ހުސްނުވާ އާސަންދައިގެ ދަށުން އެންމެ ބޮޑު ހޭދައެއް ކޮށްފައިވަނީ ރާއްޖޭގެ ފާމަސީތަކަށާއި ރާއްޖެއިން ބޭރުގެ ހޮސްޕިޓަލުތަކަށް ކަމަށް އާސަންދަ ކޮމްޕެނީ ލިމިޓެޑުން ބުނެފިއެވެ.
އާސަންދަ ކޮމްޕެނީ ލިމިޓެޑުގެ ފަތާސް ހިސާބުތައް ދައްކާ ގޮތުން މިއަހަރުގެ މިހާތަނަށް ދައުލަތުގެ ބަޖެޓުން ހުސްނުވާ އާސަންދައިގެ ސްކީމްގެ ޚަރަދުތަކަށް ހޭދަކުރެވުނު ޖުމްލަ ޢަދަދުގެ 20 އިންސައްތައް ހޭދަކުރެވިފައިވަނީ ރާއްޖެއިން ބޭރުގެ ހޮސްޕިޓަލުތަކަށެވެ. އަދި އެ ޚަރަދުތަކުގެ ތެރެއިން 26 އިންސައްތަ ހޭދަކުރެވިފައިވަނީ ފާމަސީތަކަށެވެ.
މިދިޔަ އަހަރުގެ ފުރަތަމަ ދެ ކުއާޓަރއާ އަޅާބަލާއިރު މިއަހަރު ބޭސް ފިހާރަތަކަށް ކުރެވުނު ޚަރަދުވަނީ 28 އިންސައްތައަށް އިތުރުވެފައެވެ. އަދި 2015ވަނަ އަހަރުގެ މި މުއްދަތާއި އަޅާބަލާއިރު މިއަހަރު މި ޚަރަދުވަނީ 67 އިންސައްތަ އިތުރުވެފައެވެ.
އާސަންދަ ކޮމްޕެނީ ލިމިޓެޑުން ބުނީ ފާމަސީތަކަށް ކުރެވޭ ޚަރަދު އެހާ ބޮޑުތަން އިތުރުވެފައިވަނީ ފާއިތުވި ދެ އަހަރު ދުވަހު ހުސްނުވާ އާސަންދަ ސްކީމުގެ ދަށުން ޚިދުމަތް ދިނުމަށް ހުއްދަދީފައިވާ ފާމަސީތަކުގެ އަދަދު އިތުރުވެފައިވާތީކަމަށެވެ.
އާސަންދަ ކުންފުނިން ބުނީ ހުސްނުވާ އާސަންދަ ސްކީމުގެ ދަށުން އެންމެ ބޮޑު ހޭދައެއްކޮށްފައިވަނީ ރާއްޖެއިން ބޭރުގެ ހޮސްޕިޓަލްތަކުން ފަރުވާ ހޯދުމަށް ކަމަށް. އެގޮތުން އެންމެ ގިނައިން ޚިދުމަތް ހޯދާފައިވަނީ އިންޑިއާގެ ހޮސްޕިޓަލުތަކުންނެވެ. އަދި ދެވަނައަށް އެންމެ ގިނައިން ޚިދުމަތް ހޯދާފައިވަނީ ސްރީ ލަންކާގެ ހޮސްޕިޓަލުތަކުންނެވެ.
މިއަހަރުގެ އޮގަސްޓު މަހާ ހަމައަށް 3776 ބަލިމީހުން ހުސްނުވާ އާސަންދައިގެ ސްކީމުގެ ދަށުން ބޭސްފަރުވާއަށް ރާއްޖެއިން ބޭރަށް ފޮނުވާފައިވާއިރު އޭގެތެރެއިން 3304 މީހުން ފަރުވާ ހޯދާފައިވަނީ އިންޑިއާގެ ހޮސްޕިޓަލްތަކުންނެވެ. އަދި 472 މީހަކު ސްރީ ލަންކާގެ ހޮސްޕިޓަލްތަކުން ފަރުވާހޯދާފައިވާކަމަށް އާސަންދައިން ބުނެއެވެ.
ރާއްޖެއިން ބޭރުގެ ހޮސްޕިޓަލުތަކުން ޚިދުމަތް ހޯދާފައިވާ ބަލިމީހުންގެ ޢަދަދު 2016ވަނަ އަހަރުގެ ފުރަތަމަ ކުއާރޓާއާ އަޅާބަލާއިރު މި އަހަރު މި ޢަދަދުވަނީ 11 އިންސައްތަ އިތުރުވެފައެވެ. އަދި 2015ވަނަ އަހަރުގެ މި މުއްދަތާ އަޅާބަލާއިރު މިއަހަރު ރާއްޖެއިން ބޭރުން ޚިދުމަތް ހޯދާފައިވާ ޢަދަދުވަނީ 24 އިންސައްތަ އިތުރުވެފައެވެ.