މިއަހަރު އޮންނަ ރިޔާސީ އިންތިޚާބުގައި ވޯޓުލެވޭ މީހުންގެ ލިސްޓު އަންނަ މަހު އިޢުލާންކޮށް، ޝަކުވާ ހުށައެޅުމުގެ ފުރުޞަތު ހުޅުވާލާނެކަމަށް އިލެކްޝަންސް ކޮމިޝަނުން ބުނެފިއެވެ.
އިލެކްޝަންސް ކޮމިޝަނުން ރިޔާސީ އިންތިޚާބަށް ވަމުންދާ ތައްޔާރީތަކާއި ގުޅޭގޮތުން ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަކަ ދައްކަވަމުން ކޮމިޝަންގެ މެންބަރު އަޙްމަދު އަކްރަމް ވިދާޅުވީ، ސެޕްޓެމްބަރ މަހުގެ ކުރީކޮޅު އިންތިޚާބު ބޭއްވުމަށް ވާންޖެހޭ ތައްޔާރީތަކުގެ ޢަމަލީ މަސައްކަތް ފަށައިގެން މިހާރު ކުރިއަށްދާކަމަށެވެ. އަދި ޖުލައި މަހުގެ ފުރަތަމަ ދެ ހަފްތާގެ ތެރޭގައި އިންތިޚާބަށް ކުރިމަތިލުމުގެ ފުރުޞަތު ހުޅުވާލާނެކަމަށާއި، އިންތިޚާބާ ގުޅޭ އިދާރީ ގިނަ ކަންކަން މިހާރު ނިމިފައިވާކަމަށެވެ.
އެގޮތުން ވޯޓު ފޮށި ބަހައްޓާނެ ތަންތަނާއި ވޯޓު ފޮށީގެ އަދަދު ކަނޑައަޅާފައިވާކަމަށާއި، އަދަދު ފައިނަލްވިހާ އަވަހަކަށް އިޢުލާން ކުރާނެކަމަށް އަކްރަމް ވިދާޅުވިއެވެ. އޭނާ ވިދާޅުވީ ވޯޓު ފޮށި ބައްހައްޓާނެ ސިނާޢީ ތަންތަނާއި ރާއްޖެއިން ބޭރުގައި ވޯޓު ފޮށި ބަހައްޓާނެ ތަންތަން ފައިނަލްވާނީ ރީ-ރަޖިސްޓްރޭޝަންގެ މަސައްކަތް ނިމުމުންކަމަށެވެ.
ވޯޓާސް ލިސްޓު ނުވަތަ އިންތިޚަބުގައި ވޯޓުލެވޭ މީހުންގެ ލިސްޓު އަންނަ މަހު އިޢުލާންކުރާނެ ކަމަށާއި، އެ ލިސްޓަށް ޝަކުވާ ހުށައެޅުމުގެ ފުރުޞަތުވެސް ހުޅުވާލާނެކަމަށް އަކްރަމް ވިދާޅުވިއެވެ. އަދި އެއަށްފަހު ޖޫން މަހުގެ ތެރޭގައި ރީ-ރަޖިސްޓްރޭޝަންގެ ފުރުޞަތު ހުޅުވާލާނެކަމަށާއި، ޖުލައި މަހުގެ ތެރޭގައި އިންތިޚާބަށް ވާދަކުރުމުގެ ފުރުޞަތު ހުޅުވާލާއިރު ރީ-ރަޖިސްޓްރޭޝަންގެ މަސައްކަތް އެކޮށް ނިމޭނެ ކަމަށް އިލެކްޝަންސް ކޮމިޝަނުން ބުނެއެވެ.
"އަންނަ ރިޔާސީ އިންތިޚާބު މިނިވަންކަމާ އިންސާފުވެރިކަމާއެކު ގެންދެވޭނެކަމުގެ ޔަޤީންކަން ނުދެވެންވީ އެއްވެސް ސަބަބެއް ނެތް. 100 ޕަސެންޓު ޔަޤީންކަން އެބައޮތް ރައްޔިތުން ބޭނުންވާފަދަ ފަސޭހަ އަދި ފްރީ އެންޑް ފެއަރ އިންތިޚާބަކަށް ހެދޭނެކަން. ރައްޔިތުން ބޭނުން ހުރިހާ ކަމެއް މި އިންތިޚާބުގައި ހާސިލްވާނެ" އަކްރަމް ވިދާޅުވިއެވެ.
""އަންނަ ރިޔާސީ އިންތިޚާބު މިނިވަންކަމާ އިންސާފުވެރިކަމާއެކު ގެންދެވޭނެކަމުގެ ޔަޤީންކަން ނުދެވެންވީ އެއްވެސް ސަބަބެއް ނެތް. 100 ޕަސެންޓު ޔަޤީންކަން އެބައޮތް ރައްޔިތުން ބޭނުންވާފަދަ ފަސޭހަ އަދި ފްރީ އެންޑް ފެއަރ އިންތިޚާބަކަށް ހެދޭނެކަން. ރައްޔިތުން ބޭނުން ހުރިހާ ކަމެއް މި އިންތިޚާބުގައި ހާސިލްވާނެ"އަކްރަމް
މިފަހަރުގެ އިންތިޚާބުގައިވެސް ސިޔާސީ ޕާޓީތަކަށާއި ޖަމިއްޔާ ޖަމާޢަތްތަކަށާއި ބޭރު ޤައުމުތަކަށްވެސް އިންތިޚާބު އޮބްޒާވް ކުރުމުގެ ފުރުޞަތު ހުޅުވާލަން އިލެކްޝަންސް ކޮމިޝަނުން ވަނީ ނިންމާފައެވެ. އާންމުކޮށް ބޭރުގެ ހުރިހާ ޤައުމަކަށް އޮބްޒާވް ކުރުމުގެ ފުރުޞަތު ހުޅުވާލާނެކަން ފާހަގަކުރައްވާ އަކްރަމް ވިދާޅުވީ، އިލްކެޝަންސް ކޮމިޝަނުން ދަޢުވަތު ދީގެން މީގެ ކުރީގެ އިންތިޚާބުތައް އޮބްޒާވްކުރި އަދަދަށްވުރެ ގިނަ ޤައުމުތަކުން މިފަހަރުގެ އިންތިޚާބު އޮބްޒާވަރުމަށް ގެންނާނެކަމަށެވެ. އަދި ކެނޑިޑޭޓުންގެ ފަރާތުން ކޮންމެ ވޯޓު ފޮށްޓަކަށް މަންދޫބުން ބޭތިއްބުމުގެ ފުރުޞަތުވެސް ލިބޭނެކަން އޭނާ ފާހަގަކުރެއްވިއެވެ.
"ލޯކަލް ކައުންސިލް އިންތިޚަބުގައި ފުރަތަމަ ފަހަރަށް އިލެކްޝަންސް ކޮމިޝަނުން ދަޢުވަތު ދީގެން ބޭރުގެ ބަޔަކު އައިސް އޮބްޒާވްކުރި އިންތިޚާބަކީ. ހަމައެފަދައިން މި ރިޔާސީ އިންތިޚާބަކީ އެއަށްވުރެ ގިނަ ޤައުމުތަކަށް ދަޢުވަތުދީގެން ބާއްވާ، އޮބްޒާވްކުރެވޭ އިންތޚާބަކަށް ހަދާނަން. އެގޮތުން ސިޔާސީ ޕާޓީތަކާއި، ޖަމިއްޔާ ޖަމާއަތްތަކާއި، މުޅި ދުނިޔެއަށް އެ ފުރުޞަތު އޮންނާނެ" އަކްރަމް ވިދާޅުވިއެވެ.
އިލެކްޝަންސް ކޮމިޝަނުން ބުނީ ރިޔާސީ އިންތިޚާބަށް ވަމުންދާ ތައްޔާރީތަކާ ގުޅޭގޮތުން އދ އާއި އީޔޫ އަދި އައިޕީޔޫގެ ވަފްދުތަކާއި އެކު މަޝްވަރާ ކޮށްފައިވާ ކަމަށާއި، އެފަރާތްތަކުން ބޭނުންވާގޮތަށް އިންތިޚާބުތަކާބެހޭ ޤާނޫނާއި ޤަވާއިދުތައް އިޞްލާޙު ކުރާނެކަމަށެވެ. އިންތިޚާބުގެ ކުރިން ޤާނޫނަށް ގެންނަންޖެހޭ އިޞްލާޙުތައް ގެނައުމަށް އެކަމާ ބެހޭ ބިލް ޑްރާފްޓްުކޮށް އޭޖީ އޮފީހަށް ފޮނުވާފައިވާކަމަށް އިލެކްޝަންސް ކޮމިޝަނުން ބުނެއެވެ.