ޕާކިސްތާން އަސްކަރިއްޔާގެ އެންމެ އިސްވެރިޔާ މިމަހުގެ ތިރީސްވަނަ ދުވަހު ރާއްޖެ ވަޑައިގަންނަވަނީ
ޕާކިސްތާން އަސްކަރިއްޔާގެ އެންމެ އިސްވެރިޔާ، ޖެނެރަލް ޤަމަރު ޖާވިދު ބަޖުވާ މިމަހުގެ ތިރީސްވަނަ ދުވަހު ރާއްޖެ ވަޑައިގަތުމަށް ހަމަޖެހިފައިވާ ކަމަށް ރާއްޖޭގައި ހުންނަ ޕާކިސްތާން އެމްބަސީން ބުނެފިއެވެ. މިކަން ހާމަކުރައްވާ އެ އެމްބަސީން ޢާންމުކޮށްފައިވާ ނޫސްބަޔާނެއްގައި ބުނެފައިވަނީ ޖެނެރަލް ޤަމަރު ޖާވިދު ރާއްޖެ ވަޑައިގަންނަވަނީ ދިވެހި ދިފާޢީ ބާރުގެ އިސްވެރިޔާ މޭޖަރ ޖެނެރަލް އަޙްމަދު ޝިޔާމުގެ ދަޢުވަތަކަށް ކަމަށެވެ.
ޕާކިސްތާނުގެ އަސްކަރިއްޔާގެ އެންމެ އިސްވެރިޔާ، ޖެނެރަލް ޤަމަރު ޖާވިދު ބަޖުވާ މިމަހުގެ ތިރީހުން އެޕްރީލް މަހުގެ އެއްވަނަ ދުވަހަށް ރާއްޖެ ކުރައްވާ ތިން ދުވަހުގެ މިދަތުރުފުޅުގައި ރައީސުލް ޖުމްހޫރިއްޔާ ޢަބްދުﷲ ޔާމީނު ޢަބްދުލް ޤައްޔޫމާއި، ޑިފެންސް މިނިސްޓަރ އާދަމް ޝަރީފު އުމަރާއި، ފޮރިން މިނިސްޓަރ ޑރ. މުޙައްދަމު އާސިމާއި، ޗީފް އޮފް ޑިފެންސް ފޯރސް މޭޖަރ ޖެނެރަލް އަޙްމަދު ޝިޔާމާއި ބައްދަލުކުރެއްވުމަށް ހަމަޖެހިފައިވާކަމަށް ޕާކިސްތާން އެމްބަސީން ބުނެއެވެ.
މިބައްދަލުވުންތަކުގައި ޞަރަޙައްދުގެ ސަލާމަތާއި ރައްކާތެރިކަމާއި ބެހޭ ގޮތުންނާއި، އަސްކަރީ އަދި ދިފާޢީ ދާއިރާއިން ދެޤައުމަށް މުހިންމު ކަންތައްތަކާއި މައްސަލަތަކާ ބެހޭގޮތުން މަޝްވަރާކުރައްވާނެކަމަށް ޕާކިސްތާން އެމްބަސީން ބުނެއެވެ.
ޕާކިސްތާނުގެ އަސްކަރިއްޔާގެ އެންމެ އިސްވެރިޔާ، ޖެނެރަލް ޤަމަރު ޖާވިދު ބަޖުވާ ރާއްޖެއަށް ކުރައްވާ މިދަތުރުފުޅުގައި އެމަނިކުފާނުގެ ޝަރަފުގައި ރާއްޖޭގެ ޗީފް އޮފް ޑިފެންސް ފޯރސް ބާއްވާ ޚާއްޞަ ފަރިއްކޮޅެއްގައި ބައިވެރިވެވަޑައިގެން މޯލްޑިވްސް ނެޝަނަލް ޑިފެންސް ފޯރސްގެ އޮފިސަރުންނާއި ބައްދަލުކުރައްވާ ވާހަކަފުޅު ދައްކަވާނެކަމަށްވެސް ޕާކިސްތާން އެމްބަސީން ބުނެއެވެ.
މިއީ ފަހުގެ ތާރީޚެއްގައި ޕާކިސްތާނުގެ އަސްކަރިއްޔާގެ އިސްވެރިޔަކު ރާއްޖެ ވަޑައިގަންނަވާ ފުރަތަމަ ފަހަރެވެ.