ޤައުމު ބިނާކުރުމަށް ކުރާ މަސައްކަތުގައި އިސްރަށްވެހިންގެ ދައުރު ނިމުނީ ނޫންކަމަށް ވިދާޅުވެ، އެބޭފުޅުންގެ ދައުރު ރައީސް ޔާމީންގެ އެހީއާއެކު އަލުން ފެށްޓެވުމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް އިލްތިމާސްކުރައްވައިފިއެވެ.
ރަސްފަންނުގައި އިސްރަށްވެހިންނާ ބައްދަލުކުރެއްވުމަށް ބޭއްވެވި ބައްދަލުކުރެއްވުމުގައި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވަނީ އިސްރަށްވެހިންނަކީ ޤައުމު ބިނާކުރުމުގައި ޚަޒާނާއެއްފަދަ ބައެއްގެ ގޮތުގައި ސިފަކުރައްވާ ވާހަކަފުޅު ދައްކަވާފައެވެ.
އެމަނިކުފާނުގެ ވާހަކަފުޅުގައި ޒުވާން ޖީލެއް މިޖީލާ ހަމަޔަށް ގެނެސްދިނީ އިސްރަށްވެހީންކަމަށާއި، ޤައުމަށް ތަފާތު ރޮނގު ރޮނގުން ޚިދުމަތް ކޮށްދެއްވި އަދި މިހާރުވެސް ކޮށްދެއްވަމުން ގެންދަވާ ޢިލްމީ ބޭބޭފުޅުންގެ ފެށުމުގެ އަސްލަކީވެސް އިސްރަށްވެހީންކަމަށް ވިދާޅުވިއެވެ. އެހެންކަމުން އެބޭފުޅުންގެ މަތީން ހަނދާން ނުނެތޭނެ ކަމަށާއި، އެ މަސައްކަތްތަކުން ފިލާވަޅު ލިބިގަންނަކަމަށް ރައީސުލްޖުމްހޫރިއްޔާ ޒުވާނުންނަށް އިލްތިމާސްކުރެއްވިއެވެ.
img:http://s2.psmnews.mv/images/660x400/15076412855145.jpg|އިސްރަށްވެހިންނާ ބައްދަލުކުރެއްވުމަށް ބޭއްވި ރަސްމިއްޔާތުގައި ރައީސް ޔާމީން ވާހަކަފުޅުދައްކަވަނީ - ފޮޓޯ: ރައީސް އޮފީސް
ރައީސްގެ ވާހަކަފުޅުގައި ޤައުމު ބިނާކުރުމަށް ކުރާ މަސައްކަތުގައި އިސްރަށްވެހިންގެ ދައުރު ނިމުނީ ނޫންކަމަށާއި އެބޭފުޅުންގެ ދައުރު ރައީސް ޔާމީންގެ އެހީއާއެކު އަލުން ފެށްޓެވުމަށް ގޮވާލެއްވިއެވެ. ރާއްޖެއަށް ދެރަގޮތެއް ވެއްޖެއްޔާ އެންމެ ފުރަތަމަ ކަރުނަ އަޅަން ތިބި ބަޔަކީ އިސްރަށްވެހިންކަމަށާއި، ހެޔޮމަގުން ކައްސާލައިގެންދާ އެކިއެކި ނުރަނގަޅު ވިސްނުންތަކަށް ނަސޭހަތްތެރި ވާންޖެހޭ ކަމަށް ވިދާޅުވިއެވެ. އެގޮތުން އެކި ތަންތަނުގައި އެކި ޕްރޮގްރާމްތަކުގައި އެފަދަ ވާހަކަތައް ދައްކަންޖެހޭކަމަށާއި، ޒުވާނުންނާއި، ސިޔާސީ ލީޑަރުންނަށް ނަސޭޙަތްތެރިވެވަޑައިގަންނަވަން ޖެހޭކަމަށް ވިދާޅުވިއެވެ. އަދި ހަމަމަގުން ކައްސާލާ އެކިއެކި ވިސްނުންތަކަށް ނަސޭހަތްތެރިވުމަށް އެދިވަޑައިގެންނެވިއެވެ.
