ޖުމްހޫރީ ޕާޓީގެ ލީޑަރު އަދި މާމިގިލީ ދާއިރާގެ މެމްބަރު ޤާސިމް އިބްރާހީމްގެ މައްޗަށް ހުށައަޅާފައިވާ ރިޝްވަތުގެ މައްސަލައިގެ ދައުވާއާ ގުޅިގެން ދައުލަތުން ކޯޓަށް ހުށައަޅާފައިވާ ވީޑިއޯ އަދި އޯޑިއޯ ޤަރީނާގެ ޞައްޙަކަން ސާބިތުކުރުމަށް ފޮރިންސިކް ފުލުހުންގެ ހެކިބަސް ނަގައިފިއެވެ.
ދައުލަތުން ޤާސިމް އިބްރާހީމްގެ މައްޗަށް ހުށައަޅާފައިވާ ރިޝްވަތު ދިނުމަށް ހުށައެޅިކަމުގެ ދައުވާގެ މިއަދުގެ އަޑުއެހުމުގައި، ކުރިއަށްގެންގޮސްފައި ވަނީ ދައުލަތުން މިމައްސަލައާ ގުޅިގެން ހުށައަޅާފައިވާ ވީޑިއޯ އަދި އޯޑިއޯ ޤަރީނާގެ ޞައްޙަކަން ސާބިތުކުރުމަށްޓަކައި ފޮރެންސިކް ފުލުހުންގެ ހެކިބަސް ނެގުމެވެ. އެގޮތުން 2 ފުލުހެއްގެ ހެކިބަސް މިއަދުވަނީ ނަގާފައެވެ.
މިމައްސަލައިގައި ދެން އޮންނަ ޝަރީޢަތުގެ އަޑުއެހުމުގައި ހެކިވެރިންގެ ވާހަކަތަކާ ގުޅިގެން ޤާސިމްގެ ވަކީލުންނަށް ވާހަކަދެއްކުމުގެ ފުރުޞަތު ދިނުމަށް ވަނީ ހަމަޖެހިފައެވެ.
ޤާސިމްގެ މައްޗަށް ރިޝްވަތު ދިނުމަށް ހުށައެޅުމުގެ ދައުވާ ކޮށްފައިވަނީ، ގުޅިފައިވާ ސިޔާސީ ފަރާތްތަކުން ބޭއްވި ޖަލްސާއެއްގައި، ރައްޔިތުންގެ މަޖިލީހުގެ މެމްބަރުން ޖުމްހޫރީޕާޓީއާ ގުޅުމަށް ދައުވަތުދީ، އެޕާޓީއާ ގުޅޭ މެމްބަރުން 2019 ގައި އޮންނަ މަޖިލިސް އިންތިޚާބުގައި ގޮނޑި ކާމިޔާބު ކުރުމަށް އެހީވާނެކަމަށްބުނެ ދައްކާފައިވާ ވާހަކަތަކާ ގުޅިގެނެވެ.