ޖެންޑަރ މިނިސްޓްރީން ދެއްވާ ޚިދްމަތްތައް، ލާމަރުކަޒީ ކުރެއްވުމުގެ މަސައްކަތުގެ ދަށުން، އަތޮޅުތަކުގައި ކޮމިއުނިޓީ ސޯޝަލް ސަރވިސް ވޯކިންގް ގްރޫޕްތަކެއް އުފެއްދެއްވުމުގެ މަސައްކަތް ފަށްޓަވައިފިއެވެ. މިނިސްޓްރީ އޮފް ޖެންޑަރ އެންޑް ފެމިލީން މިހާރު ޢަމާޒު ހިއްޕަވާފައިވަނީ، މިއަހަރުގެ ތެރޭގައި ކ.އަތޮޅުގެ ހުރިހައި ރަށެއްގައި, ކޮމިއުނިޓީ ސަރވިސް ގްރޫޕްތައް އުފެއްދެވުމަށެވެ.
"އިޖްތިމާޢީ ރައްކާތެރިކަން އެންމެނަށް" މި ޝިޢާރުގެ ދަށުން ޖެންޑަރ މިނިސްޓްރީން ގެންދަވަނީ، ކުޑަކުދިންނާއި، އަންހެނުންނާއި، އުމުރުން ދުވަސްވީ މީހުންނަށް ޢަމާޒުކުރައްވައިގެން، ޚާއްޞަ ޕްރޮގްރާމްތަކެއް ހިންގަވަމުންނެވެ. އެގޮތުން މިއަހަރުގެ ޕްރޮގްރާމްތައް ފަށްޓަވާފައިވަނީ މާލެއަތޮޅުންނެވެ. މިދިޔަ ބުރާސްފަތި ދުވަހުން ފެށިގެން ހޮނިހިރު ދުވަހުގެ ނިޔަލަށް ޕްރޮގްރާމް ކުރިޔަށް ގެންދަވާފައިވާއިރު، މީގެ ތެރޭގައި މަޢުލޫމާތު ދެއްވުމުގެ ޚާއްޞަ ސެޝަންތަކާއި, ދޮރުން ދޮރަށް ހިންގަވައިގެން މަޢުލޫމާތު ދެއްވުން ހިމެނެއެވެ. img:http://s3.psmnews.mv/images/660x400/14851722016044.jpg|ޖެންޑަރ މިނިސްޓަރ ޒެނީޝާ ކ. އަތޮޅުގެ ރަށްތަކަށް ކުރެއްވި ޒިޔާރަތުގެ ތެރެއިން - ފޮޓޯ: ކައުންސިލް
ކ. ގުރައިދުއާއި ކ.ގުޅީގައި ޕްރޮގްރާމް ކުރިޔަށް ގެންދެވި ގޮތާބެހޭ ގޮތުން ޕީ.އެސް.އެމަށް މަޢުލޫމާތު ދެއްވަމުން، މިނިސްޓަރ އޮފް ޖެންޑަރ އެންޑް ފެމިލީ، ޒެނީޝާ ޝަހީދު ޒަކީ ވިދާޅުވީ، ހުރިހައި ފަރާތްތަކުންވެސް އިތުރަށް ހޭލުންތެރި ކުރުވުމުގެ ޕްރޮގްރާމްތައް ބޭނުންވާ ކަމަށް ބުނެ އެކަމަށް އެދިފައިވާ ކަމަށެވެ. އެހެންކަމުން މިއަހަރުގެ ތެރޭގައި ހޭލުންތެރިކުރުމުގެ ތަފާތު އެކި ޕްރޮގްރާމްތައް ކުރިޔަށްގެންދަވަން ރާއްވަވާފައިވާ ކަމަށެވެ.
"ގެވެށި އަނިޔާގެ ޝިކާރައަކަށްވެފައިވާ އަންހެނުންނާއި ފިރިހެނުން، އަދި ކުޑަކުދިންނަށް ކުރާ އަނިޔާތަކާއިބެހޭ ގޮތުން ބެލެނިވެރިންނާއި، ދަރިވަރުންނާއި، ޓީޗަރުންނަށް އަމާޒުކޮށް ހޭލުންތެރި ކުރުވުމުގެ ވަކި ވަކި ސެޝަންތަކެއް ކުރިޔަށް ގެންދިއުމަށް ވަނީ ރޭވިފައި. ހަމަ އެއާއެކު އުމުރުން ދުވަސްވީ ބޭފުޅުންވެސް އެބަ ވިދާޅުވޭ އިތުރު ޕްރޮގްރާމްތައް ބޭނުންވާ ވާހަކަ. އެހެންވީމާ އެބޭފުޅުންނާއި ގުޅިގެން އަޅުގަނޑުމެން މިއަހަރު ތެރޭގައި ހޭލުންތެރި ކުރުވުމުގެ ތަފާތު އެކި ޕްރޮގްރާމްތައް ކުރިޔަށް ގެންދާނަން" ޖެންޑަރ މިނިސްޓަރ ވިދާޅުވިއެވެ.
