ރާއްޖެއާއި އިންޑިއާގެ ދޭދޭ ގުޅުމަށް ބައެއް ޙާލަތްތަކުގައި ހީނަރުކަން އައި ނަމަވެސް، ދެޤައުމުގެ ގުޅުން ނުކެނޑޭނޭކަމަށާއި އަދި ކަނޑުވާވެސް ނުލެވޭނެކަމަށް އިންޑިއާގެ އެކްސްޓަރނަލް އެފެއަރޒް މިނިސްޓަރ ސުޝްމާ ސުވަރާޖް ވިދާޅުވެއްޖެއެވެ.
އިންޑިއާގެ ބޮޑިވަޒީރު ނަރެންދްރަ މޯދީގެ ސަރުކާރުގެ ހަތަރުއަހަރުގެ ކާމިޔާބީ ފާހަގަކުރުމުގެ ގޮތުން އެޤައުމުގެ އެކި މުއައްސަސާތަކުން ބާއްވަމުންދާ ނޫސްވެރިންގެ ބައްދަލުވުމުގެ ތެރެއިން، އެޤައުމުގެ މިނިސްޓްރީ އޮފް އެކްސްޓަރނަލް އެފެއަރޒުން ބޭއްވި ބައްދަލުވުމުގައި އެކްސްޓަރނަލް އެފެއަރޒް މިނިސްޓަރ ސުޝްމާ ސުވަރާޖް ވިދާޅުވީ، މާޒީގައިވެސް ދެޤައުމުގެ ގުޅުމަށް ބުރޫ އަރާފައިވާ ކަމަށާއި، މިހާރުވެސް އެކަން ތަކުރާރުވަމުންދާކަމަށެވެ. އެހެންނަމަވެސް، ދެޤައުމުގެ ގުޅުން ނުކެނޑޭކަމަށާ، އަދި ގުޅުން ނުވެސް ކެނޑުވެނޭކަމަށް ސުޝްމާ ސުވަރާޖް ވިދާޅުވިއެވެ.
"ރާއްޖެއަކީ އިންޑިއާގެ އަވައްޓެރި ޤައުމެއް. "ފުރަތަމަ އިންޑިއާ" އަކީ ރާއްޖޭގެ ޚާރިޖީ ސިޔާސަތުގެ ބައެއް. ކޮންމެ ސަރުކާރަކުން އިންޑިއާގައި ވެރިކަން ކުރިނަމަވެސް، ދޭދޭ ގުޅުމަށް އަޑިގުޑަން އަންނާނެ. މާޒީގައި އެކަން ތަޖުރިބާކުރިން. އަދި މިހާރުވެސް އެކަން އެބަދިމާވޭ. އެކަމަކު ރާއްޖެއާ އޮންނަ ގުޅުމެއް ނުއެއް ކެނޑޭނެ، އަދި ކަނޑުވައެއްވެސް ނުލެވޭނެ."
ސުޝްމާ ސުވަރާޖް ވިދާޅުވިއެވެ.
ޝުޝްމާ ސުވަރާޖް ވިދާޅުވީ އިންޑިއާގެ ދައުރަކީ ރާއްޖެ އަށް ލަފާ ދީ އިންސާނީ އެހީތެރިކަން ފޯރުކޮށްދިނުން ކަމަށެވެ. އެގޮތުން ރައްޖޭގައި އެންމެފަހުން ތަންފީޒް ކުރި 45 ދުވަހުގެ ކުއްލި ޙާލަތުގެ ދުވަސްވަރު ރާއްޖެއަށް އިންޑިއާއިން އިރުޝާދު ދިން ކަމަށް އޭނާ ވިދާޅުވިއެވެ. އޭނާ ވިދާޅުވީ، ބައެއް ޙާލަތްތަކުގައި ދެޤައުމުގެ ގުޅުމަށް ހީނަރުކަން އައިނަމަވެސް، އިންޑިއާއިން ރާއްޖެއަށްދޭ އިންސާނީ އެހީ ކަނޑާނުލާނެކަމަށެވެ.