ދޫމާގައި ދިނީ ކެމިކަލް ހަމަލާއެއްކަމުގައިވާނަމަ އެކަމާ ދެކޮޅަށް ފިޔަވަޅު އަޅަންޖެހޭ- އެމެރިކާ
ސޫރިޔާގެ އިރުމަތީ ޣޫޠާގެ ރަށެއް ކަމަށްވާ ދޫމާގައި އެ ޤައުމުގެ އަސްކަރިއްޔާއިން ކެމިކަލް ހަމަލާއެއް ދިންކަމަށް ބުނާ ރިޕޯޓްތައް ކަށަވަރުވެއްޖެނަމަ، ބައިނަލްއަޤުވާމީ ދުނިޔެއިން ސޫރިޔާގެ ސަރުކާރާ ދެކޮޅަށް މިހާރުން މިހާރަށް ފިޔަވަޅު އަޅަން ޖެހޭނެކަމަށް އެމެރިކާއިން ބުނެފިއެވެ.
އެ ސަރަހައްދުގައި ސިއްޙީ ފަރުވާދިނުމަށް ހަރަކާތްތެރިވާ ފަރާތްތަކުން ބުނެފައިވަނީ މި ހަމަލާގައި މަރުވި މީހުންގެ ޢަދަދު މި ވަގުތު ހަތްދިހައިގައި ވާނަމަވެސް، މި ޢަދަދު އިތުރުވުން އެކަށީގެންވާކަމަށެވެ. އަދި އެ ފަރާތްތަކުން ވަނީ، މި ހަމަލާތަކުގައި މަރުވި މީހުންގެ ފޮޓޯތަކާ މަންޒަރު ޓުވީޓްކޮށްފައެވެ.
އެ ސަރަހައްދުގައި ސޫރިޔާގެ އަސްކަރިއްޔާއާ ދެކޮޅަށް ހަނގުރާމަކުރަމުންދާ ޖަމާޢަތަކުންވެސް ވަނީ މިފަދަ ހަމަލާތަކެއް ދިންކަމަށް ރިޕޯޓްކޮށްފައެވެ. އެހެންނަމަވެސް ސޫރިޔާގެ ސަރުކާރުން އެ ތުހުމަތުތައް ދޮގުކުރެއެވެ.
މިކަމާ ބެހޭގޮތުން ނޫސްވެރިންނާ ވާހަކަދައްކަވަމުން އެމެރިކާގެ ޚާރިޖީ ވުޒާރާގެ ތަރުޖަމާނު ހެދަރ ނައުއާޓް ވިދާޅުވީ، ސޫރިޔާގެ ދޫމާއަށް ކެމިކަލް ހަމަލާއެއް ދިންކަމަށް ބުނާ ރިޕޯޓްތައް ކަށަވަރުވެއްޖެނަމަ، ބައިނަލްއަޤްވާމީ ދުނިޔެއިން މިހާރުން މިހާރަށް އެކަމާ ދެކޮޅަށް ފިޔަވަޅު އަޅަން ޖެހޭނެކަމަށެވެ.
ސޫރިޔާގެ ރައީސް ބައްޝާރުލް އަސަދުގެ ސަރުކާރަކީ މީގެކުރިން ވެސް އެ ޤައުމުގެ ޢާއްމުންނާ ދެކޮޅަށް ކެމިކަލް ހަތިޔާރު ބޭނުންކޮށްފައިވާ ސަރުކާރެއް ކަމަށް ތުހުމަތުކުރައްވާ ނައުއާޓް ވަނީ އެ މައްސަލައިގައި އަސަދުގެ ސަރުކާރާއި ރަޝިޔާ ޖަވާބުދާރީކުރުވަން ޖެހޭކަމަށް ވިދާޅުވެފައެވެ. އަދި ކުރިއަށް އޮތްތަނުގައިވެސް މިފަދަ ހަމަލާތައް ހުއްޓުވަން ޖެހޭކަމަށް އޭނާ ވިދާޅުވިއެވެ.