ކުޑަކުދިންނަކީ މި ޤައުމުގެ މުސްތަޤްބަލުކަމުގައި ޤަބޫލުކޮށް، ކުޑަކުދިންގެ ޙައްޤުތައް ރައްކާތެރިކޮށް ކުރިއެރުވުމަށްޓަކައި، މުޅި މުޖުތަމަޢު ބައިވެރިވެ ޙަރަކާތްތެރިވުމަށް ޖެންޑަރ މިނިސްޓަރ ޒެނީޝާ ޝަހީދު ޒަކީ އިލްތިމާސްކުރައްވައިފިއެވެ.
މިއަދު ފާހަގަ ކުރަމުންދާ ކުޑަކުދިންގެ ދުވަހުގެ މުނާސަބަތުގައި ދެއްވި ޚިޠާބުގައި މިނިސްޓަރ ވިދާޅުވީ، ތަފާތުކުރުމެއްނެތި ހަމަހަމަކަމާއެކު ކުޑަކުދިންގެ ޙައްޤުތައް ލިބުމަކީ ކޮންމެ ކުއްޖެއްގެވެސް ޙައްޤެއް ކަމަށެވެ. މިނިސްޓަރގެ ޚިތާބްގައި ޚާއްޞަ މެސެޖްތަކެއްވެސް ރައްދުކުރައްވާފައެވެ. މިނިސްޓަރ ވިދާޅުވީ، ކޮންމެ ކުއްޖަކީވެސް އެ ކުއްޖެއްގެ ޤާބިލްކަން ތަންދޭ މިންވަރަކުން، ޝައުޤުވެރިކަން ހުރި ދާއިރާއަކުން ކުރިއަށް ދެވޭނެ ކުއްޖެއްކަމަށެވެ. އަދި ތަޢުލީމް ލިބުމަކީ ކޮންމެ ކުއްޖެއްގެވެސް ޙައްޤެއް ކަމަށެވެ. ނުކުޅެދުންތެރިކަން ހުންނަ ކުދިންނަށް ޢަމާޒުކުރައްވާ މިނިސްޓަރ ވިދާޅުވީ، ޚާއްޞަ ޚިދުމަތްތަކާއި އެހީތެރިކަން ލިބުމަކީ އެކުދިންނަށް ލިބިގެންވާ ޙައްޤެއްކަމަށެވެ.
ކޮންމެ ކުއްޖަކީވެސް އެކަކު އަނެކަކަށް އަޅާލާ، އިޙްތިރާމްކުރާ ކުއްޖަކަށްވުމަށާއި، އަދި ކުޑަކުދިންނާ ގުޅުންހުރި އިޖްތިމާޢީ ކަންކަމުގައި ވީހާވެސް ގިނައިން ބައިވެރިވެ، އެހީތެރިވެދިނުމަށް މިނިސްޓަރ ވަނީ ކުޑަކުދިންނަށް އިލްތިމާސްކުރައްވާފައެވެ. އަދި ހަނގާކުރުމާއި އަނިޔާކުރުންފަދަ ނޭދެވޭ ކަންކަމާ ދެކޮޅަށް އަޑު އުފުލާ، މިފަދަ ކަންކަން ހުއްޓުވުމަށް ކޮންމެ ކުއްޖަކުވެސް މަސައްކަތްކުރުމަށް މިނިސްޓަރ ވަނީ ހިތްވަރުދެއްވާފައެވެ.
"އެއްވެސް ޙާލަތެއްގައި ކުޑަކުއްޖަކަށް އަނިޔާއެއް ކުރުމަކީ ބަލައިގަނެވޭނެކަމެއް ނޫން. އަނިޔާއިން ރައްކާތެރިކަން ލިބުމަކީ ތިއިން ކޮޮންމެ ކުއްޖެއްގެވެސް ޙައްޤެއް. ސްކޫލުން ނުވަތަ ގޭތެރޭއިން އަދި ގެއިންބޭރުގަވެސް މިފަދަ ކަމެއް ދިމާވެއްޖެނަމަ، ލަސްނުކޮށް އިތުބާރުކުރެވޭ ބޮޑު މީހެއް ކައިރީގަ ބުނަންވާނެ. އަދި ނަން ހާމަ ނުކުރާގޮތަށްވެސް މިނިސްޓްރީ އޮފް ޖެންޑަރ އެންޑް ފެމިލީއަށް ހިލޭ ގުޅޭގޮތަށް ހަމަަޖައްސާފައިވާ ޗައިލްޑް ހެލްޕްލައިން 1412 އަށް ރިޕޯޓްކުރެވިދާނެ." މިނިސްޓަރގެ ޚިޠާބްގައި ވިދާޅުވިއެވެ.
ރާއްޖޭގެ އެކި ހިސާބުތަކުގައި ކުޑަކުދިންގެ ދުވަސް މިއަދު ފާހަގަކުރަމުންދާއިރު، ކުޑަކުދިންނަށް ފާގަތި މުސްތަޤްބަލެއް ފަހިކޮށްދިނުމަށްޓަކައި އާޢިލާތަކާއި މުޖްތަމަޢުގެ އެކި ފަރާތްތަކުން ކުރާ ބުރަ މަސައްކަތްތައް މިނިސްޓަރ ވަނީ ފާހަގަކުރައްވާފައެވެ.