ނުކުޅެންދުންތެރިކަން ހުންނަ މީހުންނަށާއި މަސްތުވާތަކެތީގެ ވަބާގައި ޖެހިފައިތިބި މީހުންގެ ތެރެއިން މުޖުތަމަޢަށް އަލުން އަނބުރާ އަންނަން ބޭނުންވެފައި ތިބި ޒުވާނުންނަށް ވަޒީފާގެ އިތުރު ފުރުޞަތުތަކެއް ދިނުމަށް ސްޓޭޓް ޓްރޭޑިންގ އޯގަނައިޒޭޝަން، އެސްޓީއޯއިން ނިންމައިފިއެވެ.
2014 ވަނަ އަހަރުން ފެށިގެން އެކުންފުނިން ދަނީ ނުކުޅެދުންތެރިކަން ހުންނަ މީހުންނަށް ވަޒީފާ އަދާކުރުމުގެ ފުރުޞަތު ފަހިކޮށްދެމުންނެވެ. އެގޮތުން މިހާތަނަށް ނުކުޅެދުންތެރިކަން ހުރި 6 ފަރާތަކަށް ވަޒީފާ ދީ، އެފަރާތްތަކުން ދަނީ އެކުންފުނީގައި މަސައްކަތްކުރަމުންނެވެ. އަދި އެސްޓީއޯއިން މިހާރު މަސައްކަތްކުރަމުން ދަނީ ނުކުޅެދުންތެރިކަން ހުންނަ މީހުންގެ އިތުރުން މަސްތުވާތަކެތީގެ ވަބާގައި ޖެހި، އަލުން އަނބުރާ މުޖުތަމަޢުއަށް އަންނަން ބޭނުންވާ ޒުވާނުންނަށް ވަޒީފާގެ ފުރުޞަތު ހޯދައިދިނުމަށެވެ.
އެސްޓީއޯގެ އިޖުތިމާޢީ ޒިންމާގެ ދަށުން ހުޅުވާލާ ވަޒީފާގެ ފުރުޞަތުގައި ހުޅުވާލާނީ ކިތައް ފަރާތަށް ކަމެއް އެކުންފުނިން ހާމައެއްނުކުރެއެވެ. އެހެންނަމަވެސް ހުޅުވާލާނެ ތާރީޚަކާއި، ހުރި ފުރުޞަތުތައް ފަހުން ހާމަކުރާނެކަމަށް އެކުންފުނިން މަޢުލޫމާތުދެއެވެ.
މަސްތުވާތަކެތީގެ ވަބާގައި ޖެހިފައި ތިބި ކުދިންގެ ތެރެއިން އަލުން އަނބުރާ މުޖުތަމަޢަށް އަންނަން ބޭނުންވެފައި ތިބި ކުދިންނަށް ވަޒީފާގެ ފުރުޞަތު ދިނުމާއި ގުޅޭ އެއްބަސްވުމުގައި އެސްޓީއޯއިން ވަނީ، ނޭޝަނަލް ޑްރަގް އެޖެންސީއާއެކު ސޮއިކޮށްފައެވެ.