ކިޑްނީގައި އުފެދޭ ހިލަ، ލޭޒަރޓްރީޓްމަންޓުގެ އެހީގައި ނައްތާލުމުގެ ފަރުވާ ކާމިޔާބުކަމާއެކު އައިޖީއެމްއެޗުގައި ދެއްވައިފިއެވެ.
އިންދިރާ ގާނދީ މެމޯރިއަލް ހޮސްޕިޓަލުގައި ސަރުކާރުން ޤާއިމްކުރައްވާފައިވާ ނެޝަނަލް ޔޫރޯ-ރީނަލް އެންޑް ފަރޓިލިޓީ ސެންޓަރުން ދެއްވިމި ފަރުވާ ދެއްވާފައިވަނީ އިންޑިޔާގެ އެންޔޫ ހޮސްޕިޓަލުގެ ޚާއްޞަ ޑޮކްޓަރެއްގެ އެހީގައެވެ. މި ފަރުވާ ދީފައިވަނީ 64 އަހަރުގެ އަންހެނަކަށް ކަމަށާއި އެމީހާގެ ހާލުވެސް ރަނގަޅުކަމަށް އައިޖީއެމްއެޗުން ވިދާޅުވެއެވެ.
ނެޝަނަލް ޔޫރޯ-ރީނަލް އެންޑް ފަރޓިލިޓީ ސެންޓަރަކީ، ސާދަ މިލިޔަނަށްވުރެ ގިނަ ރުފިޔާ ޚަރަދު ކުރައްވައިގެން އިންދިރާ ގާނދީ މެމޯރިއަލް ހޮސްޕިޓަލުގައި ސަރުކާރުން ޤާއިމްކުރައްވާފައިވާ ސެންޓަރެކެވެ. މި ސެންޓަރަކީ ފަހަކަށް އައިސް ކުޑަކަމުދާ ނިޒާމްގެ ބަލިތަކާއި، ކިޑްނީގެ ބަލިތަކަށް ފަރުވާ ހޯދާ މީހުންގެ އަދަދު ރާއްޖޭގައި އިތުރުވަމުންދާތީ، އެބަލިތަކުގެ މީހުންނަށް ރާއްޖޭގައި ތިބެގެން ފަރުވާ ހޯދޭނޭ ލުއި ފަސޭހަ އިންތިޒާމް ހަމަޖައްސަވައިދެއްވުމުގެ މަޤުޞަދުގައި ސަރުކާރުން ޤާއިމް ކުރެއްވި ސެންޓަރެކެވެ.
އިންޑިއާގެ އެން.ޔޫ ހޮސްޕިޓަލުގެ ފަންނީ އެހީތެރިކަމާއެކު ޤާއިމް ކުރެއްވި މި ސެންޓަރުހުޅުއްވައި ރަސްމީ ގޮތުން ޚިދްމަތް ދެއްވަން ފަށްޓަވާފައިވަނީ، 2016 ވަނަ އަހަރުގެ ނޮވެމްބަރު މަހުގައެވެ.