މެޗުގެ އިތުރު ވަގުތުގައި ގްރީންސްޓްރީޓްސްއިން މާޒިޔާ ހިފަހައްޓައިފިއެވެ.
ފުރަތަމަ ދެ ލަނޑު ޖަހާ މާޒިޔާއިން ކުރި ހޯދާފައިވަނިކޮށް ގްރީން ސްޓްރީޓްސްއިން ވަނީ ފަހަތުން އަރާ ދެ ލަނޑު ޖަހާ ނަތީޖާ ހަމަހަމަކޮށްފައެވެ. އެސްޓީއޯ މާލޭ ލީގުގައި އެންމެ ފަހުގެ ޗެމްޕިއަން ޓީމާއި، ދެވަނަ ޓީމް ވާދަކުރި މެޗުގެ ފުރަތަމަ ދެ ލަނޑު ޖަހާ މާޒިޔާއަށް ކުރި ހޯދައިދިނީ ޓީސީ ދޫކޮށް މާޒިޔާއަށް ބަދަލުވި ބިދޭސީ ފޯވާޑް ސްޓުވާޓް ކޯނޭއެވެ.
ކޯނޭގެ ދެވަނަ ލަނޑަށްފަހު ގްރީންސްޓްރީޓްސްގެ ކުޅުން ރަނގަޅުކޮށް ފުރަތަމަ ލަނޑު ބިދޭސީ ކުޅުންތެރިޔާ އޮލޭ ޔެފިމްޗަކް ކާމިޔާބުކޮށްދިނީ 84 ވަނަ މިނިޓްގައެވެ. މެޗުގެ އިތުރުވަގުތުގައި ލިބުނު ހިލޭ ޖެހުމަކުން ގްރީންގެ ފަހު ލަނޑު ޖަހާ ނަތީޖާ ހަމަހަމަ ކޮށްދިނީ އިލިއާ ސަބޮލްއެވެ. އޭނާ ވަނީ މިދިޔަ ސީޒަންގައިވެސް ހިލޭ ޖެހުންތަކުން ގިނަ ލަނޑުތަކެއް ކާމިޔާބުކޮށްފައެވެ. މެޗަށްފަހު ގްރީން ސްޓްރީޓްސްގެ ކޯޗު އަލީ ސުޒޭން ބުނީ ގްރީންއަށް ލިބިގެން ދިޔައީ އުނދަގޫ މެޗަކުން ލިބުނު މުހިންމި ޕޮއިންޓެއްކަމަށެވެ. އަދި މެޗުގައި އޭނާގެ ޓީމްގެ ތިބި ތަޖުރިބާކާރު ކުޅުންތެރިންގެ ފަރާތުން އެކަށީގެންވާ ކުޅުމެއް ނުދެއްކުނުކަމަށް ސުޒޭން ބުންޏެވެ.
" ވަރަށް އާދައިގެ ގޮތަކަށް ފެނިގެންދިޔައީ ޓީމްގައި ތިބި ތަޖުރިބާކާރު ކުޅުންތެރިންގެ ފަރާތުން. އަނެއްހެން މިލިބުނީ އުނދަގޫ މެޗަކުން މުހިންމު ޕޮއިންޓެއް" މެޗަށްފަހު ސުޒޭން ބުންޏެވެ.
މާޒިޔާގެ ކޯޗު އިސްމާއިލް މަހުފޫޒް (އިންމަ) ބުނީ މިއީ ފުޓްބޯޅައިގެ އަންނާނެ ހާލަތްތަކެއް ކަމަށާއި، ޓީމްގެ ކުޅުންތެރިންގެ ފާރާތުން ފެނިގެންދިޔައީ އަމިއްލައަށް ޕްރެޝަރަށް ދިޔަތަންކަމަށެވެ. މިމެޗުން ކުރިޔަށްހުރި މެޗުތަކަށް ރަނގަޅު ފިލާވަޅެއް ލިބިގެން ހިނގައްޖެކަމަށް އިންމަ ބުންޏެވެ.
" ވަރަށް ބޮޑަށް އަމިއްލަ ޕްރެޝަރަށް ދިޔަތަން ފެނުނީ. މިމެޗުން ކަންތައްތަކެއް ދަސްވާނެ، ކުރިޔަހުރި މެޗުތަކަށް ނުކުންނައިރު" މެޗަށްފަހު އިންމަ ބުންޏެވެ.
މުބާރާތުގެ އެންމެފަހުގެ ޗެންޕިއަން މާޒިޔާ ލީގުގައި އަންނަ ހުކުރުދުވަހުގެރޭ ދެން ނުކުންނާނީ ނިއުރޭޑިއަންޓާ ދެކޮޅަށެވެ. ގްރީން ހޮނިހިރު ދުވަހު ހަވީރު ކުޅޭނީ ޓީސީއާ ދެކޮޅަށެވެ.