ރޭންކިންގެ 1 ވަނަ، މިދިޔަ އަހަރު މެޑަލް ހޯދި، އެކަމަކު ޒަޔާންއަށް މިފަހަރު ފުރުޞަތެއް ނުދިން

މެލޭޝިޔާގައި ތަމްރީނު ހޯދަމުންދާ ރާއްޖޭގެ އެއްވަނަ ބެޑްމިންޓަން ކުޅުންތެރިޔާ ޒަޔާން ޝަހީދު ޒަކީއަށް ފުރުޞަތު ނުދީ ޤައުމީ ބެޑްމިންޓަން ޓީމް މޮރިޝަސް އިންޓަރނޭޝަނަލް ސީރީޒްގައި ވާދަކުރަން އެޤައުމަށް ހިނގައްޖެއެވެ.

ޤައުމީ ޗެމްޕިއަން ޒަޔާން އަކީ މިދިޔަ އަހަރު މޮރިޝަަސް އިންޓަރނޭޝަނަލް ސީރީޒްގައި ވާދަކުރި ޓީމްގައި ހިމެނި ލޯ މެޑަލް ހޯދި ކުޅުންތެރިއެކެވެ. އެކަމަކު ޒަޔާންއަށް މިފަހަރު ފުރުޞަތު ނުދިން ސަބަބެއް އަންގާފައިނުވާކަމަށް އޭނާގެ ފޭސްބްކް ޕޭޖްގައި ވަނީ ބުނެފައެވެ. 2016 ވަނަ ވަނަ އަހަރުގެ ފަހުކޮޅުން ފެށިގެން މެލޭޝިޔާގެ ހައި ޕާފޯމަންސް އެކަޑަމީގައި ތަމްރީނު ހޯދަމުން އަންނަ ޒަޔާން ވަނީ އެމުއްދަތުގެ ތެރޭގައި ބޮޑަތި ކުރިއެރުންތަކެއްވެސް ހޯދާފައެވެ. ޤައުމީ ޗެމްޕިއަންކަން ހޯދާ ރޭންކިންގެ އެއްވަނާގައި ހުރުމަކީވެސް އޭގެ ހެއްކެކެވެ. މޮރިޝަސް ސީރީޒްއިން ފުރުޞަތު ނުލިބުމުން މާޔޫސްވެފައިހުރި ޒަޔާން ބުނީ ގެއްލިގެން ދިޔައީ ވަރަށްބޮޑު ފުރުޞަތެއްކަމަށާއި، އެއީ މިއަހަރު އޮންނާނެ އެންމެ މުޙިއްމު މުބާރާތްކަމަށެވެ. މެލޭޝިޔާގައި ތަމްރީނު ހޯދަމުން އަންނަ އެކަޑަމީން އޭނާގެ ހާޞިރީވެސް އެސޯސިއޭޝަނާ ޤަވާއިދުން ޙިއްޞާކުރަމުންދާކަމަށް ޒަޔާން ބުންޏެވެ.
މުބާރާތުން ފުރުޞަތު ދިނުމަށާއި، ޓީމުގައި ނުހިމެނޭމަ އޭނާގެ އަމިއްލަ ޚަރަދުގައި އިންޑިވިޖުއަލް އެތްލީޓެއްގެ ގޮތުގައި ބައިވެރިކޮށްދިނުމަށް އެދުމުން އެކަމަށްވެސް އެސޯސިއޭޝަނުން އިޖާބަ ނުދިންކަމަށް ޒަޔާން ލިޔެފައިވެއެވެ.

" ޤައުމީ ޗެމްޕިއަނުގެ ހައިޞިއްޔަތުން، މިހާރު ރޭންކިންގެ އެއް ވަނަ ކުޅުންތެރިޔާގެ ހައިޞިއްޔަތުން، އަދި މިދިޔަ އަހަރު މުބާރާތުގައި ވާދަކޮށް މެޑަލް ހޯދި ކުޅުންތެރިއެއްގެ ގޮތުގައިހުރެ، އެއްވެސް މަޤްބޫލް އުޒުރެއް ނެތި މިފަހަރު ފުރުޞަތު ނުލިބުމަކީ ވަރަށްބޮޑު މާޔޫސްކަމެއް. " ޒަޔާން ލިޔެފައިވެއެވެ.

