އެކުވެރި އަރަބި އިމާރާތް ޔޫއޭއީން ރާއްޖޭގައި ޤާއިމްކުރާ އެމްބަސީގެ ޢަމަލީ މަސައްކަތް ކުރަމުންދާކަމަށް ޔޫއޭއީގައި ހުންނަވާ ދިވެހި ސަފީރު ޑރ. ޙުސައިން ނިޔާޒް ވިދާޅުވެއްޖެއެވެ. އެނާ ވިދާޅުވީ މިހާރު ކުރަމުންދަނީ ޔޫއޭއީން ރާއްޖެއަށް ކަނޑައަޅާ ސަފީރަކު އައްޔަންކުރުމާއި ތަނަށް ބޭނުންވާ މުވައްޒަފުން ހޯދުމުގެ މަސައްކަތްކަމަށެވެ.
އެކުވެރި ޢަރަބި އިމާރާތުގެ އެމްބަސީއެއް ރާއްޖޭގައި ޤާއިމްކުރުމަށް އެޤައުމުގެ ސަރުކާރުން ނިންމާފައިވަނީ މިމަހުގެ އަށްވަނަ ދުވަހުއެވެ. މިހާތަނަށް ޔޫއޭއީން ރާއްޖެއަށް ކަނޑައަޅާފައި ހުންނަ އެމްބަސީ ހުންނަނީ ސްރީލަންކާގެ ކޮލަމްބޯގައެވެ. ޔޫއޭއީގެ އެމްބަސީއެއް ރާއްޖޭގައި ޤާއިމްކުރުމަށް އެޤައުމުގެ ސަރުކާރުން ނިންމި ނިންމުމާ ގުޅޭގޮތުން ޕީއެސްއެމް ނިއުސްއަށް ދެއްވި ފޯން އިންޓަރވިއުއެއްގައި ޔޫއޭއީގައި ހުންނަވާ ދިވެހި ސަފީރު ޑރ .ޙުސައިން ނިޔާޒް ވިދާޅުވީ، ކޮލޮމްބޯގައި ހުންނަ އެމްބަސީ މެދުވެރިކޮށް ރާއްޖޭގައި ޔޫއޭއީގެ އެމްބަސީއެއް ޤާއިމްކުރަން ބޭނުންވާކަން އެ ޤައުމުން ދިވެހި ސަރުކާރަށް އަންގާފައިވަނީ މިއަހަރުގެ ޖެނުއަރީ 15 ވަނަ ދުވަހުކަމަށް. ހަމަ އެމަހު ދިވެހި ސަރުކާރުންވެސް އެކަމަށް ރުހުންދީފައިވާކަމަށް ސަފީރު ވިދާޅުވިއެވެ.
ސަފީރު ވިދާޅުވީ މިހާރު ކުރިއަށްދަނީ ރާއްޖޭގައި އެޤައުމުގެ އެމްބަސީ ޤާއިމްކުރާނެ ތަނަކާއި، އެތަނަށް ފަސް މުވައްޒަފުން ހޯދުމާއި، ސަފީރެއް ކަނޑައެޅުމުގެ މަސައްކަތްތައްކަމަށެވެ. ނަމަވެސް އެމްބަސީ ޤާއިމް ކުރާނެ ތާރީޚެއް އެ ޤައުމުން މިހާތަނަށް ކަނޑައަޅާފައިނުވާކަމަށް ސަފީރު ވިދާޅުވިއެވެ. ޑރ. ނިޔާޒް ވިދާޅުވީ ރާއްޖޭގައި އެމްބަސީއެއް ޤާއިމުކުރުމަށް ޔޫއޭއީން ނިންމީ ރާއްޖެއަކީ އިންވެސްޓުކުރުމަށް އިންވެސްޓަރުންނަށް ޔަޤީންކަން އޮތް ޤައުމަކަށް ޔޫޢޭއީ ސަރުކާރަށް ޤަބޫލްކުރެވޭތީކަމަށެވެ.
"ރާއްޖޭގައި ޔޫއޭއީ އެމްބަސީއެއް ހުޅުވުމަށް ނިންމި މައިގަނޑު އެއްސަބަބަކީ އެކަމުން ދެ ޤައުމަށްވެސް ފައިދާކުރާނެ ވަރަށް ގިނަ ކަންތައްތަކެއް ހުރުމުން. އެގޮތުން އިންވެސްޓަރސް ކޮންފިޑެންސް އޮތުމުންނާ އެނޫންވެސް އެކަމާ ގުޅިގެން ބައިވަރު ވަރަށް ގިނަ ފަސޭހަ އަދި ފައިދާތަކެއް ވާނެތީ. އެއް ގައުމަކުން އަނެއް ގައުމެއްގައި ރެސިޑެންޓް އެމްބަސީއެއް ހުޅުވުމަކީ ވަރަށް ފާހަގަކޮށްލެވޭކަމެއް. ފާހަގަކުރަންވެސްވާނެކަމެއް. އެއީ ބައިވަރު ޚަރަދުތަކެއް ކޮށްގެން ވަރަށް ގިނަ މެސެޖުތަކެއް އެއިން އެދެވެނީ. " ސަފީރު ވިދާޅުވިއެވެ.
ރާއްޖޭގައި ޔޫއޭއީގެ އެމްބަސީއެއް ޤާއިމުކުރަން އެޤައުމުގެ ސަރުކާރުން ނިންމާފައިވާއިރު، ރާއްޖޭގެ އެމްބަސީއެއް ޔޫއޭއީގައި ޤާއިމްކޮށްފައިވަނީ 2012 ވަނަ އަހަރުގެ ތެރޭގައެވެ. މެދުއިރުމަތީގެ ޤައުމުތަކުގެ ތެރެއިން ރާއްޖެއަށް އެންމެ ގިނައިން އެހީދޭ އަދި އެންމެ ގާތް ދެ ޤައުމަކީ ސައުދިއަރަބިޔާއާއި ޔޫއޭއީއެވެ. ދިވެހިރާއްޖެއާއި އެކުވެރި އަރަބި އިމާރާތާއި ޑިޕްލޮމެޓިކް ގުޅުން ޤާއިމްކޮށްފައިވަނީ 15 މާރޗް 1978 ވަނަ އަހަރުއެވެ.