75 ވަނަ އުފަން ދުވަސް ފާހަގަކުރުމަށް އިންޑިޔާގެ މަޝްހޫރު ފިލްމީތަރި، އަދި ބޮލީވުޑްގެ "ޝެހެން-ޝާހް"ގެ ގޮތުގައި ގިނަ ބައެއްގެ މަޤްބޫލުކަން ހޯދާފައިވާ ސުޕަރ-ސްޓާރ އަމީތާބު ބައްޗަންއާއި، އޭނާގެ އާއިލާ މިއަދު ރާއްޖެ އަތުވެއްޖެއެވެ.
އަމީތާބާއެކު އޭނާގެ އަންހެނުން ޖާޔާ ބައްޗަންއާއި، އޭނާގެ ދެ ދަރިން ކަމަށްވާ އަބީޝެކް ބައްޗަންއާއި، ޝްވޭތާ ނަންދާ އަދި ޅީދަރިފުޅު އައިޝްވަރިޔާ ރާއީ ބައްޗަންއާއި ދެ ކާފަ ދަރިން، ރާއްޖެއައުމާއެކު ނަގާފައިވާ ބައެއް ފޮޓޯތައް ސޯޝަލް މީޑިއާގައި މިހާރު އަންނަނީ ދައުރުވަމުންނެވެ. އާމީތާބާއި އޭނާގެ އާއިލާ ރާއްޖޭގައި ޗުއްޓީ ހޭދަކުރުމަށް ހަމަޖެހިފައިވަނީ ކިހާ ދުވަހަކުކަމެއް، އަދި ކޮން ރިސޯޓެއްގައިކަން އަދި ސާފުވެފައެއް ނުވެއެވެ. ނަމަވެސް އިންޑިއާގެ ބައެއް މީޑިއާތަކުން ރިޕޯޓްކޮށްފައިވާ ގޮތުގައި އަމީތާބުގެ 75 ވަނަ އުފަން ދުވަހާއި ދިމާކޮށް، އޭނާގެ އާއިލާގެ ފަރާތުން ބޮޑެތި ސަޕްރައިޒްތަކެއް ދިނުމަށް ހަމަޖެހިފައިވާއިރު، ރާއްޖެއަށް މިކުރާ ދަތުރު ހަފްތާއަކަށް ދެމިގެންދިއުން އެކަށީގެންވާކަމަށް ބުނެފައިވެއެވެ.
އަމީތާބުގެ 75 ވަނަ އުފަން ދުވަސް ފާހަގަކުރުމަށް އޭނާގެ އާއިލާގެ ގިނަ މެންބަރުންތަކެއް މިއަދު ރާއްޖެ އައިސްފައިވާއިރު، އަބީޝެކްގެ 40 ވަނަ އުފަން ދުވަސް ފާހަގަކުރުމަށް މިދިޔަ އަހަރު އަމީތާބާއި އޭނާގެ އާއިލާ ވަނީ ރާއްޖެއަށް އައިސްފައެވެ. އަދި އެ ދަތުރަށްފަހު، ރާއްޖޭގެ ހިތްގައިމުކަމާއި، ގުދުރަތީ މުއްސަނދިކަން އަމިތާބުގެ އާއިލާގެ މެންބަރުންގެ މެދުގައި ވަރަށް ބޮޑަށް މަޤްބޫލުވެފައިވާކަމަށާއި، އަމީތާބުގެ 75 ވަނަ އުފަންދުވަސް ފާހަގަކުރުމަށް އޭނާގެ އެތައް ސަތޭކަ ސަޕޯޓަރުންނެއް ދޫކޮށްލުމަށްފަހު، ރާއްޖެއަށް އައުމުގެ ސިއްރަކީވެސް އެއީކަމަށް އަމީތާބުގެ އާއިލާގެ ވަރަށް ގާތް މީހަކާއި ހަވާލާދީ އިންޑިއާގެ ބައެއް ނޫސްތަކުން ރިޕޯޓްކޮށްފައިވެއެވެ.
1970 ގެ އަހަރުތަކުގައި ބޮލީވުޑްގައި ފިޔަ ޖަހަމުން އައި އަމީތާބުގެ ފިލްމީ ކެރިއަރަށް 48 އަހަރުވެފައިވާއިރު، އޭނާ ވެފައިވަނީ މުޅި ބޮލީވުޑްގައިވެސް އެންމެ ނުފޫޒްގަދަ އެއް ޝަޚުޞިއްޔަތަށެވެ.
ހަނީމޫންއަށާއި، އުފަންދުވަސް ފާހަގަކުރުމަށް އަދި ޗުއްޓީހޭދަކޮށްލުމަށް ފަހަކަށްއައިސް ބޮލީވުޑްގެ މަޝްހޫރު ބައެއް ތަރިންގެ މެދުގައި ރާއްޖެވެފައިވަނީ ވަރަށްވެސް މަޤްބޫލް މަންޒިލެއްގެ ގޮތުގައެވެ.