ޒަޔާން ބުނީ އޭނާ މިސާލަކަށް ބަލަމުން އައީ މިފަހަރުގެ ޓީމްގައި ހިމެނުނު ކުރީގެ އެއްވަނަ ކުޅުންތެރިޔާ މުޙައްމަދު އަޖުފާން ރަޝީދުކަމަށާއި، އަޖްފާންއަކީ އެންމެ ހުނަރުވެރި ކާމިޔާބު ކުޅުންތެރިޔާކަމަށެވެ. އަޖުފާންވެސް އެހިސާބަށް ދަތުރުކުރީ ރާއްޖެއިން ބޭރުގައި ފުރިހަމަކުރި ތަމްރީނުތަކާއެކުކަން ޒަޔާން ފާހަގަކުރިއެވެ. ހަމައެގޮތުން މަސައްކަތްކޮށްގެން ރާއްޖޭގެ ބެޑްމިންޓަންއަށް ތަފާތެއް ދައްކަން މަސައްކަތްކުރަމުންދާކަމަށް ޒަޔާން ބުނެފައިވެއެވެ.
ޒަޔާން ބުނީ އޭނާ އެދެނީ ކޮލިފިކޭޝަން ކުޅެގެން، އޭނާ ޓީމަށް އަރަންޖެހޭކަން ސާބިތުކޮށްދީގެން ފުރުޞަތު ހޯދަން ކަމަށާއި، އޮޓޮމެޓިކް ޖާގައަކަށް ނޭދޭކަމަށެވެ.

މިކަމާގުޅިގެން އެސޯސިއޭޝަންގެ އޮފިޝަލަކު ބުނީ ޒަޔާންއަށް ފުރުޞަތު ނުލިބުމުގައި ވަކި ޚާއްޞަކަމެއް ނެތްކަމަށާއި، ޒަޔާން ނޫން އެހެން ކުޅުންތެރިންވެސް ބޭރުގައިވެސް ތަމްރީނު ހޯދަމުންދާކަމަށެވެ. އަދި ބޭރުގައި ތަމްރީނު ހޯދަމުންދާ ކުޅުންތެރިންނަށް މީގެކުރިންވެސް ފުރުޞަތުވެސް ދެމުން އަންނަކަމަށެވެ.

"އެއީ މިފަހަރުގެ ޓީމް" ކުރުކޮށް އޮފިޝަލް ބުންޏެވެ.

ޒަޔާން މެލޭޝިޔާގައި ތަމްރީނު ހޯދަމުން އަންނަނީ އަންނަ އަހަރު މޮރިޝަސްގައި އޮންނަ އިންޑިއަން އޯޝަން އައިލެންޑް ގޭމްސްގައި މެޑަލް ހޯދަން ވަރަށް ބޮޑަށް އަމާޒު ހިފައިގެންނެވެ. އިންޑިއަން އޯޝަން އައިލެންޑް ގޭމްސް އަންނަ އަހަރު އޮންނާނީވެސް މޮރިޝަސްގައެވެ.

މިމަހުގެ 7 ން 10 އަށް މޮރިޝަސްގައި އޮންނަ މޮރިޝަސް ސީރީންގައި ވާދަކުރާ ދިވެހި ޓީމްގައި ހިމެނެނީ ކުރީގެ އެއްވަނަ ކުޅުންތެރިޔާ މުޙައްމަދު އަޖުފާންއާއި، މުޙައްމަދު ޝާރިމާއި، ހަސަން ޠޯއިފާއި، ނިބާލް އަހުމަދާއި، ޝަހުރުނާޒް މޫސާއާއި، ދެބެންކަމަށްވާ ނަބީހާ ޢަބްދުއްރައްޒާޤާއި، ނަބާހާ ޢަބްދުއްރައްޒާޤެވެ.