ރާއްޖެއަށް މިހާރު ކުރަމުން މިދާ ވިއްސާރައަކީ ރާއްޖޭގެ އިރުމަތީގައި އުފެދިފައިވާ "އަޕަރ ލެވެލް ސައިކްލޯނިކް ސަރކިއުލޭޝަން"ގެ ސަބަބުން ކުރާ ވިއްސާރަކަމަށް އެ އިދާރާއިން މަޢުލޫމާތުދެއެވެ.
މި ވިއްސާރާގައި ރާއްޖޭގެ ކަނޑުތައް ގަދަވާނެކަމަށް މޫސުމާބެހޭ އިދާރާއިން ލަފާކުރެއެވެ. އާންމުގޮތެއްގައި 13 މޭލާއި 23 މޭލާ ދެމެދުގެ ބާރު މިނެއްގައި ވައި ޖެހޭނެކަމަށް ލަފާކުރެވޭއިރު، ވިލާގަނޑުގައި 45 މޭލަށް ވައިގަދަވުން އެކަށީގެންވާކަމަށްވެސް ލަފާކުރެވެއެވެ.
މިހާރު ރާއްޖެއަށް ކުރަމުންދާ ވިއްސާރަ ކުރިއަށް އޮތް 3 ދުވަހަށްވެސް ދިގުދެމިގެންދާނެކަމަށް މޫސުމާ ބެހޭ ޤައުމީ އިދާރާއިން ވަނީ ލަފާކޮށްފައެވެ.
އެ އިދާރާއިން މަޢުލޫމާތުދޭ ގޮތުގައި ކުރިއަށް އޮތް 24 ގަޑިއިރު ރާއްޖޭގެ ބައެއް ހިސާބުތަކަށް ބޯކޮށް ވާރޭ ވެހޭނެއެވެ. ޚާއްޞަކޮށް އުތުރާއި މެދު ރާއްޖެތެރެއަށް ބޯކޮށް ވާރޭވެހި ދެކުނަށްވެސް ވިއްސާރަ ކުރާނެކަމަށް މޫސުމާބެހޭ އިދާރާއިން ލަފާކުރެއެވެ. މި ވިއްސާރާގައި ހއ.އިން ފެށިގެން ގޮސް ލ.އަތޮޅާ ހަމައަށް ބޯކޮށް ވާރޭ ވެހޭނެކަމަށްވެސް މޫސުމާބެހޭ އިދާރާއިން ލަފާކުރެއެވެ.
އެ އިދާރާއިން ވަނީ ކުރިއަށް 24 ގަޑިއިރުވެސް މުޅި ރާއްޖެއަށް ވިއްސާރަކޮށް، ވައި ބާރުވެ ކަނޑުތައް ގަދަވާނެކަމަށް ކަމަށް ލަފާކުރެވޭތީ މޫސުމަށް ސަމާލުވުމަށް އިލްތިމާސްކޮށްފައެވެ. ޚާއްޞަކޮށް ފެންބޮޑުވާ ރަށްތަކުގައި ރައްކާތެރިވުމުގެ ފިޔަވަޅުތައް އަޅައި، ގޭގެއަށް ފެން ނުވަންނާނެހެން ވެލި ބަސްތާ ޖެހުމަށް މޫސުމާ ބެހޭ ޤައުމީ އިދާރައިން ވަނީ އިލްތިމާސްކޮށްފައެވެ. އެ އިދާރާއިން ވަނީ މިއަދު ހަވީރު ހަތަރެއް ޖެހުމާއި ހަމައަށް މުޅި ރާއްޖެއަށް ވައިޓް އެލަރޓް ނެރެފައެވެ.