ޖިނާއީ އިޖްރާއަތުގެ ޤާނޫނުގެ ދަށުން އެކުލަވާލަންޖެހޭ ޤަވާޢިދުތައް ހެދުމުގެ މަސައްކަތުގެ ބޮޑުބައި ނިމިފައިވާކަމަށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުން ހާމަކޮށްފިއެވެެ.
ޖިނާއީ އިޖްރާއަތުގެ ޤާނޫނުގެ 211 ވަނަ މާއްދާގެ ދަށުން ޖިނާއީ މައްސަލަތަކުގައި ޝަރީޢަތް ކުރުމާގުޅޭ ޤަވާއިދުތައް އެކުލަވާލަންޖެހެނީ ދިވެހިރާއްޖޭގެ ސުޕްރީމް ކޯޓުންނެވެ.
ޕީ.އެސް.އެމް ނިއުސްއަށް މައުލޫމާތުދެއްވަމުން ޖުޑީޝަރީގެ އެސިސްޓެންޓް ލީގަލް އޮފިސަރ އަލްއުސްތާޛް ފައިޞަލް އާދަމް ވިދާޅުވީ، ޖިނާއީ އިޖްރާޢަތުގެ ޤާނޫނުގެ ދަށުން އެކުލަވާލަންޖެހޭ ޝަރީޢަތް ކުރުމާގުޅޭ ޤަވާއިދުގެ ބޮޑުބައި މިހާރު ނިމިފައިވާކަމަށާއި، މިހާރު ކުރަމުންދަނީ ޤަވާއިދުގެ ޑްރާފްޓް ފައިނަލް ކުރުމުގެ މަސައްކަތްކަމަށެވެ. އަދި ޖިނާއީ އިޖްރާޢަތުގެ ޤާނޫނުގެ ދަށުން ޤަވާއިދު އެކުލަވާލުމަށް ލިބޭ 3 މަސްދުވަހުގެ މުއްދަތުގައި އެމަސައްކަތް ނިމޭނެކަމަށް ފައިޞަލް ވިދާޅުވިއެވެ.
މި ޤަވާއިދަށް ޢަމަލުކުރަން ފަށާނީ ސުޕްރީމްކޯޓްގެ ފަނޑިޔާރުންގެ މަޖިލީހުން ބެއްލެވުމަށްފަހު، އެ މަޖިލީހުން ކަނޑައަޅުއްވާގޮތެއްގެ މަތިން. ޖިނާއީ އިޖްރާއަތުގެ ޤާނޫނަށް ޢަމަލުކުރަން ފަށާފައިވާއިރު ޖިނާއީ މައްސަލަތަކުގެ ޝަރީޢަތް ކުރިއަށްގެންދަންޖެހޭ ގޮތާގުޅޭ ޤަވާއިދު އެކުލަވާލާފައި ނުވާތީ، ޖިނާއީ މައްސަލައެއްގެ ޝަރީޢަތް މަޑުޖައްސާލުމަށް ކްރިމިނަލް ކޯޓަށް ހުށައެޅި ޤާނޫނީ ނުކުތާއަކާގުޅިގެން އެކޯޓުންވަނީ، އެޤަވާއިދު އެކުލަވާލާފައި ނުވިނަމަވެސް ޝަރީޢަތް މަޑުޖައްސާލަންޖެހޭ ސަބަބެއް ނެތްކަމަށް ކަނޑައަޅާފައެވެ.
ޖިނާއީ އިޖްރާއަތުގެ ޤާނޫނަށް ޢަމަލުކުރަން ފަށާފައިވަނީ 2 ޖުލައި 2017 ވަނަ ދުވަހުން ފެށިގެން. ޤާނޫނުގައި ބަޔާންކޮށްފައިވާގޮތުން ޤާނޫނުގެ ދަށުން ހަދަންޖެހޭ ޤަވާއިދުތައް އެކުލަވާލުމަށް އަމަލުކުރަންފަށާ ދުވަހުން ފެށިގެން 3 މަސްދުވަސް ލިބިދެއެވެ. އެހެންކަމުން ޖިނާޢީ މައްސަލަތަކުގެ ޝަރީޢަތް ކުރިއަށްގެންދާނެގޮތުގެ ޤަވާއިދު އެކުލަންޖެހޭ އެންމެ ފަހު ތާރީޚަކީ އޮކްޓޯބަރު 2 ވަނަ ދުވަހެވެ.