ރާއްޖޭގައި ބާއްވާ ބައިނަލްއަޤްވަމީ ޤުރުއާން މުބާރާތުގެ ސަބަބުން ރާއްޖޭގައި ޤުރުއާން ކިޔެވަން މޮޅު މީހުން އުފެއްދުމަށް، ވަރަށް ބޮޑު ބާރަކަށް ވާނެކަމަށް ޕީއެސްއެމްގެ ޑެޕިއުޓީ މެނޭޖިންގ ޑިރެކްޓަރ މުޙައްމަދު އިކްރާމް ޢަބްދުއްލަޠީފް ވިދާޅުވެއްޖެއެވެ.
ރާއްޖޭގައި ބާއްވާ އެންމެ ފުރަތަމަ ބައިނަލްއަޤްވާމީ ޤުރުއާން މުބާރާތް "އައްނޫރުލް މުބީން" އިފްތިތާޙްކުރުމަށް ބޭއްވި ރަސްމިއްޔާތުގައި އިކްރާމް ވިދާޅުވީ، ދުނިޔޭގެ އެކި ޤައުމުތަކަކުން ގިނަ ޢަދަދެއްގެ ބައިވެރިންނާއެކު، މެދުކެނޑުމެއްނެތި މިމުބާރާތް ކުރިއަށް ގެންދިއުމަކީ އަމާޒެއްކަމަށެވެ.
ރާއްޖޭގެ ތާރީޚުގައި ބާއްވާ ފުރަތަމަ ބައިނަލްއަޤްވާމީ ޤުރުއާން މުބާރާތް އިފްތިތާޙްކުރުމަށް ބޭއްވި ރަސްމިއްޔާތުގައި ޕަބްލިކް ސާރވިސް މީޑިއާގެ ޑެޕިއުޓީ މެނޭޖިންގ ޑިރެކްޓަރ މުޙައްމަދު އިކްރާމް ޢަބްދުއްލަޠީފް ވިދާޅުވީ، ބައިނަލްއަޤްވާމީ ޤުރުއާން މުބާރާތެއް ރާއްޖޭގައި ބޭއްވުމުގެ ޚިޔާލުފުޅަކީ ޕީއެސްއެމް އުފެދުމާއެކު ރައީސުލްޖުމްހޫރިއްޔާ ދެއްވާފައިވާ ޚިޔާލުފުޅެއްކަމަށެވެ.
މީގެ ދެއަހަރު ކުރިން މުބާރާތަށް ނަންދެއްވައި އެކަން ރައީސުލްޖުމްހޫރިއްޔާ ޕީއެސްއެމަށް އަންގަވާފައިވާކަމަށްވެސް އިކްރާމް ވިދާޅުވިއެވެ. ބައިބަލްއަޤްވާމީ މިފަދަ ބޮޑު މުބާރާތެއް ރާއްޖޭގައި ބާއްވާއިރު، އެކަމަށް ވާންޖެހޭ ވަރަށް ބޮޑެތި ތައްޔާރީތައްވެފައިވާކަން ފާހަގަކުރައްވަމުން އިކްރާމް ވިދާޅުވީ، މުބާރާތް ހިންގާނެ އުސޫލާއި، ޤަވާއިދު ލިޔެ އެކަށައަޅާފައިވާކަމަށެވެ.
