މޯލްޑިވްސް ޙައްޖު ކޯޕަރޭޝަންގެ ޙަވާލުގައި އަންނަ މަހު ޢުމްރާއަށް ދާ މީހުން ރަޖިސްޓްރީވެ، ފައިސާ ދެއްކުމުގެ މުއްދަތު މިއަދު ހަމަވާނެއެވެ.
ޙައްޖު ކޯޕަރޭޝަނުން ވިދާޅުވީ، މާރޗް މަހު ޢުމްރާއަށް ދާން މިހާތަނަށް 100 އަށްވުރެ ގިނަ މީހުން ފައިސާ ދައްކާފައިވާ ކަމަށެވެ. ޙައްޖު ކޯޕަރޭޝަނުން މާރޗް މަހު ޢުމްރާއަށް ދާން ކަނޑައަޅާފައިވަނީ 22,965 ރުފިޔާއެވެ. ހައްޖު ކޯޕަރޭޝަނުން ވިދާޅުވީ، މާރޗްމަހު ޢުމްރާއަށް ދާ މީހުން އަންނަ މާރޗް މަހުގެ 16 ވަނަ ދުވަހު ފުރުމަށް ހަމަޖެހިފައިވާ ކަމަށާއި އެނބުރި އައުމަށް ހަމަޖެހިފައިވަނީ މާރޗް މަހުގެ 27 ގައި ކަމަށެވެ.
ޢުމްރާ ދަތުރުގެ އިތުރަށް މާރޗް މަހު އެކޯޕަރޭޝަނުން ކުރުމަށް ހަމަޖެހިފައިވާ އިސްލާމިކް ކަލްޗަރަލް ޓުއަރ ގައި ދާން ބޭނުންވާ މީހުންވެސް ރަޖިސްޓްރީވުމުގެ މުއްދަތު މިއަދު ހަމަވާނެ ކަމަށް ޙައްޖު ކޯޕަރޭޝަނުން ވިދާޅުވެއެވެ.
އިސްލާމިކް ކަލްޗަރަލް ޓުއަރަށް ޙައްޖު ކޯޕަރޭޝަނުން ކަނޑައަޅާފައިވަނީ 49,965 ރުފިޔާއެވެ. މިދަތުރު ކުރުމަށް ހަމަޖެހިފައިވަނީ މާރޗް މަހުގެ 5 ވަނަ ދުވަހުން އެމަހުގެ 25 އަށެވެ. ރާއްޖޭގެ އަމިއްލަ ބައެއް ޖަމާޢަތްތަކުންވެސް އަންނަ މަހު މީހުން ޢުމްރާއަށް ގެންދިއުމުގެ މަސައްކަތް ކުރަމުން އެބަދާކަމަށް އެ ޖަމާޢަތްތަކުން ބުނެއެެވެ.