އިސްރާފުވުމާއި ކުނިބުނި އިތުރުވުމަކީ ޗައިނާއިން ކުރިމަތިލާންޖެހޭ ބޮޑު މައްސަލައެއް- ރައީސް ޝީ
އިސްރާފުކުރުމާއި ކުނިބުނި އިތުރުވުމުގެ މައްސަލައާ ޗައިނާއިން ކުރިމަތިލާން ޖެހޭ ކަމަށާއި، މި ކަމުގައި ގިނަ މަސައްކަތްތަކެއް ކުރަންޖެހޭކަމަށް ޗައިނާގެ ރައީސް ޝީ ޖިންޕިންގް ވިދާޅުވެއްޖެއެވެ.
ވައި ތަޣައްޔަރުވުމުގެ މައްސަލައިގައި ޗައިނާއިން އެކަށީގެންވާ މަސައްކަތްތަކެއް ކޮށްފައިވާ ނަމަވެސް މިކަމުގައި އަދިވެސް އިތުރު ފިޔަވަޅުތައް އަޅަންޖެހޭ ކަމަށް، ޗައިނާގެ ޝަންހާއީގައި ބޭއްވި ބައްދަލުވުމެއްގައި ވާހަކަދައްކަވަމުން އެ ޤައުމުގެ ރައީސް ޝީ ޖިންޕިން ވިދާޅުވިއެވެ. މި ގޮތުން 2035 ވަނަ އަހަރާ ހަމައަށް ޗައިނާގެ ތިމާވެއްޓާއި ޤުދުރަތީ ވަޞީލަތްތަކަކީ ރައްކާކުރެވިި އަދި އިޔާދަކުރަނިވި ނިޒާމެއްގެ ދަށުން ވިލަރެސްކުރެވޭ ތަންތަނަށް ހެދެން ޖެހޭ ކަމަށާއި، މިއާއެކު ރީތި ޗައިނާއެއް އުފެއްދުމަށް އެ ޤައުމުގެ ރައްޔިތުން ދެކެމުން އަންނަ ހުވަފެން ހަޤީޤަތަކަށްވާނެކަމަށް ޗައިނާގެ ރައީސް ވިދާޅުވިއެވެ.
ޝި ވިދާޅުވީ، ޗައިނާއިން މިހާރު އޮތީ ތިމާވެށި ހިމާޔަތްކުރުމަށް މުހިއްމު މަސައްކަތްތަކެއް ކުރަންޖެހޭ ހިސާބަކަށް އައިސްފައިވާ ކަމަށާއި، އެ ޤައުމުގެ ރައްޔިތުން ބޭނުން ވަނީ މި ރޮނގުން ޗައިނާއިން އިތުރު ފިޔަވަޅުތައް އެޅުމަށްކަމަށެވެ.
1978 ވަނަ އަހަރުން ފެށިގެން ޗައިނާގެ އިޤުތިޞާދަށް އައި ކުރިއެރުމާއެކު އެ ޤައުމުގެ ތިމާވެއްޓަށް ލިބެމުން ދިޔަ ގެއްލުންތައް ހުއްޓުވުމަށް ޗައިނާއިން މަސައްކަތްތައް ފަށާފައިވަނީ 2014 ވަނަ އަހަރެވެ. އެއަށް ފަހު، ފެހި ވެއްޓެއް ޤާއިމުކުރުމަށް އެ ޤައުމުން ވަނީ ގިނަ ފިޔަވަޅުތަކެއް އަޅާފައެވެ.