ގަދަ 5 ޖާގައެއް ނުލިބި، މޯލްޑިވިއަން އައިޑަލްގެ ދެވަނަ ސީޒަނުން، މަޝްހޫރު ލަވަކިއުންތެރިޔާ ފާޠިމަތު ޒޫނާގެ ދަރިފުޅު އަޙްމަދު ނަބީލް މުޙައްމަދު ކަޓައިފިއެވެ.
މޯލްޑިވިއަން އައިޑަލްގެ މިފަހަރުގެ ސީޒަންގެ ގަދަ 5 އިޢުލާން ކުރުން އޮތީ މިރޭ ބޭއްވި އެލިމިނޭޝަން ނައިޓުގައެވެ. މިރޭގެ ޝޯވގައި ގަދަ 5 ޖާގައެއް ނުލިބި އަޙްމަދު ނަބީލް މުޙައްމަދު މި މުބާރާތާ ވަކިވެފައިވާއިރު، ގާލާ ރައުންޑުގެ ކުރިއަށް އޮތް ޝޯވއަށް ދަތުރުކުރި 5 ބައިވެރިންނަކީ:
- ޝަމްވީލް މުޙައްމަދު
- ޢިބްރާހީމް ވަޙީދު
- މުޙައްމަދު ތަސްނީމް
- ޙަމޫދު އަޙްމަދު
- ޢަބްދުﷲ ހިޝާން
img:http://s2.psmnews.mv/images/660x400/14922828293533.jpg|މޯލްޑިވިއަން އައިޑަލް ސީޒަން 2 ގެ ގަދަ 6 ބައިވެރިން
އައިޑަލްގައި ވާދަކުރާ ބައިވެރިންގެ މެދުގައި އޮތް ވާދަވެރިކަން ޝޯވއަކަށްފަހު، ޝޯވއެއްގައި ގަދަވަމުން އަންނައިރު، ރޭގެ ޝޯވވެގެންދިޔައީ ބައިވެރިންގެ އިތުރުން ބެލުންތެރިންނަށްވެސް ހައިރާންކަމާއި ހާސްކަން ގެނުވި ޝޯވއަކަށެވެ. ރޭގެ ޝޯވގައި ބައެއް ބައިވެރިން ލަވަ ހުށަހަޅައިދިން ގޮތާމެދު ހިތްހަމަ ނުޖެހިގެން ޝޯވގެ އެއް ޖަޖު، އިސްމާޢިލް އައްފާން ޝޯވ ނިމުމުގެ ކުރިން ޖަޖުންގެ ޕެނަލް ދޫކޮށްދިއުމާއެކު، ކުރިއަށްހުރި ޝޯވތަކުން އައްފާން ފެނިދާނެކަމާމެދު ގިނަ ބަޔަކު ސުވާލު އުފައްދާފައިވާއިރު، މިރޭގެ ޝޯވގައިވެސް ޖަޖުންގެ ޕެނަލްއިން އައްފާން ފެނިފައެއްނުވެއެވެ.
ބަދަލުގައި ގެސްޓް ޖަޖެއްގެ ގޮތުގައި މިރޭގެ ޝޯވގައި ބައިވެރިވެފައިވަނީ އައިޑަލްގެ ފުރަތަމަ ސީޒަންގައި ޖަޖެއްގެގޮތުގައި ފެނިގެންދިޔަ މަޝްހޫރު ލަވަކިޔުންތެރިޔާ އަޙްމަދު އިބްރާހީމް، އައްމަޑޭއެވެ. "މޯލްޑިވްސް" މި ތީމަށް ރޭގެ ޝޯވ ޚާއްސަކޮށްފައިވާއިރު، މިރޭގެ ޝޯވގައި ބައިވެރިންގެ ފަރާތުން ފެނިގެންގޮސްފައިވަނީ "ފަންކް ރޮކް ސްޓައިލް"އަށް ކިޔާފައިވާ ލަވަތަކެކެވެ. މިރޭގެ ޝޯވއާއެކު އައިޑަލްގެ ބައިވެރިންގެ ޢަދަދު މިހާރު މިވަނީ ފަހަކަށް ތިރިވެފައެވެ. މިއާއެކު ޝޯވގެ ފޯރި އިތުރަށް ގަދަވާނެކަމަށް ބެލެވޭއިރު، އައިޑަލްގެ ގްރޭންޑް ފިނާލޭ އޮންނާނީ މި 5 ބައިވެރިންގެ ތެރެއިން ގަދަ 3 އަކަށް ދަތުރުކުރާ 3 ބައިވެރިންނާއެކުއެވެ.