑޯ ބޮލުން ވައްދާލި ގޯލުން ޕޯޗްގަލް މޮޅުވެ، ދެވަނަ ބުރުގެ ފުރުޞަތު ފަހި ކުރި ނަމަވެސް، މިރޭގެ މެޗުގައި މޮރޮކޯއިން ވަނީ ޕޯޗްގަލްގެ ގޯލާ އަމާޒުކޮށް ނުރައްކާތެރި ހަމަލާތަކެއް ފޮނުވާލާފައެވެ. އެހަމަލާތައް ދިފާއުކުރުމުގައި ޕޯޗްގަލްގެ ކީޕަރު ރުއި ޕެޓްރީސިއޯ ވަނީ މޮޅު ކުޅުމެއް ދައްކާފައެވެ. މެޗުގެ އިތުރު ވަގުތުގެ ތެރޭގައިވެސް މޮރޮކޯގެ ނުރައްކާތެރި ހަމަލާއަކާ ޕޯޗްގަލްގެ ކީޕަރު ކުރިމަތިލާން ޖެހުނެވެ. ޕޯޗްގަލްއިންވެސް ލަނޑުޖަހަން ފުރުޞަތު ތަނަވަސްކުރިއެވެ. އޭގެ ތެރޭގައި ރޮނަލްޑޯ ގުއެޑޭސްއަށް ދިން ބޯޅަ ފާހަގަކޮށްލެވެއެވެ. އެބޯޅަ މަތަކުރީ މޮރޮކޯގެ ކީޕަރެވެ.
މެޗުގައި ރޮނަލްޑޯ ޖެހި ލަނޑާއެކު އޭނާއަކީ މިވަގުތު މުބާރާތުގެ ޓޮޕް ސްކޯރަރއެވެ. އެއީ ދެ މެޗުން ހަތަރު ގޯލް ޖަހައިގެންނެވެ. މީގެއިތުރުން ބައިނަލްއަޤްވާމީ މުބާރާތްތަކުގައި ޔޫރަޕްގެ ޓޮޕް ސްކޯރަރއަކީވެސް އޭނާއެވެ. އެއީ 85 ލަނޑާއެކުއެވެ. މިނަތީޖާއާއެކު ގްރޫޕް ބީގެ އެއްވަނާގައި މިވަގުތު އޮތީ ޕޯޗްގަލްއެވެ.