ކެރިއަރުގައި ކާމިޔާބުކުރެވުނު ޗެމްޕިއަންސްލީގުގެ 4 ވަނަ ޓްރޮފީ ވަރަށް ޚާއްޞަކަމަށް ޖަރުމަނުގެ މިޑްފީލްޑަރ ޓޯނީ ކްރޫޒް ބުނެފިއެވެ.
ލިވަޕޫލް ބަލިކޮށް ހޯދި ޓްރޮފީއަށް އިޝާރާތްކޮށް އޭނާ ބުނީ އެންމެ މޮޅު ކުޅުންތެރިންނާއެކު ތާރީޚުން ޖާގަ ލިބުމަކީ ބޮޑު އުފަލެއްކަމަށެވެ. ކްރޫޒް އެންމެ ފުރަތަމަ ޗެމްޕިއަންސްލީގު ކާމިޔާބުކުރީ 2013 ވަނަ އަހަރު ބަޔާންމިޔުނިކާއެކުއެވެ. އޭގެފަހުން ރެއާލްއަށް ބަދަލުވެ، ފާއިތުވި ތިން ސީޒަންގައި އެމުބާރާތް ރެއާލް ކާމިޔާބުކުރިއިރު މެދުތެރޭގައި ކްރޫޒް މުޙިއްމު ދައުރެއް އަދާކުރިއެވެ. ކްރޫޒް ބުނީ މިފަހަރުވެސް ރެއާލްއަށް ލިބުނީ ހައްޤު ކާމިޔާބީއެއްކަމަށެވެ.
މުޅި މެޗަށް ބަލާއިރުވެސް އެންމެ ޤަބޫލުކުރަން ދަތި ވަގުތަކީ ގެރެތް ބޭލް މެޗުގައި ޖެހި ރެއާލްގެ ދެވަނަ ގޯލެވެ. ކްރޫޒް ބުނީ އެގޯލާއެކު މުޅި ގޭމް ބަދަލުވެގެންދިޔަކަމަށެވެ. އެއީ ޤަބޫލުކުރަން ދަތި ގޯލެއްކަމަށް ޖަރުމަނާއެކު ވަރލްޑްކަޕް ދިފާއުކުރަން ތައްޔާރަށް ހުރި މިޑްފީލްޑަރު ބުންޏެވެ.
" އެއީ ހަމައެކަނި ޤަބޫލުކުރަން ދަތި ރީތި ގޯލެއް ނޫން. އެއީ ޤަބޫލުކުރަން ދަތި އެވަގުތަށް ވަރަށް މުޙިއްމު ގޯލެއް. އެއީ ގޭމް ރެއާލް ކޮޅަށް ބަދަލުވި ލަނޑު. ޗެމްޕިއަންސްލީގު ފައިނަލެއްގައި، އެފަދަ ވަގުތެއްގައި އެގޯލަކީ ސެލިއުޓް ހައްޤު ގޯލެއް " ބޭލްއަށް ތައުރީފް ކުރަމުން ކްރޫޒް ބުންޏެވެ.
ޖަރުމަންގެ ވަރލްޑްކަޕް ސްކޮޑާ ގުޅުމުގެ ކުރިން ފުޓްބޯޅައާއި ދުރުގައި، ފުޓްބޯޅައާމެދު ނުވިސްނާ އަރާމްކުރަން ދެތިން ދުވަހެއް ހޭދަކުރާނެކަމަށް ކްރޫޒް ބުންޏެވެ.