މިދިވެހި ރާއްޖެއަކީ ހުރިހާ ދިވެހިންގެ ރާއްޖެކަމަށް ތަކުރާރުކޮށް ފާހަގަކުރައްވަމުން ރައީސް ވިދާޅުވީ، މިފަދަ ހުރިހާ ކަމެއްގައި ޚިޔާލާ ފިކުރު ނެރެންޖެހޭނީ އިސްރަށްވެހިންގެ ތެރެއިންކަމަށެވެ.
img:http://s2.psmnews.mv/images/660x400/15076412277018.jpg|ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމާއި އެމަނިކުފާނުގެ އަނބިކަނބަލުން ފާޠިމަތު އިބްރާހީމް އިސްރަށްވެހިންނާއި ބައްދަލުކުރައްވަނީ- ފޮޓޯ: ރައީސް އޮފީސް
ޤައުމުގައި ދިވެހިވަންތަ ސިފަތައް އަށަގަންނުވައިދިނީ އިސްރަށްވެހިންކަމަށާއި، އެމީހުންގެ އެންމެ ކަންބޮޑުވާކަމަކީ ރާއްޖޭގެ މަސްރަހާ މެދު ވިންނާ ވިސްނުންކަމަށް ރައީސް ފާހަގަކުރެއްވިއެވެ. ކުށްވެރި ގިނަވާ މިންވަރާ މެދު އިސްރަށްވެހިން ކަންބޮޑުވާނެކަމަށާއި، އެހެން މީހުންގެ ޙައްގުތަކަށް އަރާގަންނަން ކެރޭ މިންވަރު އިތުރުވެގެންދާދިއުމާއި، ރާއްޖޭގައި ރަހުމްންކުޑަ އެތައް ކަމެއް ހިނގަމުންދާތަން ފެންނަ ފެންނަމުން ދިއުމަކީ އިސްރަށްވެހިން ހިތާމަކުރާނެކަމެއްކަމަށް ރައީސް ވިދާޅުވިއެވެ. އިސްރަށްވެހިން މި ޤައުމު މިޖީލާހަމައަށް އަމާންކަންމަތީ ގެނެސްދެއްވާފައި މިވަނީ ވަރަށްބޮޑު އަމާނާތެއްގެ ގޮތުގައިކަމަށާއި، ވުމާއެކު އިސްރަށްވެހީންގެ ލަފަޔާއި، މަޝްވަރާއާއެކު މިއަދު މި ޤައުމުގެ ޒިންމާ އުފުލަންޖެހޭނީ ޒުވާނުންކަމަށް ރައީސް ޔާމީން ވިދާޅުވިއެވެ.
އިސްރަށްވެހިން މާޔޫސްކަންމަތީ ތިބެން މިއަދު ނުޖެހޭކަމަށާއި، އެމަނިކުފާނުގެ ސަރުކާރުން މަސައްކަތްކުރަނީ ރާއްޖެއަކީ ކުޑަނަމަވެސް ޝަރަފްވެރި ޤައުމަކަށް ހެދުމަށްކަމަށް ވިދާޅުވިއެވެ. އަދި އުފެއްދުންތެރިކަން އިތުރުކުރުމާއެކު ބޭރުގައި އަމިއްލަ ސިފަތަކާ ޤައުމީ ވިސްނުންތަކާއެކު އިސްލާމްދީންމަތީ ޤައުމު ކުރިއެރުވުމުގައި ކުރާ މަސައްކަތުގައި އިސް ރަށްވެހިންގެ ދައުރު ކުޑަނޫންކަމަށާއި، ނަސޭހަތާ އުނގަންނާދިނުމާ ބަސްބުނުމާއި މަގަށް ސީދާ ކުރުމަކީ އިސްރަށްވެހިންނަށް މިއަދު ކުރެވޭނެކަމެއްކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވިއެވެ.