އައިޑޮލްގެ ގަދަ އެގާރާގައި ވާދަކުރާ ބައިވެރިން މިރޭ ނުކުންނާނީ ގަދަ ދިހަޔަކުން ޖާގައެއް ކަށަވަރުކުރުމަށް ބެލުންތެރިންނާއި ޖަޖުންގެ ހިތް އަތުލުމަށެވެ. މި އެގާރަ ބައިވެރިންގެވެސް އަމާޒަކަށްވާނީ ހިތްގައިމު ހުށައެޅުންތަކެއް ހުށައަޅަދީ ބެލުންތެރިންނާއި ޖަޖުންގެ 100 ޕަސެންޓާއި އެކު ގަދަ ދިހައެއްގައި ހިމެނުމެވެ.
މިރޭގެ ޝޯވްގައި ބައިވެރިންނަށް ކަނޑައަޅާފައިވާ ތީމަކީ ޅެންވެރިކަމެވެ. އެހެންކަމުން މިރޭގެ ޝޯވްގައި ރާއްޖޭގެ މިއުޒިކީ އުދަރެހުން އިވިގެންދިޔަ މޮޅެތި ޅެންތައް ހިމެނޭ ލަވަތަކެއް ފެނިގެންދާނެއެވެ.
ގާލާ ރައުންޑުގެ ޝޯވތަކާއެކު ބައިވެރިންގެ މެދުގައި އޮންނަ ވާދަވެރިކަން ދުވަހެއް ދުވަހަކަށް ދަނީ އިތުރުވަމުންނެވެ. އަދި އައިޑަލަކަށްވުމަށް ބައިވެރިން ކުރާ ބުރަ މަސައްކަތުގެ ޙަޤީޤީ ޖޯޝާއި ފޯރި މިހާރު އަންނަނީ ފެންނަމުންނެވެ. ގާލާ ރައުންޑުގެ ޝޯވތައް މިދިޔަ ހަފްތާގައި ފަށާފައިވާއިރު، ގާލާ ރައުންޑަށް ދަތުރުކުރި ގަދަ 12 ބައިވެރިންގެ ތެރެއިން އެއް ބައިވެރިއަކު ވަނީ އައިޑަލްގެ މި ޕްލެޓްފޯމުން ވަކިވެފައެވެ. މިދިޔަ ހަފްތާގެ ޝޯވއިން މޯލްޑިވިއަން އައިޑަލްއާއި ވަކިވެގެން ދިޔަ ބައިވެރިއަކީ ރ. މީދޫއަށް އުފަން، އުމުރުން 18 އަހަރުގެ މުޙައްމަދު ހަމްދާންއެވެ.
tw:https://twitter.com/Maldivian_Idol/status/840176712340004868
މިދިޔަ ހަފްތާގެ ޝޯވްއެކޭ އެއްގޮތަށް މިހަފްތާގެ ޝޯވގައިވެސް ބައިވެރިންގެ ހުށައެޅުންތަކަށް ބެލުންތެރިންގެ ފަރާތުން ވޯޓުދިނުމަށް އެސް.އެމް.އެސް ކުރުމުގެ ފުރުޞަތު ޝޯވދައްކާ ވަގުތުން ފެށިގެން، މާދަމާ މެންދުރުފަހު 3 ޖެހުމާއި ހަމައަށް އޮންނާނެއެވެ. އަދި މިފަހަރުގެ ސީޒަންގެ ގަދަ 10 އަކަށް ދަތުރުކުރާ ބައިވެރިން އިޢުލާން ކުރުން އޮންނާނީ މާދަމާ ރޭ ބާއްވާ އެލިމިނޭޝަން ނައިޓުގައެވެ.
މޯލްޑިވިއަން އައިޑަލްގެ ފުރަތަމަ ސީޒަނާއި ޚިލާފަށް، ދެވަނަ ސީޒަންއަކީ ތަފާތުތަކެއް ގެނުވާނެ ސީޒަނަކަށް ހެއްދުމަށްޓަކާ އައިޑަލްގެ ޕްރޮޖެކްޓް ޓީމުން އަންނަނީ ތަފާތު ގިނަ މަސައްކަތްތަކެއް ކުރަމުންނެވެ. އެގޮތުން މި ޝޯވގައި ވާދަކުރާ ކޮންޓެސްޓުންނާއި، އެފަރާތްތަކުގެ ސަޕޯޓަރުންނާއި އަދި މި ޝޯވގެ ބެލުންތެރިންނާއި ދެމެދު ގާތްގުޅުމެއް އުފެއްދުމުގެގޮތުން ތަފާތު ހަރަކާތްތައް ދަނީ ހިންގަމުންނެވެ. ހަމައެހެންމެ ލަވަކިޔުމާއި، މިއުޒިކްގެ ދާއިރާއިން ބޭރުން، އާއްމު ދިރިއުޅުމުގައި ބޭނުންވާ މުހިއްމު ކަންތައްތަކުގެ މަޢުލޫމާތު ބައިވެރިންނަށްދީ، ތަފާތު ކަންކަން ތަޖުރިބާ ކުރުމުގެ ފުރުޞަތު އެބައިވެރިންނަށް ދެމުންދެއެވެ.