މިފަދަ ބައިނަލްއަޤްވަމީ މުބާރާތެއްގެ ސަބަބުން ރާއްޖޭގައި މޮޅު ޤުރުއާން ކިޔެވުންތެރިން އުފެއްދުމަށްޓަކައި ވަރަށް ބޮޑު ބާރަކާއި ހިތްވަރަކަށް ވާނެކަމަށްވެސް އިކްރާމް ވިދާޅުވިއެވެ. އިކްރާމްގެ ވާހަކަފުޅުގައި މިއަހަރު މިފެށި ބައިނަލްއަޤްވާމީ ޤުރުއާން މުބާރާތް ކޮންމެ އަހަރަކު މެދުކެނޑުމެއްނެތި ރާއްޖޭގައި ކުރިއަށް ގެންދިއުމަކީ ޕީއެސްއެމްގެ އަމާޒެއްކަމުގައި ވިދާޅުވިއެވެ. މިއަހަރު 9 ޤައުމުން މިމުބާރާތުގައި ބައިވެރިވިނަމަވެސް އަންނަ އަހަރުން ފެށިގެން މިއަށްވުރެ ގިނަ ޤައުމުތަކަކުން މިމުބާރާތުގައި މީހުން ބައިވެރިކުރުމަށް މަސައްކަތްކުރައްވާނެކަމަށްވެސް އިކްރަމް ވިދާޅުވިއެވެ.
"އައްނޫރުލް މުބީންގެ ނަން ދެއްވާފައި ޕަބްލިކް ސާރވިސް މީޑިއާއަށް އެ ސިޓީ އެމަނިކުފާނު ފޮނުވާފައި އޮންނަތާ ދެ އަހަރުވެއްޖެ. އައް ނޫރުލް މުބީންގެ ނަމުގައި އިންޓަރނޭޝަނަލް ޤުރުއާން މުބާރާތެއް ޕީއެސްއެމުން ކަމާބެހޭ ހުރިހާ ފަރާތްތަކާ ވާހަކަ ދައްކައިގެން ގުޅިގެން ބާއްވައިދޭށޭ. އާދެ މިބާވަތުގެ ކަމެއް ކުރުމަކީ ވަރަށް އޭގައި ފަންނީ ގޮތުންވެސް ޢިލްމީ ގޮތުންވެސް އަދި އިންތިޒާމްތަކާއި އިދާރީ ގޮތުންވެސް ވަރަށް ގިން ތަޖުރިބާއާއި، ވަރަށް ގިނަ މަސައްކަތްތައް ބޭނުންވާކަމެއް. އެހެންކަމުން ޕީއެސްއެމްގައި މިކަމުގައި ނެތް ތަޖުރިބާ އަޅުގަނޑުމެން ހޯދަންޖެހުނީ އެހެން ދިމާތަކުން."
އިކްރާމް ވިދާޅުވިއެވެ.
އިކްރާމްގެ ވާހަކަފުޅުގައި ވަނީ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ ރިޔާސީ ދައުރުގައި ކީރިތި ޤުރުއާނަށް ދެއްވާ ސަމާލުކަމާއި، ދީނީ ޢިލްމު ރާއްޖޭގައި ފެތުރުމަށް ދެއްވާ ޚާއްޞަ ސަމާލުކަމުގެ މައްޗަށް ވަރަށް ތަފްސީލްކޮށް ބައްލަވާލައްވާފައެވެ. އެގޮތުން ބައިނަލްއަޤްވާމީ ޤުރުއާން މުބާރާތެއް ބޭއްވުމަކީ، ރާއްޖޭގެ ތާރީޚުގައި މީގެ ކުރިން ދުވަހަކުވެސް ވެފައިވާކަމެއް ނޫންކަމަށާ، ރާއްޖޭގެ ތަޢުލީމީ މުޤައްރަރު ތެރޭގައި މަޖުބޫރު މާއްދާއެއްގެ ގޮތުގައި ކީރިތި ޤުރްއާން ހަމަޖެއްސެވިކަން އިކްރާމް ފާހަގަކުރެއްވިއެވެ. އަދި ޕްރައިމަރީ ނިންމާއިރު ކޮންމެ ދަރިވަރަކު ސްކޫލް ނިޒާމްގެ ތެރެއިން ޤުރުއާން ޚަތިމްކޮށްފައިވާ ދަރިވަރަކަށް ހެއްދެވުމަކީވެސް ރައީސް މިފަދަ ކަންކަމަށް އިސްކަންދެއްވާ މިންވަރާއި، ޤުރުއާން ހިތުދަސްކުރުމަށް ދަރިވަރުންނަށް ބާރުއަޅުއްވާ މިންވަރު ހާމަވާކަމެއްކަން އިކްރާމް ފާހަގަކުރެއްވިއެވެ.
