އިސްލާމިކް ފައިނޭންސް އަދި އިސްލާމީ އިޤްތިޞާދު ކުރިއެރުވުމަށް ގުޅިގެން މަސައްކަތް ކުރުމަށް ޕަބްލިކް ސަރވިސް މީޑިއާއާއި، މޯލްޑިވްސް ސެންޓަރ ފޮރ އިސްލާމިކް ފައިނޭންސުން އެއްބަސްވެއްޖެއެވެ.
އިސްލާމިކް ފައިނޭންސް އަދި އިސްލާމީ އިޤްތިޞާދު ކުރިއެރުވުމަށް ގުޅިގެން މަސައްކަތް ކުރުމާގުޅޭ އެއްބަސްވުމުގައި ޕަބްލިކް ސަރވިސް މީޑިއާއާއި، މޯލްޑިވްސް ސެންޓަރ ފޮރ އިސްލާކިމް ފައިނޭންސުން ސޮއިކޮށްފައިވަނީ، ރޭޑިއޯ ބިލްޑިންގްގައި ބޭއްވި ޚާއްޞަ ރަސްމިއްޔާތެއްގައެވެ.
މިކަމާބެހޭ އެއްބަސްވުމުގައި ޕަބްލިކް ސަރވިސް މީޑިއާގެ ފަރާތުން ސޮއިކުރެއްވީ، މެނޭޖިންގ ޑިރެކްޓަރ އިބްރާހީމް ޚަލީލެވެ. މޯލްޑިވްސް ސެންޓަރ ފޯރ އިސްލާމިކް ފައިނޭންސްގެ ފަރާތުން ސޮއިކުރެއްވީ އެކުންފުނީގެ މެނޭޖިންގ ޑިރެއްޓަރ އިބްރާހީމް ދީދީއެވެ.
މިއެއްބަސްވުމުގައި ސޮއިކުރެއްވުމަށްފަހު ޕީ.އެސް.އެމްގެ މެނޭޖިންގ ޑިރެކްޓަރ އިބްރާހީމް ޚަލީލް ވިދާޅުވީ މި އެއްބަސްވުމާއެކު ޕީ.އެސް.އެމުން އިސްލާމިކް ފައިނޭންސާއި، އިސްލާމީ އިޤްތިޞާދު ޕްރޮމޯޓްކުރުމަށް ގެނެސްދޭ ޓީވީ އަދި ރޭޑިއޯ ޕްރޮގްރާމްތައް އިތުރުވެގެންދާނެކަމަށެވެ. އަދި ޕީ.އެސް.އެމްގެ ނޫސްވެރިން މިދާއިރާއިން ތަމްރީނުކޮށް، އިސްލާމިކް ފައިނޭސްގެ ދާއިރާއިން ޚާއްޞަވުމަށް ބޭނުންވާ ފަންނީ އެހީ މޯލްޑިވްސް ސެންޓަރ ފޮރ އިސްލާމިކް ފައިނޭންސުން ދޭނެކަމަށެވެ.
"އެއްފަރާތުގަ މިއޮތީ މަޢުލޫމާތު ފެތުރުމުގެ ވަސީލަތް، އަނެއް ފަރާތުގަ މިއޮތީ މަޢުލޫމާތު، އެހެންވީމަ ދެފަރާތް ގުޅިގެން ރަނގަޅަށް ޑިޒައިން ކުރެވިގެން ރަނގަޅު ޕްރޮގްރާމްތަކެއް އުފައްދައި، ޓީވީ ބަލާ، ރޭޑިއޯ އަޑުއަހާ އަދި ނޫސްކިޔާ އަދި ސޯޝަލް މީޑިއާއަށް ވަންނަ ފަރާތްތައް އަހުލުވެރިވާގޮތަށް، ފަސޭހަގޮތަށް މަޢުލޫމާތުތެއް ފެތުރުން އަޅުގަނޑުމެންގެ އެއް ބޭނުމަކީ. އަނެއް ބޭނުމަކީ އަޅުގަނޑުމެން މިކުންފުނީގައި މަސައްކަތްކުރާ ނޫސްވެރިންނަށް މިދާއިރާގެ ޓެކްނިކަލް މަޢުލޫމާތު ފޯރުކޮށްދީ ސްޕެޝަލައިޒް ކުރުން." ޕީ.އެސް.އެމްގެ މެނޭޖިންގ ޑިރެކްޓަރ ވިދާޅުވިއެވެ.
މިރަސްމިއްޔާތުގައި އެމް.ސީ.އައި.އެފްގެ މެނޭޖިންގ ޑިރެކްޓަރ އިބްރާހީމް ދީދީ ވިދާޅުވީ، ޕީ.އެސް.އެމާއެކު ސޮއިކުރެވުނު އެއްބަސްވުމަކީ އިސްލާމިކް ފައިނޭންސް، އަދި އިސްލާމީ އިޤްތިޞާދު ކުރިއެރުވުމަށް ލިބިގެންދިޔަ ބޮޑު ކުރިއެރުމެއްކަމަށެވެ.
"މި އެމް.އޯ.ޔޫގެ ދަށުން ދެފަރާތް ގުޅިގެން ތަފާތު ރިސާރޗް ތައް ހަދައި މީހުން ތަމްރީނު ކުރުމަށް ވަނީ ހަމަޖެހިފައި." އިބްރާހީމް ދީދީ ވިދާޅުވިއެވެ.
މި އެއްބަސްވުމުގެ ދަށުން އެމް.ސީ.އައި.އެފުން ރާވައި ހިންގާ ޕްރޮގްރާމްތައް ޕީ.އެސް.އެމްގެ ޗެނަލްތަކުން ޕްރޮމޯޓްކުރުމަށް ވަނީ ހަމަޖެހިފައެވެ. އަދި އިސްލާމިކް ފައިނޭންސާ ގުޅުން ހުރި ދާއިރާތަކުން ޕީ.އެސް.އެމަށް ފަންނީ އެހީތެރިކަށް ދިނުމަށްވެސް ހަމަޖެހިފައިވެއެވެ. މިއެއްބަސްވުމުގެ ދަށުން ދެކުންފުނި ގުޅިގެން އިސްލާމިކް ފައިނޭސްސާ ގުޅޭ ޕްރޮގްރާމްތަކެއް ރޯދަމަހަށް ޚާއްޞަކޮށްގެން ކުރިއަށް ގެންދިއުމަށް ހަމަޖެހިފައިވެއެވެ.