މަގުމަތީގެ ސަލާމަތާއި ރައްކާތެރިކަމަށް ރައްޔިތުން ހޭލުންތެރިކުރުމަށް މޯލްޑިވްސް ޕޮލިސް ސާރވިސްގެ ފަރާތުން ކުރިޔަށްގެންދާ ރައްކާ ރޯޑްޝޯ ހދ.ކުޅުދުއްފުށީގައި ފަށައިފިއެވެ.
މިއަދު ކުޅުދުއްފުށީގައި ބޭއްވި ހަފްލާ ޝަރަފްވެރިކޮށްދެއްވީ ޑެޕިއުޓީ ކޮމިޝަނަރ އޮފް ޕްލިސް އަޙްމަދު ސަޢުދީއެވެ. އެލައިޑް އިންޝުއަރެންސްގެ އެހީތެރިކަމާއިކު މިމަހުގެ 21 އިން 28 އަށް ކުރިޔަށްގެންދާ ރައްކާ ރޯޑް ޝޯ އާ ގުޅޭގޮތުން ވާހަކަފުޅުދައްކަވަމުން ޑެޕިޔުޓީ ކޮމިޝަނަރ ވިދާޅުވީ މިފަދަ ކޮންމެ ރޯޑް ޝޯ އަކީ ގިނަ މަޢުލޫމާތުތަކަކާއި މެސެޖްތަކެއް ދެވޭނެ ޝޯތަކެއްކަމަށެވެ. އަދި މިކަން ކުރުމުގައި އެންމެ އެކަށީގެންވާ ފަރާތްތައް ޝާމިލްކުރުން މުހިންމުކަން ސަޢުދީ ފާހަގަކުރެއްވިއެވެ.
ރޯޑް ޝޯވ އިފްތިތާޙްކުރުމަށް ބޭއްވި ޙަފްލާއަށްފަހު ރަށުގެ އެކި ސަރަޙައްދުތަކުގައި ބެހުއްޓުމަށް ހަމަޖެހިފައިވާ ބިލްބޯޑްތަށް ވަނީ އިފްތިތާޙްކޮށްފައެވެ. ބޯޑް އިފްތިތާހްކޮށްދެއްވީ ޑެޕިޔުޓީ ކޮމިޝަނަރ އޮފް ޕޮލިސް އަހުމަދު ސައުދީއާއި އެލައިޑް އިންޝުއަރެންސް ކުންފުނީގެ ޖެނެރަލް މެނޭޖަރ އިބްރާޙިމް ފިރުޝާންއެވެ.
ރާއްކާ ރޯޑް ޝޯވ ގައި ކުޅުދުއްފުށީގެ ޒުވާނުންނަށާއި ސްކޫލު މަދަރުސާތަކުގެ ދަރިވަރުންނަށާއި ބެލެނިވެރިންނަށާއި އިސް ރަށްވެރިންނާއި އާންމު ރައްޔިތުންގެ އިތުރުން މުއައްސަސާތަކުގެ ވެރިންނާ، މުވައްޒަފުންނާއި، މަދަނީ ޖަމްޢިއްޔާތަކުގެ މެމްބަރުންނަށް މަޢުލޫމާތު ދިނުމަށް ތަފާތު ހަރަކާތްތަށް ކުރިޔަށްގެންދިޔުމަށް ވަނީ ހަމަޖެހިފައެވެ.
މަގުމަތީގެ ސަލާމަތާއި ރައްކާތެރިކަމަށް ރައްޔިތުން ހޭލުންތެރިކުރުމަށް މަގުފަހުވާ ގިނަ ޙަރަކާތްތަކެއް ހިމެނޭގޮތަށް ހިންގަމުންދާ ރައްކާ ރޯޑް ޝޯވއަކީ ފުލުހުން އިންތިޒާމްކޮށްގެން އެލައިޑް އިންސްއަރެންސްގެ އެހީތެރިކަމާއެކު 2014 ވަނަ އަހަރުން ފެށިގެން ބާއްވަމުން އަންނަ ޕްރޮގްރާމެކެވެ. މި ޕްރޮގްރާމުގެ ދަށުން މާލޭގެ އިތުރުން އައްޑޫ ސިޓީ އާއި ލ. އަތޮޅުގައި ރައްކާ ރޯޑް ޝޯވ ވަނީ ބާއްވާފައެވެ.