ދިވެހި ފިލްމު "ހައްދު" ޕްރިމިއާކޮށްފިއެވެ.
ހައްދު ޕްރިމިއާކުރީ އިއްޔެ ހަވީރު ޝްވެކް ސިނަމާގައި ބޭއްވި ރެޑްކާޕެޓް ހަފްލާއެއްގައެވެ. މަޝްހޫރު ޑައިރެކްޓަރ ޢަބްދުލް ފައްތާހާއި މަޝްހޫރު ފިލްމީތަރި ނިއުމާ މުހައްމަދު ޕްރޮޑިއުސްކޮށްފައިވާ މިފިލްމް ޑައިރެކްޓް ކޮށްފައިވަނީވެސް އަބްދުލް ފަތާޙްއެވެ. ފިލްމުގެ ލީޑުރޯލު ކުޅެފައިވަނީ އަހްމަދު ޝިބާން، މަރިޔަމް އައްޒަ، އައިމިނަތު ރިޝްފާއެވެ.
މިފިލްމުގެ ބަޠަލުގެ ރޯލުންފެންނަ ޝިބާނަކީ ފިލްމީ ދާއިރާއަށް މުޅިން އަލަށް ތަޢާރަފްވާ ތަރިއެކެވެ. ފިލްމުގެ ސަޕޯޓިން އެކްޓަރުންގެ ގޮތުގައި ފެނިގެންދާ ތަރިންގެތެރޭގައި އަލީ އާޒިމް (ދޮން އައްޔަ) މުހައްމަދު ރަޝީދު (ދަރާ)، މަރިޔަމް ޝަކީލާ، ފައުޒިއްޔާ ހަސަން ހިމެނެއެވެ.
އިއްޔެ މިފިލްމު ޕްރިމިއާ ކޮށްދެއްވީ އެންވާރަމެންޓަލް ޕްރޮޓެކްޝަން އޭޖެންސީ (އީޕީއޭ) ގެ ޑިރެކްޓާ ޖެނެރަލް އިބްރާހިމް ނަޢީމްއެވެ. މާލެ ޝްވެކް ސިނަމާ އާއި ހުޅުމާލެ ޝްވެކް ސިނަމާ އަދި އޮލިމްޕަހުގައި ހައްދުގެ 18 ޝޯ އަޅުވަން ނިންމާފައިވެއެވެ.
މިފިލްމުގެ ޝޯވތައް މާލޭގަޔާ ހުޅުމާލޭގައި އެޅުވުމަށް ހަމަޖެހިފައިވާކަމަށް ފިލްމުގެ ޑައިރެކްޓަރ ބުނެއެވެ.
ޒުވާނުންނަށް އަމާޒުކޮށްގެން ހަދާފައިވާ މި ފިލްމަކީ އިބްރަތްތެރި މެސެޖްތަކެއް ފިލްމް ބަލާ މީހުންނަށް ލިބިގެންދާނެ ފިލްމެއްކަމަށް ފިލްމުގެ ޑައިރެކްޓަރ ބުނެއެވެ. ހައްދުގެ ސްކްރީންޕްލޭ ހަދާފައިވަނީ މަހުދީ އަހްމަދުއެވެ.