ހާލުގައި ޖެހިފައިވާ މިޔަންމާގެ ރޮހިންގޔާ މުސްލިމުންނަށް އެހީތެރިވުމަށް ގަލޮޅުގެ ރައްޔިތުން އިސްނަގައިގެން ޓެލެތޯނެއް ފެށުމަށް ނިންމައިފިއެވެ.
މި ޓެލެތޯންގައި ގަލޮޅު ރައްޔިތުންގެ ފަރާތުން އިސްކޮށް އުޅޭ ރިޟްވާން ލަޠީފް ބުނީ ރޮހިންގޔާ މުސްލިމުންނަށް އެހީތެރިވެވޭނީ ކޮންގޮތަކަށްތޯ ބަލައި، އެހީތެރިކަން ފޯރުކޮށްދިނުމަށް ގަލޮޅު ރައްޔިތުންތިބީ ތައްޔާރަށްކަމަށެވެ. އެގޮތުން އަންނަ ހުކުރު ދުވަހުންފެށިގެން މިމަހުގެ 15 ވަނަ ދުވަހުގެ ނިޔަލަށް ގިނަ ހަރަކާތްތަކެއް ހިންގުމަށް ނިންމާފައިވާކަމަށެވެ. އޭގެތެރޭގައި ކުޑަކުދިންގެ ހަވީރު ބޭއްވުމާއި، ރޭގަނޑު ރާއްޖޭގެ ގިނަ ފަންނާނުން ހިމެނޭ ޝޯވްތަކެއް ބޭއްވުން ހިމެނެއެވެ.
މި ޙަރަކާތްތައް ކުރިއަށްދާއިރު، ފައިސާގެ އެހީ ދޭން ބޭނުންވާ ފަރާތްތަކަށް ފަންޑު ފޮށި ބަހައްޓާނެކަމަށާއި، މީގެ އިތުރުން އަންނައުނާއި އެނޫންވެސް ތަކެތި ހަދިޔާކުރަން ބޭނުންވާ ފަރާތްތަކަށް އެތަކެތި ހަދިޔާ ކުރެވޭނެކަމަށް މި ޓެލެތޯން އިންތިޒާމް ކުރާ ފަރާތުން މަޢުލޫމާތުދެއެވެ.
މި ޓެލެތޯން އިންތިޒާމް ކުރުމުގައި އިސްކޮށް ހަރަކާތްތެރިވާ އެއް ފަރާތްކަމަށްވާ، އިސްމާޢިލް އިބްރާހީމް ބުނީ، މާލޭގެ ތިން ސަރަޙައްދެއްގައި ފަންޑް ފޮށި ބަހައްޓާނެކަމަށެވެ. އަދި މި ޙަރަކާތްތަކުގައި ކޮންމެ އުމުރުފުރާއެއްގެ މީހަކަށްވެސް ބައިވެރިވެވޭނެކަމަށެވެ.
މި ޓެލެތޯން އިން ލިބޭ އެހީގެ ތަކެއްޗާއި ފައިސާ ފޯރުކޮށްދިނުމަށް ހަމަޖެހިފައިވަނީ މިޔަންމާގެ ސަރުކާރާއި ސިފައިން ރޮހިންގޔާ މުސްލިމުންނާ ދެކޮޅަށް ހިންގާ ލާއިންސާނީ އަނިޔާތަކުގައި ގެއްލުންލިބެމުންދާ މުސްލިމުންނަށެވެ. މި ހަރަކާތަށް ގަލޮޅު ރައްޔިތުންގެ ބޮޑު ތަރުހީބެއް ލިބެމުން އަންނަކަމަށް ޓެލެތޯން އިންތިޒާމްކުރާ ފަރާތުންބުނެއެވެ.