އުސް ޢިމާރާތްތަކުގައި ހިނގާ އަލިފާނުގެ ޙާދިސާތައް ކޮންޓްރޯލް ކުރުމަށް ބޭނުންވާ އެންމެ ޒަމާނީ ވަސީލަތްތައް ހޯއްދެވުމުގެ މަސައްކަތް ކުރައްވަމުން ގެންދަވާކަމަށް ޑިފެންސް މިނިސްޓަރ އާދަމް ޝަރީފް ޢުމަރު ވިދާޅުވެއްޖެއެވެ.
އުސް ޢިމާރާތްތަކުގައި ހިންގާ އަލިފާނުގެ ހާދިސާތައް ކޮންޓްރޯލްކުރުމުގައި އެމް.އެން.ޑީ.އެފްގެ ފަޔަރ އެންޑް ރެސްކިއު އިން ޢަމަލުކުރާނެ ގޮތުގެ އުސޫލުތައް އެކުލަވާލައްވައި މިއަދު ވަނީ ޢަމަލުކުރައްވަން ފަށްޓަވާފައެވެ. ކޯސްޓްގާރޑް ބިލްޑިންގގައި މިއަދު ބޭއްވެވި ޚާއްޞަ ރަސްމިއްޔާތެއްގައި މިއުސޫލުތައް ނުވަތަ "ސްޓޭންޑަރޑް އޮޕަރޭޝަންސް ޕްރޮސީޖަރ" ނެރެދެއްވީ ޑިފެންސް މިނިސްޓަރ އާދަމް ޝަރީފް ޢުމަރުއެވެ.
މި އުސޫލު ނެރެދެއްވުމަށްފަހު ވާހަކަފުޅުދައްކަވަމުން ޑިފެންސް މިނިސްޓަރ ވިދާޅުވީ އުސް ޢިމަރާތްތަކުގައި ހިނގާ އަލިފާނުގެ ޙާދިސާތައް ކޮންޓްރޯލްކުރުމަކީ ވަރަށް ގިނަ ވަގުތު ހޭދަވާ ދަތި އުނދަގޫ ކަމަކަށްވާތީ، މިކަމާގުޅޭ އުސޫލުތަކެއް އެކުލަވާލާފައި އޮތުން މުހިންމުކަމަށް ދެކެވަޑައިގަންނަވާކަމުގައެވެ. އަދި އުސް ޢިމާރާތްތަކުގައި ހިނގާ އަލިފާނުގެ ހާދިސާތައް ކޮންޓްރޯލްކުރުމަށްޓަކައި ބޭނުންވާނެ އެންމެ ޒަމާނީ ވަސީލަތްތައް ހޯއްދަވާނެކަމަށްވެސް މިނިސްޓަރ ވިދާޅުވިއެވެ.
img:http://s4.psmnews.mv/images/660x400/14912291812169.jpg|ސްޓޭންޑަރޑް އޮޕަރޭޝަންސް ޕްރޮސީޖަރ ނެރެދެއްވުމަށް ބޭއްވި ރަސްމިއްޔާތުގައި ޑިފެންސް މިނިސްޓަރ އާދަމް ޝަރީފް ވާހަކަފުޅުދައްކަވަނީ / ފޮޓޯ: ޕީއެސްއެމް
ޢުމްރާނީ ގޮތުން ރާއްޖެއަށް އަންނަމުންދާ ބަދަލުތަކާ ގުޅިގެން ޢިމާރާތްތައް ދުވަހެއް ދުވަހަކަށް އުސްވަމުންދާއިރު، އުސް ޢިމާރާތްތަކުގައި ހިނގާ އަލިފާނުގެ ޙާދިސާތަކުގައި ޢަމަލުކުރާނެ އުސޫލުތަކެއް އެމް.އެން.ޑީ.އެފުން އެކުލަވާލުމަކީ، ޤައުމީ ކަންކަމުގައި ސިފައިން ގެންގުޅުއްވާ ދުރުވިސްނުން ހާމަވެގެންދިޔަ ކަމެއްކަމަށް މިނިސްޓަރ ވިދާޅުވިއެވެ.
މި ރަސްމިއްޔާތުގައި ވާހަކަފުޅުދައްކަވަމުން އެމް.އެން.ޑީ.އެފްގެ ފަޔަރ އެންޑް ރެސްކިއު ސަރވިސްގެ ކޮމާންޑަރ ކާނަލް ޢަބްދުﷲ ޒުހުރީ ވިދާޅުވީ އެމް.އެން.ޑީ.އެފްގެ ކެޕޭސިޓީ އިތުރުކުރެއްވުމަށް ސަރުކާރުން ގިނަ މަސައްކަތްތައް ކޮށްދެއްވާކަމަށެވެ.
އުސް ޢިމާރާތްތަކުގައި ހިނގާ އަލިފާނުގެ ހާދިސާތަކާ ގުޅިގެން އެމް.އެން.ޑީ.އެފުން ޢަމަލުކުރާނެ އުސޫލުތައް ކަނޑައަޅުއްވާފައިވާއިރު، އަލިފާނުގެ ޙާދިސާއެއް މެދުވެރިވާ ޙާލަތުގައި، އެފަދަ ޢިމާރާތްތަކުގައި ދިރިއުޅޭ މީހުން ޢަމަލުކުރާނެ ގޮތުގެ އުސޫލުތައްކެއްވެސް އެކުލަވާލައްވާނެކަމަށް އެމް.އެން.ޑީ.އެފުން ވިދާޅުވެއެވެ.