ނިމިގެންދިޔަ އަހަރު ތަޢުލީމީ ދާއިރާއިން ލިބުނު އެންމެ ބޮޑު އެއް ކާމިޔާބީއަކީ އޯލެވެލް އިމްތިޙާނާއި، އެސް.އެސް.ސީ އިމްތިޙާނުން 70 އިންސައްތަ ކުދިން 5 މާއްދާއިން ފާސްވެފައިވުން ކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ. އެމަނިކުފާނު މިހެން ވިދާޅުވެފައިވަނީ، ރައްޔިތުންގެ މަޖިލިސް މިއަހަރަށް ހުޅުއްވުމުގެ ގޮތުން ބޭއްވެވި މިއަހަރުގެ ފުރަތަމަ ދައުރުގެ ފުރަތަމަ ޖަލްސާގައި ރިޔާސީ ބަޔާން އިއްވަވަމުންނެވެ.
ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވަނީ ތަޢުލީމީ ދާއިރާއިން ނިމުނު އަހަރު ލިބުނު ކާމިޔާބީތަކަށް އަލިއަޅުވާލައްވައި ވާހަކަފުޅު ދައްކަވާފައެވެ. އެގޮތުން ސަރުކާރުގެ ތަޢުލީމީ ސިޔާސަތުގެ ތެރޭގައި ހިމެނޭ 5 މާއްދާއިން ފާސްވާ ދަރިވަރުންގެ ޢަދަދު 60 އިންސައްތައަށް ގެންދިއުމުގެ ލަނޑުދަނޑި، ނިމުނު އަހަރު ޙާޞިލުކުރެވިފައިވާކަމަށް ރައީސުލްޖުމްހޫރިއްޔާ ވިދާޅުވިއެވެ. އަދި ސްކޫލް ތަޢުލީމުގެ ރަސްމީ ބައެއްގެ ގޮތަށް ޕްރީ-ސްކޫލް ތަޢުލީމު ކަނޑައަޅައި، ރާއްޖޭގެ މީހުން ދިރިއުޅޭ ހުރިހާ ރަށަކުން ޕްރީ-ސްކޫލް ތަޢުލީމު ހިލޭ ދެއްވަން ފަށްޓަވާފައިވާކަންވެސް ފާހަގަކުރެއްވިއެވެ.
ބައިނަލްއަޤްވާމީ ތަޢުލީމުގެ އެޖެންޑާގައި، 2030 ވަނަ އަހަރު ޙާޞިލުކުރުމަށް އެއްބަސްވެފައިވާ އެއްއަހަރު ދުވަހުގެ ހިލޭ ޕްރީ-ސްކޫލް ތަޢުލީމަށްވުރެ، މި މަރުޙަލާގެ ތަޢުލީމު ފުޅާކޮށް، ނިމުނު އަހަރު ރާއްޖެއިން ވަނީ އެލަނޑުދަނޑިވެސް ޙާޞިލުކޮށްފައެވެ. އަދި ސްކޫލް އުމުރުފުރާގެ އެންމެ ކުއްޖަކުވެސް ބާކީނުކޮށް، ކިޔަވައިދިނުމުގެ ސިޔާސަތު ކާމިޔާބުކަމާއެކު ތަންފީޒުވަމުންދާ ކަމަށް ރައީސް ވިދާޅުވިއެވެ.
" ސްކޫލް އުމުރުފުރާގެ އެންމެ ކުއްޖަކުވެސް ބާކީނުކޮށް، އެކުދިންގެ ޤާބިލިއްޔަތުކަމާއި ހުނަރާއި ބޭނުންތައް ދެނެގަނެ، ތަޢުލީމުގެ ނިޒާމަށް ގެނެވުނު ބަދަލާއެކު، ރާއްޖޭގެ ތަފާތު ޞިނާޢަތްތަކަށް ބޭނުންވާ މަސައްކަތާއި، ހުނަރު އުނގަންނައިދިނުމުގެ މަސައްކަތްތެރިކަމުގެ ސްޓްރީމްގައި މިހާރު 40 އިންސައްތަ ކުދިން ކިޔަވަމުންދާކަން އަޅުގަނޑު ފާހަގަކުރަން. އަދި ނުކުޅެދުންތެރިކަން ހުންނަ ކުދިންނަށް ކިޔަވައިދިނުމަށް ބޭނުންވާ ޓީޗަރުން، މިއަހަރު ރާއްޖޭގެ ހުރިހާ ސްކޫލަކަށް ހަމަޖެހިގެންދާނެ " ރިޔާސީ ބަޔާނުގައި ރައީސުލްޖުމްހޫރިއްޔާ ވިދާޅުވިއެވެ.