އަދި ޤުރުޢަނުގެ ކޮންމެ ފޮތެއް ދަސްކުރާ ކުއްޖަކަށް ސަރުކާރުން މިހާރު ހަދިޔާ ދެއްވަމުން އަންކަމާއި، ޤުރުއާން ހިތުދަސްކޮށް ހާފިޒަކަށް ވުމުން އެކަމުގެ ޝަރަފް ރާއްޖޭގައި ބޭއްވޭ އެންމެ ބޮޑު ޝަރަފްވެރި ހަފްލާގައި ދެއްވާކަންވެސް އިކްރާމްގެ ވާހަކަފުޅުގައި ފާހަގަކުރެއްވިއެވެ. ރާއްޖޭގައި ބާއްވާ އެންމެ ފުރަތަމަ ބައިނަލްއަޤްވާމީ ޤުރުއާން މުބާރާތަކުގައި އިސްލާމީ 9 ޤައުމަކުން ޤުރުއާން ކިޔަވާ އެންމެ މޮޅު ކުދިން މި މުބާރާތުގައި ބައިވެރިކޮށްފައިވާކަން އިކްރާމް ފާހަގަކުރެއްވިއެވެ.
"މި ޤައުމުތަކުގެ ޢަދަދަށް ވިސްނާލާއިރު މިއީ ގާތްގަނޑަކަށް 400 މިލިއަނށްވުރެ ގިނަ މުސްލިމުން ، މިކުދިންމި ތަމްސީލްކުރަނީ މިއީ އަޅުގަނޑުމެން އުފާކުރަންޖެހޭކަމެއް. 400 މިލިއަނަށްވުރެ ގިނަ މުސްލިމުން މިތަނުގައި މި ތަމްސީލްކުރަނީ މިކުދިން އެ ހުރިހާ މީހުންގެތެރއިން ﷲގެ ކަލާމްފުޅު ކިޔަވާ އެންމެ މޮޅު ކުދިންނަށްވެގެން މިއަދު މިތަނަށް އައިސްމިތިބީ. އެހެންވެ މިކުދިން މިތަނަށް އައިސް ރާއްޖޭގެ ރައީސްގެ ދައުވަތަށް ބައިވެރިވާ ބައިވެރިވުމަކީ މުޅި ދުނިޔޭގައި ޚާއްޞަކޮށް އިސްލާމީ ޤައުމުތަކުގެ ތެރޭގައި ރާއްޖެއަށް ލިބިގެންދާނެ ވަރަށް ބޮޑު ޝުހުރަތެއް. ވަރަށްބޮޑު ކުރިއެރުމެއް. ވަރަށް ބޮޑު ޤަދަރެއް. ވަރަށް ބޮޑު ހައިބަތެއް. އެކަމަށް ރައީސް ޢަބްދުﷲ ޔާމީން މި ކޮށްދެއްވީ ރައްޔިތުންނަށްޓަކައި ވަރަށް ހެޔޮ ބަރަކާތްތެރި ކަމެއް."
އިކްރާމް ވިދާޅުވިއެވެ.
ރައީސުލްޖުމްހޫރިއްޔާގެ ވިސްނުންފުޅަކީ ޢިލްމީ، ދީނީ މުބާރާތްތަކުގައިވެސް ބައިނަލްއަޤްވާމީ ފެންވަރުގައި ރާއްޖެ ބައިވެރިވެ ކާމިޔާބު ހޯދުންކަން އިކްރާމް ފާހަގަކުރެއްވިއެވެ. އަދި ބޭރު ޤައުމުތަކުން ކުދިންގެނެސް ދިވެހި ފަސްގަނޑުގައި ދިވެހި ކުދިންނާ ވާދަކުރުމަކީ ރާއްޖެއަށް ލިބޭނެ ކުރިއެރުމެއްކަމަށް އިކްރަމް ފާހަގަކުރެއްވިއެވެ.