ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ އަނބިކަނބަލުން ފާތުމަތު އިބްރާހިމް ފަށްޓަވާފައިވާ އެންމެ ގާތުން ކެމްޕެއިންގެ ދަށުން ފުވައްމުލައް ސިޓީއަށް ކުރެއްވި ދަތުރުފުޅު ނިންމަވާލައްވައިފިއެވެ. އެކަމަނާގެ މިދަރުފުޅުގައި ވަނީ އެ ސިޓީގެ ހުރިހާ އަވަށްތަކަށް ވަޑައިގެންފައެވެ.
ރައީސުލްޖުމްހޫރިއްޔާގެ އަނބިކަނބަލުން ފާތުމަތު އިބްރާހިމް ފައްޓަވާފައިވާ އެންމެ ގާތުން ކެމްޕެއިންގެ ދަށުން ފުވައްމުލައް ސިޓީއަށް ކުރެއްވި ހަތަރު ދުވަހުގެ ދަތުރުފުޅުގައި، އެ ސިޓީން ވަނީ އެކަމަނާއަށް ވަރަށް ހޫނު މަރުހަބާއެއް ދަންނަވާފައެވެ.
އެކަމަނާގެ މި ދަތުރުފުޅުގައި ވަނީ ފުވައްމުލައް ސިޓީގެ ހުރިހާ އަވަށްތަކަށް ވަޑައިގެން ޚާއްޞަ އެހީއަށް ބޭނުންވާ ފަރާތްތަކާއި، އިސްރަށްވެހިންނާއި، ކަނބަލުން އަދި މުއައްސަސާތަކުގެ މުވައްޒަފުންނާއި، ސަރުކާރަށް ތާޢީދުކުރާ ގިނަ ފަރާތްތަކަކާ ބައްދަލުކުރައްވާފައެވެ. އަދި އެފަރާތްތަކަށް ދިމާވެފައިވާ ދަތިތައް އޮޅުންފިލުއްވާފައިވޭ. އަދި އެކަންކަން ހައްލުކޮށްދެއްވާނެކަމުގެ ޔަޤީންކަންވެސް އެކަމަނާ ވަނީ ދެއްވާފައެވެ.
ރައީސުލްޖުމްހޫރިއްޔާގެ އަނބިކަނބަލުން ފުވައްމުލަކަށް ވަޑައިގަތުމުން ކުދިބޮޑު ހުރިހާ އުމުރުފުރާއެއް ހިމެނޭހެން 2000 އަށްވުރެ ގިނަ މީހުން އެކަމަނާއަށް މަރުޙަބާ ކިޔުމަށް ފުވައްމުލައް އެއަރޕޯޓް ސަރަޙައްދަށް ނުކުމެފައިވެއެވެ. އެކަމަނާވަނީ އެ ސަރަޙައްދަށް ޖަމާވި އާއްމުންނާ ބައްދަލުކުރައްވާ އެފަރާތްތަކާއި ސަލާމްކުރައްވާފައެވެ. އަދި ރައްޔިތުން ބޭނުންވާ ކަންކަން ސާފުކުރައްވާ އެހީއަށް ބޭނުންވާ ފަރާތްތަކުގެ މަޢުލޫމާތުވެސް ވަނީ ސާފުކުރައްވާފައެވެ.
މީގެއިތުރުން، ހުކުރުދުވަހު ފުވައްމުލައް ސިޓީގައި "އަފުން ރައީސް ޔާމީން އާ އެއްކޮހޮ" މި ނަމުގައި ޕީ.ޕީ.އެމުން ބޭއްވި ޚާއްޞަ ޖަލްސާގައިވެސް އެކަމަނާ ބައިވެރިވެވަޑައިގެން ވާހަކަފުޅު ދައްކަވާފައިވެއެވެ. އަދި އެކަމަނާ ވަނީ ހޯދަޑުގައި އަލަށް ހެދި ޕީޕީއެމްގެ ޖަގަހަވެސް ހުޅުއްވާދެއްވާފައެވެ.
އެންމެ ގާތުން ކެމްޕެއިނަކީ ރައީސުލްޖުމްހޫރިއްޔާގެ އަނބިކަނބަލުން ފާތިމަތު އިބްރާހީމްގެ އިސްނެންގެވުމުގެ މަތިން 2017 ވަނަ އަހަރު ފަށްޓަވާފައިވާ ކެމްޕެއިނެކެވެ. މިއީ ޚާއްސަ އެހީއަށް ބޭނުންވާ ކުދިންނާއި މީހުންގެ އިތުރުން ޢުމުރުން ދުވަސްވީ މީހުންނާއި، އަންހެނުންގެ ދާއިރާއިން ދިމާވެފައިވާ މައްސަލަތައް ގާތުން ބައްލަވައި އެކަންކަން ޙައްލުކުރެއްވުމަށް ހިންގަވާ ކެމްޕެއިނެކެވެ. މި ކެމްޕެއިންގެ ދަށުން އެކަމަނާ ވަނީ ދާދިފަހުން ތ. އަތޮޅުގެ ބައެއް ރަށްތަކަށްވެސް ޒިޔާރާތްކުރައްވާފައެވެ.
ރައީސްގެ އަނބިކަނބަލުންގެ ދަތުރުފުޅުގައި ރައްޔިތުންގެ މަޖިލީހުގެ ރައީސްއާއި ދައުލަތުގެ ބައެއް ވަޒީރުންނާއި ރައްޔިތުންގެ މަޖިލީހުގެ ގިނަ ޢަދަދެއްގެ މެންބަރުން ބައިވެރިވެވަޑައިގެންނެވިއެވެ.