ކުދި ކުށްތައް ސާބިތުވެފައިވާ މީހުންނަށް ރައީސުލްޖުމްހޫރިއްޔާގެ އިސްނެގެވުމުގެ މަތިން އަދަބު ލުއިކޮށްދެވޭނެ އުސޫލްތަކެއް ހޯމް މިނިސްޓްރީން ކަނޑައަޅުއްވައިފިއެވެ. ނިސްބަތުން ކުދި ކުށްތައް ކުރާ ފަރާތްތަކުގެ ކުށުގެ ޢަދަބުގެ ހަތަރުބައިކުޅަ އެއްބައި ފުރިހަމަކުރުމުން އެކުށް ރައީސުލްޖުމްހޫރިއްޔާ ބޭނުންފުޅުނަމަ މަޢާފްކޮށްދެވޭގޮތަށް އޮތް އޮތުން ހޯމް މިނިސްޓްރީން އެކުލަވާލި އާ އުސޫލުން ވަނީ އުނިކުރައްވާފައެވެ.
ހޯމް މިނިސްޓްރީން އަލަށް އެކުލަވާލެއްވި އުސޫލްގައިވާގޮތުން ކުދި ކުށްތައްކޮށްފައިވާ ފަރާތްތަކަށް ރައީސްގެ އިސްނެންގެވުމުގެމަތިން އަދަބު ލުއިކޮށްދެވޭނީ ވަކި ޝަރުތަކެއް ފުރިހަމަވާނަމައެވެ. މިގޮތުން އަދަބު ލުއިކޮށްދެވޭ މީހުންގެ ތެރޭގައި ހިމެނޭނީ އެމީހެއްގެ މައްޗަށް ނުރައްކާތެރި ކުށެއްގައި އިތުރު ދައުވާކޮށްފައި ނުވާ މީހުންނާއި މުޖުތަމައަށް ނުރައްކާތެރި މީހެއްގެ ގޮތުގައި ފުލުހުން ކަނޑައަޅަފައި ނުވާ މީހުންނަށެވެ. މީގެއިތުރުން އިސްތިއުނާފް ކުރުމުގެ އެއްވެސް ފުރުޞަތެއް އޮތް މީހެއްގެވެސް އަދަބު ލުއިކޮށްދިނުމުގެ ބާރު އައު އުސޫލުން އެއްވެސް ފަރާތަކަށް ލިބިގެނެއްނުވެއެވެ.
ހޯމް މިނިސްޓްރީން އެކުލަވާލާ އަމަލުކުރަން ފަށާފައިވާ އައު އުސޫލްގައި އަދަބު ލުއިކޮށްދެވޭނެ ގޮތްތައްވެސް ކަނޑައަޅުއްވާފައިވެއެވެ. މިގޮތުން ޙުކުމް ތަންފީޒް ކުރުން ވަކި މުއްދަތަކަށް ފަސްކޮށްދިނުމާ، ކުށަކާ ގުޅިގެން އޭނާއަށް ކަނޑައަޅާފައިވާ އަދަބުގެ މުއްދަތު ކުރުކޮށްދިނުން ހިމެނެއެވެ. އަދި އެމީހަކު ކުރި ކުށަކީ އެއަށްވުރެ ލުއި އަދަބެއް ޤާނޫނާ އެއްގޮތަށް ކަނޑައެޅުމުގެ ފުރުޞަތު އޮތް ކުށަކަށްވާނަމަ، ލުއި އަދަބަކަށް ބަދަލުކޮށްދިނުމުގެ ބާރުވެސް އައު އުސޫލުން ރައީސުލްޖުމްހޫރިއްޔާއަށް ލިބިވަޑައިގަންނަވައެވެ.
ކުށްތަކުގެ އަދަބު ލުއިކޮށްދެއްވުމަށް ރައީސުލްޖުމްހޫރިއްޔާއަށް ލަފާދެއްވާ ކޮމިޓީއެއްވެސް މި އުސޫލުގެ ދަށުން އެކުލަވައިލައްވާފައިވެއެވެ. މި ކޮމިޓީގައި ހިމެނެނީ ހޯމް މިނިސްޓްރީއާއި، ފުލުހުންނާއި، ކަރެކްޝަނަލް ސަރވިސް ތަމްސީލުކުރާ މެންބަރުންނާއި، ޢާންމު 2 މެންބަރަކާއި، މެޑިކަލް ޑޮކްޓަރެކެވެ.
މުޖުތަމައަށް ނުރައްކާވާފަދަ ބޮޑެތި ކުށްތަކުގެ އަދަބު މި އުސޫލުގެ ދަށުން ލުއިކޮށެއް ނުދެވޭނެއެވެ.