ޖެންޑަރ މިނިސްޓަރ ވިދާޅުވީ، މިނިސްޓްރީން އަތޮޅުތެރޭގައި ދެއްވަމުން ގެންދަވާ ޚިދްމަތްތައް ލާމަރުކަޒީ ކުރެއްވުމަށްޓަކައި މުހިންމު މަސައްކަތްތަކެއް ކުރައްވަމުން ގެންދަވާ ކަމަށާއި، އެގޮތުން މިހާރު، މިނިސްޓްރީއާއި އަތޮޅުތެރޭގައި ހުރި 19 ފެމިލީ އެންޑް ޗިލްޑްރެން ސާރވިސް ސެންޓަރުތައް (އެފްސީ.އެސް.ސީ) އެއްވިއުގައަކުން ގުޅާލައްވާފައިވާ ކަމަށެވެ. އަދި މިހާރު މަސައްކަތް ކުރައްވަމުން ގެންދަވަނީ، ކޮމިއުނިޓީ ސޯޝަލް ވޯކިންގް ގްރޫޕްތަކެއް އުފެއްދުން ކަމަށާއި، މާލެ އަތޮޅުގެ ރަށްތަކުގައި މިއަހަރުގެ ތެރޭގައި މި ގްރޫޕްތައް ޤާއިމް ކުރެވިގެންދާނެ ކަމަށް މިނިސްޓަރ ވިދާޅުވިއެވެ.
"އިޖްތިމާޢީ މަސައްކަތްތައް ކުރިޔަށް ގެންދިއުމަށްޓަކައި، ކޮންމެ ރަށެއްގައިވެސް ޚާއްޞަ ގްރޫޕެއް އުފެއްދުމަކީ، ރަށުފެންވަރުގައި އެ މަސައްކަތްތައް ބާރު ސްޕީޑެއްގައި ކުރިޔަށް ގެންދިއުމަށް އެޅޭ ވަރަށް މުހިންމު ފިޔަވަޅެއް ކަމުގައި އަޅުގަނޑު ދެކެން. ކޮމިއުނިޓީ ސާރވިސް ގްރޫޕްގައި ހިމެނޭނެ އަންހެނުން ކުރިއަރުވާ ކޮމިޓީއާއި، ފުލުހުންނާއި، ސްކޫލްތަކާއި، ޞިއްހީ މަރުކަޒާއި، ރަށުކައުންސިލާއި، މަދަނީ ޖަމްޢިއްޔާ ޖަމާއަތްތަކުގެ ބޭފުޅުންވެސް. މިހުރިހައި ދާއިރާތަކެއް ގުޅިގެން މަސައްކަތް ކުރެވޭނެ ނިޒާމެއް ޤާއިމް ކުރުމުގެ ގޮތުން ކުރާ މަސައްކަތެއް މިއީ." ޖެންޑަރ މިނިސްޓަރ ވިދާޅުވިއެވެ.
"އިޖްތިމާއީ ރައްކާތެރިކަން އެންމެނަށް" މި ޕްރޮގްރާމްގެ ދަށުން، މާލެ އަތޮޅު ގުރައިދުއާއި ގުޅީގައި ކުރިޔަށް ގެންދެވި ޙަރަކާތްތަކުގެ ތެރެއިން މިނިސްޓަރ ވަނީ މި ދެރަށުގެ ކައުންސިލްތަކާއި، އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކާއި، މަދަނީ ޖަމްޢިއްޔާ ޖަމާޢާތްތަކާއި ބައްދަލު ކުރައްވާ ޖެންޑަރ މިނިސްޓްރީގެ މަސައްކަތްތައް ތަންފީޒް ކުރެއްވުމަށް ގުޅިގެން ކުރެވިދާނޭ ކަންތައްތަކާބެހޭ ގޮތުން މަޝްވަރާ ކުރައްވާފައެވެ.