މިޔަންމާގެ ރަކާން ސްޓޭޓްގައި ހިންގަމުންދާ ހަމަނުޖެހުންތަކުން އެ ގައުމުގެ އެންމެހާ ރައްޔިތުން ހިމާޔަތްކުރުމަށް މިޔަންމާގެ ސަރުކާރުން މަސައްކަތް ކުރަމުންދާކަމަށް މިޔަންމާގެ ލިޑަރު އައުން ސަން ސޫޗީ ވިދާޅުވެއްޖެއެވެ.
މިދިޔަ މަހުގެ 25 ވަނަ ދުވަހުން ފެށިގެން މިޔަންމާގެ ރަކާން ސްޓޭޓްގައި ރޮހިންޔާ މުސްލިމުންނާ ދެކޮޅަށް އެ ގައުމުގެ އަސްކަރިއްޔާއިން ހިންގާ ޖަރީމާތަކާ ބެހޭ ގޮތުން ފުރަތަމަ ފަހަރަށް ވާހަކަ ދައްކަވަމުން ސޫޗީ ވިދާޅުވީ، މިޔަންމާގެ މިހާރުގެ ޙާލަތާ ބެހޭގޮތުން ބައިނަލްއަޤުވާމީ މީޑިއާގައި ދޮގު މަޢުލޫމާތު ފަތުރަމުންދާކަމަށެވެ. އަދި މި މަޢުލޫމާތުގެ ސަބަބުން މިޔަންމާގައި ދިރިއުޅޭ ޓެރަރިސްޓް ޖަމާޢަތްތަކަށް، ނާޖާއިޒު ފައިދާ ލިބެމުންދާ ކަމަށްވެސް އޭނާ ވިދާޅުވިއެވެ.
ސޫޗީ މިވާހަކަތައް ދައްކަވާފައި ވަނީ ތުރުކީވިލާތުގެ ރައީސް ތައްޔިބު އުރުދުޣާނާ ފޯނުން ގުޅުއްވާކަމަށް މިޔަންމާގެ ސަރުކާރުން ވަނީ ބުނެފައެވެ.
މިޔަންމާގެ ރޮހިންޔާ މުސްލިމުންނާ ދެކޮޅަށް މިހާރު އެ ގައުމުގައި ހިންގަމުންދާ ޖަރީމާތަކާ މެދު މިހާތަނަށް ސޫޗީ އެއްވެސް އެއްޗެއް ވިދާޅުވެފައި ނުވާތީ، ނޮބެލް ސުލްޙައިގެ އިނާމް ލިބިވަޑައިގެންފައިވާ ސޫޗީއަށް ވަނީ ބައިނަލްއަޤުވާމީ ދުނިޔޭގެ ފާޑުކިއުންތައް އަމާޒުވެފައެވެ.
ރޮހިންޔާ މުސްލިމުންނާ ދެކޮޅަށް މިޔަންމާގައި ހިންގަމުންދާ ޖަރީމާތަކުގެ ސަބަބުން މިހާތަނަށް އެއްލައްކަ ތޭވީސް ހާސް މީހުން އަވަށްޓެރި ބަންގްލަދޭޝްއަށް ހިޖުރަކޮށްފައިވާކަމަށް އދން ވަނީ ބުނެފައެވެ. އަދި މީގެ ތެރޭގައި ގިނައީ އަންހެނުންނާ ކުޑަކުދިން ކަމަށާއި ގިނަ މީހުން ވަނީ އިންސާނީ އެހީއަށް އިންތިހާއަށް ބޭނުންވެފައި ކަމަށްވެސް އދން ބުނެއެވެ.