ރައްޔިތުންގެ މަޖިލީހުގައި ސަރުކާރު ހިންގާ ކޯލިޝަނަށް އޮތް މެޖޯރިޓީ ބޮޑުވެ، މަޖިލީހުގައި ތިއްބަވާ ޕީޕީއެމްއަށް ނިސްބަތްވާ މެމްބަރުންގެ ޢަދަދު ފަންސާސް ހަތަރަކަށް އިތުރުވެއްޖެކަމަށް ޕީޕީއެމްގެ ނައިބުރައީސް އަދި ރައްޔިތުންގެ މަޖިލީހުގެ ފޮނަދޫ ދާއިރާގެ މެންބަރު ޢަބްދުއްރަޙީމް ޢަބްދުﷲ ވިދާޅުވެއްޖެއެވެ.
18 ވަނަ ރައްޔިތުންގެ މަޖިލީހަށް މެންބަރުން އިންތިޚާބުކުރުމަށް 2014 ވަނައަހަރު ބޭއްވި އިންތިޚާބު ނިމިގެންދިޔައީ ސަރުކާރު ހިންގާ މައި ޕާޓީ، ޕީޕީއެމްއާއި، ކޯލިޝަންގައި ހިމެނޭ ޕާޓީތަކަށް މަޖިލީހުގެ ބޮޑު އަޣުލަބިއްޔަތެއް ލިބިގެންނެވެ. ރައްޔިތުންގެ މަޖިލީހުގެ އިންތިޚާބު ނިމިގެންދިޔައިރު ސަރުކާރާ އިދިކޮޅު މައި ޕާޓީއަށް ލިބިފައިވަނީ އެންމެ ސައްބީސް ގޮނޑިއެވެ. އަދި ސަރުކާރު ހިންގާ ޕީޕީއެމްއަށް ތެއްތިރީސް ގޮނޑި ލިބުނުއިރު ކޯލިޝަން ޕާޓީތައް ހިމެނޭގޮތުން، ސަރުކާރަށް ތާއީދުކުރާ ޖުމްލަ 53 މެމްބަރުން ރައްޔިތުންގެ މަޖިލީހަށް އިންތިޚާބުވިއެވެ.
ސިޔާސީ އެކި ސަބަބުތަކަށްޓަކައި ޖުމްހޫރީ ޕާޓީން، ސަރުކާރު ހިމެނޭ ކޯލިޝަނުން ވަކިވެގެންދިޔަ ނަމަވެސް، އެޕާޓީގައި ތިބި ގިނަ މެމްބަރުންވެސް ވަނީ ސަރުކާރު ހިންގާ ޕާޓީއާ ގުޅިވަޑައިގެންފައެވެ. އަދި މިހާރު ރައްޔިތުންގެ މަޖިލީހުގައި ސަރުކާރަށް ތާއީދުކުރާ މެމްބަރުންގެ ޢަދަދު ފަންސާސް ހަތަރަކަށް އިތުރުވެފައިވާކަން ޕީޕީއެމްގެ ނައިބުރައީސް، އަދި ފޮނަދޫ ދާއިރާގެ މެމްބަރު ޢަބްދުއްރަޙީމް ޢަބްދުﷲ ވަނީ އިޢުލާނުކުރައްވާފައެވެ. ޢަބްދުއްރަޙީމް ކުރެއްވި ޓްވީޓެއްގައި ވިދާޅުވެފައިވަނީ، މާރޗް މަހުގެ 27 ވަނަ ދުވަހު މަޖިލިސް ރައީސްގެ އިތުބާރުނެތްކަމުގެ ވޯޓް ނެގި ދުވަހު 48 މެމްބަރުން ސަރުކާރާއި އެއްކޮޅުގައި ތިއްބެވިނަމަވެސް މިހާރު ސަރުކާރަށް ތާއީދުކުރާ މަޖިލިސް މެންބަރުންގެ ޢަދަދު 54 އަށް އިތުރުވެފައިވާކަމަށެވެ. ރައްޔިތުންގެ މަޖިލީހުގެ ރައީސް ޢަބްދުﷲ މަސީހްގެ އިތުބާރުނެތްކަމުގެ ވޯޓް ނެގި ދުވަހު މަޖިލީހުގެ 48 މެންބަރުން ވަނީ އެމަނިކުފާނަށް އިތުބާރު އޮތްކަމަށް ވޯޓް ދެއްވާފައެވެ. މިއީ އެމަނިކުފާނު މަޖިލިސް ރައީސްގެ މަޤާމަށް އިންތިޚާބުކުރުމަށް ނެގި ވޯޓަށް ވުރެ ގިނަ ޢަދަދެއްކަން ފާހަގަކޮށްލެވެއެވެ. މަޖިލިސް ރައީސް ކަމަށް ޢަބްދުﷲ މަސީޙް އިންތިޚާބުކޮށްފައިވަނީ 43 މެމްބަރުންގެ ވޯޓާއެކުއެވެ.
އިދިކޮޅު ފަރާތްތަކުން ގެންދަނީ ރައްޔިތުންގެ މަޖިލީހުގެ ތެރޭގައި ސަރުކާރަށް އޮތް ތާޢީދު ފަނޑުވަމުންދާކަމަށް ބުނަމުންނެވެ. އެހެންނަމަވެސް ސަރުކާރަށް ތާޢީދުކުރައްވާ މެންބަރުން ވިދާޅުވަނީ އެއީ އިދިކޮޅު ފަރާތްތަކުގެ "ހުވަފެނީ ވިސްނުންކަމަށް"އެވެ.
ވެރިކަންކަކުރާ ޕީޕީއެމްގެ ބޮޑު އަޣުލަބިއްޔަތެއް އޮންނަ 18 ވަނަ ރައްޔިތުންގެ މަޖިލީހަކީ ދިވެހި ތާރީޚްގައިވެސް ރައްޔިތުންނާ ގުޅުންހުރި ފައިދާހުރި ބިލްތައް އެންމެ އަވަހަށް ފާސްކުރައްވާފައިވާ ރައްޔިތުންގެ މަޖިލީހެވެ. އަދި ސަރުކާރަށް އެއްބާރުލުންދެއްވުމާއި، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ ސިޔާސަތުތައް ތަންފީޛްކުރުމަށްޓަކައި ބޭނުންވާ ޤާނޫނީ މަސައްކަތްތައް ކުރެއްވުމަށް ފަސްޖެހިވަޑައި ނުގަންނަވާނެކަމަށް ރައްޔިތުންގެ މަޖިލީހުގެ ގިނަ މެންބަރުން ގެންދަވަނީ ތަކުރާރުކޮށް ވިދާޅުވަމުންނެވެ.