ޤަޞްދުގައި މީހަކު މެރުމުގެ ކުށް ތަޙުޤީޤު ކުރުމުގަޔާއި، އެ ކުށުގެ އަދަބު ތަންފީޛު ކުރުމުގައި ޢަމަލުކުރަންވީ ގޮތުގެ ގަވާއިދާ ގުޅޭގޮތުން ވަޒީރުންގެ މަޖިލީހުގައި މިއަދު މަޝްވަރާ ކުރައްވައި، ބައެއް އިޞްލާޙުތަކާއެކު އެ ގަވާއިދަށް ޢަމަލު ކުރައްވަން ފެށްޓެވުމަށް އެ މަޖިލީހުން ރައީސުލްޖުމްހޫރިއްޔާއަށް ލަފާ އަރުވައިފިއެވެ.
މިދިޔަ ފެބުރުވަރީ މަހުގެ 9 ވަނަ ދުވަހު ބޭއްވެވި ވަޒީރުންގެ މަޖިލީހުގެ ޖަލްސާގައި، ޤަޞްދުގައި މީހަކު މަރާލުމުގެ ކުށާ ގުޅިގެން މަރުގެ އަދަބު ކަނޑައަޅާ ޙާލަތްތަކުގައި، މަރުގެ ޙުކުމް ތަންފީޛުކުރުމުގައި (ޤިޞާޞް ހިފުމުގައި) ޢަމަލުކުރާނެ ސިޔާސަތުތަކާއި އުޞޫލުތަކާ ގުޅޭގޮތުން މެންބަރުން މަޝްވަރާ ކުރެއްވުމަށްފަހު، އެކަމުގައި ޢަމަލުކުރާނެ އިޖްރާޢަތުތައް ތަފްޞީލުކޮށް ބަޔާންކޮށްދޭ ގަވާއިދެއް، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއާއި، މިހާރު ޢަމަލުކުރަމުންދާ ޤާނޫނުތަކުގެ ދަށުން ސަރުކާރުގެ ފަރާތުން ވީއެންމެ އަވަހަކަށް އެކުލަވާލެއްވުމަށް ރައީސުލްޖުމްހޫރިއްޔާއަށްވަނީ މަޝްވަރާ އަރުވާފައެވެ.