img:http://s1.psmnews.mv/images/660x400/14864441053564.jpg|އެޑިއުކޭޝަން މިނިސްޓަރ ޑރ. ޢާއިޝަތު ޝިހާމް- ފޮޓޯ: ޕީއެސްއެމް
ނިމުނު އަހަރުގެ ޘާނަވީ އިމްތިޙާނުގެ ކާމިޔާބީ ފާހަގަކުރެއްވުމަށްޓަކައި އެޑިއުކޭޝަން މިނިސްޓްރީން ގެންދަވަނީ ތައްޔާރުވެވަޑައިގަންނަވަމުންނެވެ. ޓީވީއެމްގެ ރާއްޖެ މިއަދު ޕްރޮގްރާމްގައި ވާހަކަފުޅުދައްކަވަމުން އެޑިޔުކޭޝަން މިނިސްޓަރ ޑރ. ޢާއިޝަތު ޝިހާމް ވިދާޅުވީ ކާމިޔާބީ ފާހަގަ ކުރެއްވުމަށްޓަކައި ރާއްޖޭގެ ސްކޫލްތަކުގައި ޚާއްޞަ ޙަރަކާތްތަކެއް ކުރިއަށް ގެންދަވާނެ ކަމަށެވެ. އަދި ދަރިވަރުންގެ ނަތީޖާ އިތުރަށް ރަނގަޅު ކުރެއްވުމަށްޓަކައި ރާއްޖޭގެ ޓީޗަރުންގެ ފެންވަރު އިތުރަށް ރަނގަޅުކުރެއްވުމަށް ސަރުކާރުން މަސައްކަތް ކުރައްވާކަން މިނިސްޓަރ ފާހަގަކުރެއްވިއެވެ. އެގޮތުން ކުރިއަށް އޮތް ތިން އަހަރުގެ ތެރޭގައި ރާއްޖޭގައި ކިޔަވައިދެއްވާ ހުރިހާ ޓީޗަރުން ޑިގްރީ ފެންވަރަށް ތަމްރީނު ކުރެއްވުމަކީ ސަރުކާރުގެ އަމާޒެއް ކަމަށް މިނިސްޓަރ ވިދާޅުވިއެވެ.
" އަޅުގަނޑުމެންނަށް މިކަން ކާމިޔާބުވީ އެއްސަބަބަކީ ވަރަށް ބޮޑަށް އަޅުގަނޑުމެން މިނިސްޓްރީ ތެރޭގައިވެސް ޑޭޓާގެ މައްޗަށް ވަރަށް ބޮޑަށް ބިނާކުރެވިގެން އަޅުގަނޑުމެންނަށް ގޮތްތަކެއް ނިންމުނު. ކޮންމެ ކުއްޖަކަށް ލިބެނީ ކޮން މާރކްސް އެއްތޯ ކޮން ގްރޭޑެއްތޯ ކޮންމެ ކުއްޖަކު ހުރީ ކޮން ހިސާބެއްގަތޯ ބަލާފައި އެ ކުއްޖަކަށް ބޭނުންވާ ކަހަލަ އެހީތެރިކަމެއް ފޯރުކޮށްދިނުމުގެ ސަބަބުން އަޅުގަނޑުމެންނަށް ކުދިންނަށް ރަނގަޅު ގޮތްތަކެއް މި ހޯދައި ދެވުނީ. އެހެންކަމުން އަޅުގަނޑު ދަންނަވާނީ މިކަމުގެ ސަބަބުން އަޅުގަނޑުމެންނަށް އެނގިގެން މިދިޔައީ ޤައުމުގެ ތަރައްޤީގައި ރައީސްގެ އަރިހުގައި ތަރައްޤީއަށް މަސައްކަތްކުރުމަށް ހުރިހާ ރައްޔިތުންވެސް ތިބީ ތައްޔާރަށޭ " މިނިސްޓަރ ޑރ. ޢާއިޝަތު ޝިހާމް ވިދާޅުވިއެވެ.
ނިމުނު އަހަރު ޘާނަވީ އިމްތިޙާނު ނިންމި ދަރިވަރުންގެ ތެރެއިން އޭ އަދި އޭ ސްޓާރ ލިބުނު ދަރިވަރުން 5 އިންސައްތައިގެ ކުރިއެރުމެއް ހޯދާފައިވާއިރު "ބީ" ގްރޭޑް ހޯދި ދަރިވަރުން ވަނީ 2 އިންސައްތައިގެ ކުރިއެރުމެއް ހޯދާފައެވެ. އަދި "ސީ" ގްރޭޑް ހޯދި ދަރިވަރުން ވަނީ 3 އިންސައްތައިގެ ކުރިއެރުމެއް ހޯދާފައެވެ.