ސައުދީ ޢަރަބިއްޔާގެ އެކި މުވައްސަސާތަކުގައި ހިންގާ މާލީ އަދި އިދާރީ ކޮރަޕްޝަންގެ ޢަމަލުތައް ރިޕޯޓްކުރާ މުވައްޒަފުން ހިމާޔަތްކުރުމަށް ސައުދީގެ ރަސްގެފާނު ސަލްމާން ބިން ޢަބްދުލް ޢަޒީޒް ގޮވާލައްވައިފިއެވެ. ސައުދީ ޢަރަބިއްޔާގެ ދައުލަތުން ހިންގާ ޢަލް ޢަރަބިއްޔާ ޓީވީން ބުނެފައިވަނީ ރަސްގެފާނު ވަނީ، މިކަމާ ގުޅޭ ޝާޙީ ޢަމުރެއް ނެރުއްވާފައި ކަމަށެވެ.
މި ޢަމުރުގައި ސައުދީ ރަސްގެފާނު ވަނީ، އެ ފަދަ މައްސަލަތަކުގައި ކަމާބެހޭ ފަރާތްތަކާ މަޢުލޫމާތު ހިއްސާކުރާ ފަރާތްތަކަށް އެކަށީގެންވާ ހިމާޔަތްދީ، އެ ފަދަ ފަރާތްތަކަށް ލިބިފައިވާ ހައްޤުތަކުން މަހްރޫމުވިޔަ ނުދިނުމަށް އެފަދަ ފަރާތްތައް ރައްކާތެރި ކުރުމަށް ގޮވާލައްވާފައެވެ. މި ޢަމުރާ ބެހޭގޮތުން ސައުދީގެ ޢަލް ޢަރަބިއްޔާ ޓީވީން އިތުރު ތަފްސީލެއް ދީފައެއް ނުވެއެވެ.
ސައުދީ ޢަރަބިޔާގެ ސަރުކާރުން މިހާރު ދަނީ، އެ ޤައުމުގައި ހިންގާ ކޮރަޕްޝަންގެ ޢަމަލުތަކާ ދެކޮޅަށް ހަރުކަށި ފިޔަވަޅުތައް އަޅަމުންނެވެ. މި ގޮތުން ހުސްވި އަހަރު، އެ ޤައުމުގެ ޝާހީ ޢާއިލާގެ ޢަމީރުންނާ، ކުރީގެ އަދި މިހާރުގެ ސަރުކާރަށް ނިސްބަތްވާ ގިނަ ވަޒީރުންގެ އިތުރުން ސައުދީ ޢަރަބިޔާގެ ނަންމަޝްހޫރު ވިޔަފާރިވެރިންވެސް ވަނީ ހައްޔަރުކޮށްފައެވެ. މި ފަރާތްތައް މިނިވަންކޮށްފައިވަނީ ޙިޔާނާތްތެރިވެފައިވާ ފައިސާއަށް ބަދަލު ދިނުމުންނެވެ.
މި ގޮތަށް ސައުދީ ސަރުކާރުން ވަނީ، ކޮރަޕްޝަނުގެ ޢަމަލުތަކުގެ ސަބަބުން ދަޢުލަތަށް ގެއްލިފައިވާ ގޮތުން 100 ބިލިއަން ޑޮލަރު އަނބުރާ ހޯދާފައެވެ.