ވިމެން އިން މެނޭޖްމަންޓުން ރާވައިގެން "ރަން ވިތް އަސް"ގެ ނަމުގައި އަންހެނުން ޚާއްސަ ދުވުމުގެ ހަރަކާތެއް ބާއްވަން ނިންމައިފިއެވެ.
މިއީ މިމަހުގެ 8ވަނަ ދުވަހު ފާހަގަކުރާ ބައިނަލްއަޤްވާމީ އަންހެހުންގެ ދުވަސް ފާހަގަކުރުމަށް ހިންގާ ހަރަކާތެކެވެ. މިޙަރަކާތް އިންތިޒާމްކުރުމާއި މިޙަރަކާތުގެ ބައިވެރިންގެ ގޮތުގައި އުޅޭނީ މުޅިންވެސް އަންހެނުން ކަމަށް ވިމެން އިން މެނޭޖްމަންޓުން ފާހަގަކުރެއެވެ. ހުޅުމާލޭގައި ބާއްވާ މިދުވުން އޮންނާނީ މިމަހުގެ 9ވަނަ ދުވަހުގެ ހެނދުނު 7 އިން 10 އަކަށް ކުރިޔަށްދާނެކަމަށެވެ. އަދި މިދުވުމުގައި 3.75 ކިލޯމީޓަރު ފުރިހަމަކުރުމަށް ހަމަޖެހިފައިވާއިރު، ރަންގެ ތެރެއިން ތިން އޮބްސްޓެކަލެއް ދުވާ މީހުންނަށް ކަނޑައްތުކުރަން ޖެހޭނެކަމަށް ދުވުން އިންތިޒާމްކުރާ ފަރާތްތަކުން ބުނެއެވެ.
ވިމެން އިން މެނޭޖްމަންޓުން ބުނިގޮތުގައި މިގޮތަށް މިހަރަކާތް ރޭވީ މިއަހަރުގެ އަންހެނުންގެ ދުވަހުގެ ޝިއާރުކަމަށްވާ "ޕްރެސް ފޮރ ޕްރޮގްރެސް"އާ ގުޅުވައިގެންކަމަށެވެ. މިހަރަކާތުގައި ބައިވެރިވުމަށް އެއްހާހަށްވުރެ ގިނަ އަންހެނުން މިހާރުވެސް ރަޖިސްޓްރީކޮށްފައިވާއިރު، މީގެ ތެރޭގައި އުމުރުން ފަސް އަހަރާއި ފަސްދޮޅަސް ހަ އަހަރާދެމެދު އަންހެން ކުދިންނާ، އަންހެނުން ހިމެނެއެވެ.
ބައިނަލްއަޤްވާމީ ކުންފުންޏެއްކަމަށްވާ ވިމެން އިން މެނޭޖްމަންޓަކީ އަންހެނުން ބާރުވެރިކުރުމުގެ މަޤްސަދުގައި އެކިއެކި ހަރަކާތްތައް ކުރިޔަށް ގެންދާ ކުންފުންޏެކެވެ. މިކުންފުނީގެ ރާއްޖޭގެ ގޮފި ހުޅުވާފައިވަނީ މިދިޔަ އަހަރުގެ ތެރޭގައެވެ.