ރައީސުލްޖުމްހޫރިއްޔާ ޢަބްދު ﷲ ޔާމީން ޢަބްދުލްޤައްޔޫމްގެ ސަރުކާރުގައި ރާއްޖެއާއި ޗާއިނާ ދެމެދު އޮންނަ ގުޅުން ވަރަށް ބޮޑަށް ބަދަހިވެ، ރާއްޖޭގެ ތަރައްޤީޤެ މުހިންމު ޙިއްސާއަކަށް ޗައިނާވެ، ޗައިނާ ސަރުކާރުން ތަފާތު ދާއިރާތަކުން ރާއްޖެއަށް އެހީތެރިކަން ދެއްވަމުން ގެންދަވާ ކަމަށް މިނިސްޓަރ އޮފް ޔޫތް އެންޑް ސްޕޯޓްސް އިރުތިޝާމް އާދަމް ވިދާޅުވެއްޖެއެވެ. އެކަމަނާ މިހެން ވިދާޅުވީ، ދިވެހިރާއްޖެއާއި ޗައިނާ ދެމެދު ޚާރިޖީ ގުޅުން ޤާއިމްކުރިތާ 45 އަހަރު ފުރުން ފާހަގަކުރުމަށް އޮލިމްޕަހުގައި ބޭއްވި ކަލްޗަރަލް ޝޯވ ފަށްޓަވައި ދެއްވާ ވާހަކަފުޅު ދައްކަވަމުންނެވެ.
ދިވެހިރާއްޖެއާއި ޗައިނާ ދެމެދު ޚާރިޖީ ގުޅުން ޤާއިމްކުރިތާ މިއަހަރު 45 އަހަރު ފުރުން ފާހަގަކުރުމުގެ ގޮތުން ބޭއްވި ޝޯވ އިންތިޒާމު ކުރެއްވީ މިނިސްޓްރީ އޮފް ޔޫތް އެންޑް ސްޕޯޓްސްއާއި ނޭޝަނަލް ސެންޓަރ ފޮރ ދި އާޓްސް ގުޅިވަޑައިގެން. މިޝޯވގައި އައިޓަމްތައް ހުށަހަޅައިދީފައިވަނީ ޗައިނާގެ ޖިއާންސޫ ކަލްޗަރަލް ގުރޫޕުންނެވެ.
މިޝޯވ ފަށްޓަވައިދެއްވާ ވާހަކަފުޅު ދައްކަވަމުން ޔޫތް މިނިސްޓަރ އިރުތިޝާމް އާދަމް ވިދާޅުވީ، ރައީސް ޔާމީންގެ ޒަޢާމަތުގައި ރާއްޖެއާއި ޗައިނާ ދެމެދު އޮންނަ ގުޅުން ވަރަށް ބޮޑަށް ބަދަހިވެއްޖެ ކަމަށެވެ. ޚާއްޞަކޮށް އެކި ދާއިރާތަކުން ޗައިނާ ސަރުކާރުން ރާއްޖެއަށް އެހީތެރިކަން ދެއްވަމުން ގެންދަވާކަން މިނިސްޓަރ ފާހަގަކުރެއްވިއެވެ.
"ރައީސް ޔާމީންގެ ސަރުކާރުގައި ޗައިނާއާ އޮންނަ ގުޅުން ވަރަށް ބޮޑަށް ބަދަހިވެގެން ހިނގައްޖެ. އޭގެ ތެރޭގައި ތަފާތު ދާއިރާތަށް ހިމެނޭ. ޚާއްސަ ތައުލީމާއި، ފޮރިން ރިލޭޝަނާއި، އަތޮޅުތެރޭގައި ހިންގަވާ މަޝްރޫޢު ފާހަގަކޮށްލެވޭ،" މިނިސްޓަރ އޮފް ޔޫތް އެންޑް ސްޕޯޓްސް އިރުތިޝާމް އާދަމް ވިދާޅުވިއެވެ.
މިނިސްޓަރ އިރުތިޝާމްގެ ވާހަކަފުޅުގައި، ޗައިނާއަކީ މުއްސަނދި ސަޤާފަތް އޮތް ޤައުމެއް ކަމަށް ވިދާޅުވިއެވެ. އަދި އެފަދަ ސަޤާފަތް ނަމޫނާއަކަށް ބަލައި، ދިވެހިރާއްޖޭގެ މިއޮތް ދިވެހިވަންތަ ސަޤާފަތް ދިރުވާ އާލާކުރުމަށް މަސައްކަތް ކުރަންޖެހޭ ކަމަށް ދެކިވަޑައިގަންނަވާ ކަމަށް ވިދާޅުވިއެވެ. ދިވެހިރާއްޖޭގައި ހުންނަވާ ޗައިނާގެ ސަފީރު ވާންގ ފުކާން ދެއްކެވި ވާހަކައިގައި ރާއްޖޭއާ ޗައިނާ އަށް ދެމެދު އޮތް ގުޅުން ބަދަހިކުރުމަށް މިފަދަ ސަޤާފީ ކަންކަން އެއް ޤައުމު އަނެއް ޤައުމު ޙިއްސާ ކުރުމަކީ މުހިއްމު ކަމެއްގެ ގޮތުގައި ފާހަގަކުރެއްވިއެވެ.
މިޝޯވަގައި، ޖިއާންސޫ ކަލްޗަރަލް ގުރޫޕްގެ ތަފާތު އައިޓަމްތަށް ފެނިގެން ގޮސްފައިވެއެވެ. މީގެ ތެރޭގައި އެކްރޮބެޓިކަސްއާ މާރޝަލް އާރޓްސްގެ ޙަރަކާތްތައް ފާހަގަކޮށްލެވެއެވެ.