ދަސްވާރު ޕްރޮގްރާމަކީ 2014 ވަނަ އަހަރުން ފެށިގެން ގްރޭޑް ދިހައެއްގައި ތަޢުލީމް ޙާސިލްކުރަމުންދާ ދަރިވަރުންގެ ތެރެއިން މަސައްކަތާއި ހުނަރު ދަސްކުރަން ބޭނުންވާ ދަރިވަރުންނަށް އަމާޒުކުރައްވައިގެން އެޑިއުކޭޝަން މިނިސްޓްރީން ހިންގަވާ ޕްރޮގްރާމެކެވެ. މިއީ އެއްވެސް ކުއްޖަކު ބާކީނުކޮށް ތަޢުލީމް ދިނުމުގެ ސިޔާސަތުގެ ދަށުން ދަރިވަރުންނަށް އިތުރު ފަހި ފުރުޞަތުތަކެއް ތަނަވަސްވެގެންދާ ގޮތަށް ބައްޓަންކުރައްވާފައިވާ ޕްރޮގްރާމެކެވެ.
ދަވަސްވާރު ޕްރޮގްރާމްގެ ވޯޓަރ ސްޕޯޓްސް ކޯސް ހިންގަވަނީ އެޑިއުކޭޝަން މިނިސްޓްރީއާއި ވިލާ ކޮލެޖު ގުޅިވަޑައިގެނެވެ.
ދަސްވާރު ޕްރޮގްރާމްގެ ތެރެއަށް ވޯޓަރ ސްޕޯޓްސް ހިމެނުއްވީ މިދިޔަ އަހަރުއެވެ. މިނިސްޓްރީން ވިދާޅުވީ، ވޯޓަރ ސްޕޯޓްސް ތަޢާރަފްކުރެއްވީ އެދާއިރާގެ މަސައްކަތް ދަސްކުރަން ކުދިން ޝައުޤުވެރިކަން ފާޅުކުރުމާ ގުޅިގެނެވެ.
އެޑިއުކޭޝަން މިނިސްޓްރީން ވިދާޅުވީ، ވޯޓަރ ސްޕޯޓްސް ކޯހުގެ ދެވަނަ ބެޗުގައި 15 ދަރިވަރުން ބައިވެރިވެ ތަމްރީނު ފުރިހަމަކޮށްފައިވާ ކަމަށެވެ. ކޯހުގެ ބައިވެރިން ތިން މަސް ދުވަސް ސަން އައިލެންޑު ރިސޯޓުގައި ހޭދަކޮށް، ވޯޓަރ ސްޕޯޓްސްގެ ދާއިރާއިން ގިނަ ހުނަރުތަކެއް ދަސްކޮށްފައިވާ ކަމަށް މިނިސްްޓްރީން ވިދާާޅުވެއެވެ.
މިކުދިންގެ ތަމްރީނުތައް ސަން އައިލަންޑު ރިސޯޓުގައި ފެށްޓެވީ މިދިޔަ ޑިސެމްބަރު މަހުއެވެ. ވޯޓަރ ސްޕޯޓްސް ތަމްރީނު ފުރިހަމަކުރި ދަރިވަރުން ބުނީ، މިއީ އެކުދިން ކުރި ތަފާތު ތަޖުރިބާއެއް ކަމަށާއި މިއީ ކުރިއަށްދާން ލިބުނު ރަނގަޅު ފުރުޞަތެއް ކަމަށެވެ.
ވިލާ ކޮލެޖުގެ ސީނިއަރ މެނޭޖަރ އެޑްމިނިސްޓްރޭޝަން އަބްދުﷲ އަޙުމަދު ވިދާޅުވީ، ވޯޓަރ ސްޕޯޓްސް ސެންޓަރެއްގައި މަސައްކަތްކުރާނެ ގޮތުގެ ފަންނީ ތަމްރީން ކޯހުގެ ބައިވެރިވި ދަރިވަރުންނަށް ދެއްވި ކަމަށާއި ކުދިންގެ އަޚްލާޤަަށްވެސް ހެޔޮ ބަދަލުތަކެއް އައިސްފައިވާކަން ފާހަގަކުރެވޭ ކަމަށެވެ.
މިދިޔަ އަހަރު ފެށްޓެވި ވޯޓަރ ސްޕޯޓްސް ކޯސް 14 ދަރިވަރަކު ފުރިހަމަކޮށްފައިވެއެވެ. މީގެތެރެއިން ބައެއް ކުދިން މިހާރު ތިބީ ވަޒީފާތަކުގައެވެ.
2014 ވަނަ އަހަރު ތަޢާރަފްކުރެވިގެން ދިޔަ ދަސްވާރު ޕްރޮގްރާމްގައި 168 ސްކޫލުން ދަރިވަރުން ބައިވެރިވެ، 1480 ދަރިވަރަކު ކާމިޔާބު ކަމާއެކު މި ޕްރޮގްރާމް ފުރިހަމަކޮށްފައިވާ ކަމަށް އެޑިއުކޭޝަން މިނިސްޓްރީން ވިދާޅުވެއެވެ.