ސިފައިން ސިޔާސީ ނުފޫޒުން އެއްކިބާކުރައްވައި އަސްކަރިއްޔާ ހަރުދަނާ ކުރެއްވުމަށްޓަކައި ސިފައިންނަށް ވޯޓް ނުލެވޭގޮތަށް ސިފައިންގެ ޤާނޫނު އިސްލާޙް ކުރެއްވުމަށް ސިފައިން ތާއީދު ކުރައްވާކަމަށް ޑިފެންސް މިނިސްޓަރ އާދަމް ޝަރީފް ޢުމަރު ވިދާޅުވެއްޖެއެވެ. މިނިސްޓަރ މިހެން ވިދާޅުވީ ސިފައިންގެ އެންމެ މަތީވެރިޔާގެ ވާދައިގެ ތައްޓަށް ބޭއްވި ހެވިކަމުގެ މުބާރާތް ނިންމެވުމުގެ ރަސްމިއްޔާތުގައި ވާހަފުޅުދައްކަވަމުންނެވެ.
ސިފައިންގެ އެންމެ މަތީވެރިޔާގެ ވާދައިގެ ތައްޓަށް ބާއްވާ 12 ވަނަ ހެވިކަމުގެ މުބާރާތް ނިންމެވުމުގެ ރަސްމިއްޔާތު ސަރަފްވެރިކޮށްދެއްވީ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމެވެ.
މި ރަސްމިއްޔާތުގައި ވާހަކަފުޅު ދައްކަވަމުން ޑިފެންސް މިނިސްޓަރ ވިދާޅުވީ، ސިފައިން ސިޔާސީ ނުފޫޒުން އެއްކިބާކުރައްވައި، ސިފައިންގެ ތެރޭގައި ޕްރޮފެޝަނަލް ކަން ދެމެހެއްޓުމަށް ސިފައިންނަށް ވޯޓް ނުލެވޭގޮތަށް ޤާނޫނު އިސްލާޙް ކުރައްވަން ނިންމެވުމުން ސިފައިންގެ ލީޑަރޝީޕާއި، ސިފައިން މިކަމަށް މަރުޙަބާ ކިޔާފައިވާކަމަށެވެ. އަދި މިއީ އަސްކަރިއްޔާގެ ޤައުމީ ރޫޙާއި، ބަދަހިކަން ހާމަވެގެންދިޔަ ކަމެއްކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ސިފައިންގެ ޤާނޫނު އިސްލާޙް ކުރެއްވުމަށް ސަރުކާރަށް ތާއީދުކުރާ މެންބަރުންގެ އިތުރުން، އިދިކޮޅު ޕާޓީތަކުގެ މެންބަރުން ތާޢީދުކުރައްވާނެކަމަށް ޤަބޫލުފުޅުކުރައްވާކަމަށެވެ. އަދި ޤާނޫނު އިސްލާޙް ކުރުމުގެ މަސައްކަތް ކުރައްވާނީ އެކަމަށްޓަކައި ފުރިހަމަ ކުރައްވަންޖެހޭ އިޖްރާޢަތްތައް ފުރިހަމަ ކުރެއްވުމަށްފަހުގައިކަމަށްވެސް މިނިސްޓަރ ވިދާޅުވިއެވެ.
އަސްކަރިއްޔާގެ ކުރިއެރުމަށާއި، ސިފައިންގެ ތެރޭގައި އެއްބައިވަންތަކަން ޤާއިމުކުރެއްވުމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްޤައްޔޫމް ކުރައްވާ މަސައްކަތްޕުޅަށް އެމަނިކުފާނު ޝުކުރުއާދާކުރެއްވިއެވެ. އަދި ސިފައިންގެ މަސްޢޫލިއްޔަތު އަދާކުރުމުގެ އެންމެ ފުރިހަމަ ފުރުޞަތު ފަހިވެގެންދިޔައީ ސަރުކާރުން ދިވެހިރާއްޖޭގެ އަމާންކަމާއި ސިޔާދަތު ޤާއިމުކުރެއްވުމަށް ރައީސުލްޖުމްހޫރިއްޔާ އަބްދުﷲ ޔާމީން ކުރެއްވި މަސައްކަތްޕުޅުންކަމަށް މިނިސްޓަރ ވިދާޅުވިއެވެ.
މިރަސްމިއްޔާތުގައި ވާހަކަދައްކަވަމުން ޗީފް އޮފް ޑިފެންސް ފޯސް، މޭޖަރ ޖެނެރަލް އަޙްމަދު ޝިޔާމް ވިދާޅުވީ ހެވިކަމުގެ ޙަރަކާތްތަކުން ދޭހަކޮށްދެނީ ސިފައިން ގުޅިގެން މަސައްކަތް ކުރުމުގެ މުހިންމުކަމާއި، ސިފައިންގެ ތެރޭގައި އެއްބައިވަންތަކަމުގެ ރޫޙް އާލާކުރުމުގެ މުހިންމުކަން ކަމަށެވެ. އަދި ދިވެހި ސިފައިން ތިއްބެވީ ޤައުމީ ރޫޙްގައި، ބަދަހިކަމާއި އެއްބައިވަންތަކަމާއެކުގައިކަމުގެ ޔަޤީންކަންވެސް ޗީފް އޮފް ޑިފެންސް ފޯސް ވަނީ ދެއްވާފައެވެ.