ސައުދީއަރަބިޔާ އިސްވެ އޮވެ، ރަޖިސްޓްރީކުރަން މަސައްކަތްކުރާ ފުޓްބޯޅަ ޖަމްއިއްޔާގެ މެމްބަރު ޤައުމުތަކުން ފީފާގެ އޮފިޝަލުންނާއެކު ސައުދީއަރަބިއްޔާގެ ޖިއްދާގައި ބައްދަލުކުރައްވައިފިއެވެ.
ރާއްޖޭގެ ފުޓްބޯޅަ އެސޯސިއޭޝަންވެސް ހިމެނޭގޮތަށް ބޭއްވި ބައްދަލުވުމުގައި ސައޫދީގެ އިތުރުން އިންޑިޔާއާއި، ޕާކިސްތާނާއި، ޔޫއޭއީގެ ފުޓްބޯޅަ ފެޑެރޭޝަންގެ އެންމެ އިސް ބޭފުޅުން ބައިވެރިވިއެވެ. ރާއްޖެއިން ބައްދަލުވުމުގައި ބައިވެރިވީ އެފްއޭއެމްގެ ރައީސް ބައްސާމް އަދީލް ޖަލީލްއެވެ.
ސައުތް ވެސްޓް އޭޝިޔަން ފުޓްބޯޅަ ފެޑެރޭޝަން، ސްވަފްގެ އަމާޒަކީ ހުރިހާ އުމުރެއްގައި ފުޓްބޯޅައިގެ ހުނަރުތައް ތަރައްޤީކޮށް، ދެޖިންސަށްވެސް ހަމަހަމަ ފުރުޞަތު ދީގެން މަސައްކަތްކުރުމެވެ. ޖަމްއިއްޔާ ރަޖިސްޓްރީ ކުރުމުގައި 14 ޤައުމަކުން ބައިވެރިވެއެވެ. މީގެތެރެއިން ކުރިއަށް އޮތް ވަރލްޑްކަޕަށް ކޮލިފައިވި ހަމައެކަނި ޤައުމަކީ ސައޫދީއަރަބިޔާއެވެ.
ބައްދަލުވުމުގައި ބައިވެރިވުމަށްފަހު އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވީ ރާއްޖޭގެ އެންމެ މަޤްބޫލް ކުޅިވަރަކީ ފުޓްބޯޅަ ކަމަށެވެ.
" ރާއްޖޭގެ އެއްވަނަ ކުޅިވަރަކީ ފުޓްބޯޅަ. ތަރުތީބު ކުރާނަމަ އެއްވަނަ، ދެވަނަ، ތިންވަނަ، ހަތަރުވަނަ އަދި ފަސްވަނައަށްވެސް އަންނާނީ ފުޓްބޯޅަ. އެހެން ކުޅިވަރުތައް އަންނާނީ އޭގެ ފަހަށް. ރާއްޖެއަކީ ފުޓްބޯޅައަށް މޮޔަވާ ޤައުމެއް " ބައްދަލުވުމަށްފަހު މީޑިޔާއާ ވާހަކަދައްކަވަމުން ބައްސާމް ވިދާޅުވިއެވެ.