އޭޑީކޭ ހޮސްޕިޓަލުން އަލަށް ހަދާ ވޯޑުގެ މަސައްކަތް ނިމުމުން 80 އެނދުގެ ޖާގަ އިތުރުވެގެންދާނެ ކަމަށް އެހޮސްޕިޓަލުން ހާމަކޮށްފިއެވެ. ޕީ.އެސް.އެމް ނިއުސްއަށް މަޢުލޫމާތުދެއްވަމުން އޭ.ޑީ.ކޭ ހޮސްޕިޓަލުގެ މެނޭޖިންގ ޑިރެކްޓަރ އަޙުމަދު އައްފާލް ވިދާޅުވީ މިއަހަރުގެ މެދެއްހާ ހިސާބުގައި ވޯޑުގެ މަސައްކަތް ނިންމައި ޚިދުމަތް ދިނުމަށްޓަކައި މަސައްކަތް ކުރަމުންދާ ކަމަށެވެ.
އޭޑީކޭ ހޮސްޕިޓަލުން ގެންދަނީ ހޮސްޕިޓަލުން ދޭ ޚިދުމަތް އިތުރަށް ފުޅާކޮށް ޖާގަ އިތުރުކުރުމަށްޓަކައި ގިނަ މަސައްކަތްތަކެއް ކުރަމުންނެވެ. އެގޮތުން އެ ހޮސްޕިޓަލުން ބޮޑު 3 މަޝްރޫޢެއްގެ މަސައްކަތް މިހާރުވެސް ދަނީ ކުރަމުންނެވެ. މީގެތެރޭގައި ހޮސްޕިޓަލު ތަރައްޤީކުރުމުގެ މަޝްރޫޢުގެ ފޭސް 2 ގެ ދަށުން އަޅާ އިމާރާތުގައި ހަދަމުންގެންދާ ވޯޑްގެ މަސައްކަތް ނިމުމުން އެނދުގެ ޢަދަދު 80 އަށް އިތުރުވާނެ ކަމަށް އޭޑީކޭ ހޮސްޕިޓަލުން ބުނެއެވެ.
އެ ހޮސްޕިޓަލުން ކުރިޔަށްގެންދާ މަޝްރޫޢުތަކާއި ގުޅޭ ގޮތުން ޕީ.އެސް.އެމަށް މަޢުލޫމާތުދެއްވަމުން އޭ.ޑީ.ކޭ ހޮސްޕިޓަލުގެ މެނޭޖިންގ ޑިރެކްޓަރ އަޙުމަދު އައްފާލު ވިދާޅުވީ މިއަހަރުގެ މެދެއްހާ ތާނގައި އެ އިމާރާތުގައި ޚިދުމަތް ދިނުމަށްޓަކައި މަސައްކަތް ކުރައްވަމުން ގެންދަވާ ކަމަށެވެ.
އޭޑީކޭ ހޮސްޕިޓަލުން އަންނަނީ އުމުރުން ދުވަސްވީ މީހުންނަށް ޚިދުމަތް ދޭ ސެންޓަރެއް ޤާއިމްކުރުމުގެ މަސައްކަތްވެސް ކުރަމުންނެވެ. މި ސެންޓަރ ފަރުމާކޮށްފައިވަނީ އުމުރުން ދުވަސްވީ މީހުންނަށް ޚާއްސަ އެކި ޚިދުމަތްތައް ދެވޭނޭހެންކަން އައްފާލް ފާހަގަކުރެއްވިއެވެ.
މަސައްކަތް ކުރަނީ ދުވަސްވީ މީހުންނަށް އަމާޒުކޮށްގެން އެކަމަށް ޙާއްސަ މީހުން ލައިގެން އެހެން ނަމަވެސް ހޮސްޕިޓަލް ނުވަތަ މަރުކަޒުގެ ތެރޭގައި އެމީހުން އެޑްމިޓް ކުރުމަށް ވުރެ މި ސެންޓަރުގެ މަސައްކަތް ބޮޑަށް އަމާޒުކޮށްފައިވާނީ މުޖުތަމަޢުގެ ތެރޭގައި ދުވަސް މީހުންނަށް ދިރިއުޅުމަށް ބޭނުންވާ ކަންތައްތައް ކުރެވިގެން ވަކި ޙާއްސަ ހާލަތެއްގައި ބޭނުންވާ ކަންތައްތަކަށް މި ސެންޓަރަށް ގެނެސް ޚިދުމަތް ދިނުމަށްފަހު އެބޭފުޅަކު ދިރިއުޅޭ ތަނަކަށް ގެންސްދިނުމަށް މަސައްކަތް ކުރުމެވެ.
އޭޑީކޭ ހޮސްޕިޓަލުގެ މުވައްޒަފުންނަށާއި، ހޮސްޕިޓަލުގައި އެނދުމަތިކޮށްފައި ތިބޭ ބަލިމީހުންގެ އެހީތެރިންނަށް ޚާއްސަކޮށްގެން 10 ބުރީގެ އިމާރާތެއްގެ މަސައްކަތް ވެސް އޭ.ޑީ.ކޭއިން ވަނީ ފަށާފައެވެ. މި އިމާރާތުގައި މުވައްޒަފުންނަށް ޚާއްޞަކޮށްފައިވާ ފްލެޓްތައް ހުންނާނެ ކަމަށާއި އަދި ޢިމާރާތުގެ 22 ކޮޓަރި ޚާއްސަކޮށްފައިވަނީ ހޮސްޕިޓަލްގައި އެޑްމިޓްކޮށްފައިވާ ބަލިމީހުންގެ އެހީތެރިންނަށް ކަމަށް އޭޑީކޭއިން ހާމަކުރެއެވެ. އަދި މިޚިދުމަތް ފޯރުވައިދޭނީ މިހާރު މާލޭގައި އާންމު ގޮތެއްގައި ކުލި ދައްކައިގެން ކޮޓަރި ހިފަންޖެހޭ އަގަށްވުރެ ހެޔޮއަގެއްގައި ކަންވެސް އޭޑީކޭ ހޮސްޕިޓަލުން ފާހަގަކުރެއެވެ.